ក្នុងឱកាសបុណ្យចូលឆ្នាំចិនមានមនុស្សចំនួន៣៤.៦៤លាននាក់មកទេសចរនៅខេត្តយូណាន ការច្របាច់បញ្ចូលគ្នារវាងវប្បធម៌និងទេសចរណ៍ធ្វើឱ្យភ្ញៀវទេសចរកាន់តែសប្បាយ
យោងតាមនាយកដ្ឋានពាក់ព័ន្ធបានព្យាករណ៍ឱ្យដឹងថា ក្នុងវិស្សមកាលនៃបុណ្យចូលឆ្នាំប្រពៃណីចិនឆ្នាំនេះ ទូទាំងខេត្តយូណានបានទទួលភ្ញៀវទេសចរសរុបចំនួន៣៤.៦៤០៦លាននាក់ បើប្រៀបធៀបនឹងឆ្នាំមុនបានកើនឡើង២០.២២%។ ទូទាំងខេត្តយូណានបានសម្រេចប្រាក់ចំណូលតាមវិស័យទេសចរណ៍សរុបចំនួន៣៥៦៦លានដុល្លារអាមេរិក បើប្រៀបធៀបនឹងឆ្នាំមុនបានកើនឡើង២៥.២៩%។
ការរៀបចំនិងគ្រប់គ្រងទីផ្សារទេសចរណ៍បានទទួលប្រសិទ្ធិភាព ភ្ញៀវទេសចរធ្វើដំណើរនៅខេត្តយូណានកាន់តែពេញចិត្ត
ក្នុងវិស្សមកាលបុណ្យចូលឆ្នាំប្រពៃណីចិន ការផ្គត់ផ្គង់លើវិស័យទេសចរណ៍និងសណ្តាប់ធ្នាប់សេវាកម្មនៃខេត្តយូណានមានលក្ខណៈល្អប្រសើរ ព្រមទាំងស្ថានភាពធ្វើទេសចរដោយថ្លៃថ្នូរនិងគុណភាពសេវាកម្មនៃតំបន់ទេសចរណ៍នានាសុទ្ធតែល្អជាងឆ្នាំមុនៗ។ ពីថ្ងៃទី០៤ ខែកុម្ភៈកន្លងមក ទីផ្សារទេសចរណ៍ទូទាំងខេត្តយូណានបានដំណើរដោយមានស្ថេរភាព ដោយមិនកើនមានឧប្បត្តិហេតុសុវត្ថិភាពទេសចរណ៍ឡើយ។
ទីផ្សារទេសចរណ៍កើនសន្ទុះក្នុងល្បឿនលឿន សេដ្ឋកិច្ចនៃវិស័យទេសចរណ៍ក្នុងវិស្សមកាលបានសម្រេចសមិទ្ធិផលថ្មី
ក្នុងវិស្សមកាលបុណ្យចូលឆ្នាំប្រពៃណីចិននៅឆ្នាំនេះ ការរៀបចំតំបន់ទេសចរណ៍នៅខេត្តយូណានកាន់តែល្អប្រសើរនិងមានតុល្យភាព។ ខ្សែផ្លូវទេសចរណ៍ប្រពៃណីនិងតំបន់ទេសចរណ៍សំខាន់ធ្វើការទទួលស្វាគមន៍ជានិច្ច “ការធ្វើដំណើរខ្លីព័ទ្ធជុំវិញ”ទីក្រុងសំខាន់ដូចជាទីក្រុងគុនមីញជាដើមក៏ទទួលការស្វាគមន៍យ៉ាងខ្លាំងផងដែរ ការធ្វើទេសចរនៅភាគខាងកើតនិងភាគអាគ្នេយ៍ខេត្តយូណានបានក្លាយទៅជា“ទិសដៅថ្មី”នៃទេសចរណ៍ខេត្តយូណាន។
ការធ្វើទេសចរបែបវប្បធម៌បានទទួលការស្វាគមន៍ “បុណ្យចូលឆ្នាំប្រពៃណីចិនតាមលក្ខណៈយូណាន”កាន់តែមានអត្ថន័យ
ខេត្តយូណានមិនគ្រាន់តែមានភ្នំខៀវនិងទឹកថ្លាល្អ ផ្ទាំងមេឃបៃតងនិងពពកសដែលធ្វើឱ្យភ្ញៀវទេសចរឈ្លក់វង្វេង វប្បធម៌ជនជាតិដ៏សម្បូរបែបដែលពោរពេញដោយកម្លាំងទាក់ទាញ។ ក្នុងវិស្សមកាលឆ្នាំនេះ មន្ទីរវប្បធម៌និងទេសចរណ៍គ្រប់កម្រិតនៃខេត្តយូណានបានរៀបចំសកម្មភាពវប្បធម៌និងទេសចរណ៍គ្រប់បែបយ៉ាងដើម្បីអបអរសាទរ ទេសចរណ៍តាមភូមិ ពិធីជួបជុំគ្នានៅជុំវិញព្រះវិហារ ពិធីទស្សនាអំពូលភ្លើង បានទាក់ទាញភ្ញៀវទេសចរជាច្រើន។
ការប្រើប្រាស់App“ធ្វើដំណើរនៅខេត្តយូណានដោយទូរស័ព្ទដៃមួយ” ដែលធ្វើឱ្យភ្ញៀវទេសចរនៅខេត្តយូណានមានភាពវៃឆ្លាត
ភ្ញៀវទេសចរដែលមកពីគ្រប់ទិសទីប្រើប្រាស់App“ធ្វើដំណើរនៅខេត្តយូណានដោយទូរស័ព្ទដៃមួយ”ញ៉ាំងឱ្យការធ្វើទេសចរនៅខេត្តយូណានមានភាពវៃឆ្លាត។ មុខងាររបស់Appដូចជា“ការចូលក្នុងតំបន់ទេសចរណ៍ដោយស្គេនមុខ”“ការឧទ្ទេសនាមតំបន់ទេសចរណ៍”“បន្ទប់ទឹកវៃឆ្លាត”ជាដើមបានទទួលការកោតសរសើរមិនដាច់ពីម៉ាត់ពីសំណាក់ភ្ញៀវទេសចរ៕
អ្នកសារព័ត៌មាន៖ Bi Peng
អ្នកបកប្រែ៖ លីហ្សា