ពេលថ្មីៗនេះ ពិព័រណ៍គំនូរចិន“ផ្កាបក្សី·យូណាន”បានរៀបចំនៅវិទ្យាស្ថានសិល្បៈយូណាន វិចិត្រករល្បីឈ្មោះលើគំនូរចិនក្នុងនិងក្រៅខេត្តយូណានជាច្រើនបានជួបជុំគ្នា ដើម្បីពិគ្រោះពិភាក្សាគ្នាអំពីផ្លូវនៃការអភិវឌ្ឍនិងច្នៃប្រឌិតថ្មីចំពោះគំនូរចិនប្រពៃណី។
យោងតាមដំណឹងបានឱ្យដឹងថា ពិព័រណ៍លើកនេះបានតាំងបង្ហាញស្នាដៃគំនូរចិនអំពីផ្កានិងបក្សីសរុបចំនួនជាង៦០ផ្ទាំង មានផ្នែកមួយជាស្នាដៃពីសាលាវិចិត្រសិល្បៈ ឯផ្នែកមួយទៀតជាស្នាដៃនៃ វិចិត្រករល្បីឈ្មោះថ្នាក់កំពូលលើគំនូរផ្កានិងបក្សី ដែលចំនួននៃស្នាដៃទាំងពីរប្រភេទនេះគឺប្រហែលជា 3:1។
លោក Yue Qianshan ជាសាស្ត្រាចារ្យនៃវិទ្យាស្ថានវិចិត្រសិល្បៈចិនបានយកស្នាដៃដែលសម្រេចនៅមណ្ឌលស្វយ័តស៊ីសាំងបានណាខេត្តយូណាននាឆ្នាំ២០១៨។ គាត់សម្តែងថា ខេត្តយូណានសាកសមសម្រាប់វិចិត្រករខាងផ្កានិងបក្សីក្នុងការគូរគំនូរព្រាង ដែលបានធ្វើឱ្យវិចិត្រករខាងផ្កានិងបក្សីជាច្រើនក្លាយទៅជាវិចិត្រករល្បីឈ្មោះ ស្នាដៃតំណាងជាច្រើនរបស់ពួកគេសុទ្ធតែធ្វើឡើងនៅខេត្តយូណាន ព្រមទាំងបានបង្កើតឥទ្ធិពលយ៉ាងធំសម្បើមដល់មជ្ឈដ្ឋានវិចិត្រសិល្បៈនៃប្រទេសចិន៕
អ្នកសារព័ត៌មាន៖ Sun Min
អ្នកបកប្រែ៖ លីហ្សា