នៅឆមាសទី ១ ឆ្នាំ ២០២២ តំបន់សេដ្ឋកិច្ចពិសេសកំពង់ផែព្រះសីហនុនៃប្រទេសកម្ពុជាមានទំហំពាណិជ្ជកម្មនាំចេញ និងនាំចូលកើនឡើង ៣៨,២៣% ធៀបនឹងឆ្នាំ ២០២១
នៅពេលថ្ងៃលិច តំបន់សេដ្ឋកិច្ចពិសេសកំពង់ផែព្រះសីហនុនៃប្រទេសកម្ពុជាដល់ម៉ោងចេញពីការងារ ម៉ូតូ និងរថយន្តបន្តចាកចេញពីតំបន់សេដ្ឋកិច្ចពិសេសកំពង់ផែព្រះសីហនុ បុគ្គលិកការងារដើរបណ្តើរ និងជជែកបណ្តើរ ពួកគេសប្បាយរីករាយខ្លាំងណាស់ ។
តំបន់សេដ្ឋកិច្ចពិសេសកំពង់ផែព្រះសីហនុជាតំបន់មួយក្នុងចំណោមតំបន់សហប្រតិបត្តិការសេដ្ឋកិច្ច និងពាណិជ្ជកម្មក្រៅប្រទេសដំបូងគេ ដែលត្រូវបានអនុម័តដោយប្រទេសចិន ហើយជាតំបន់សហប្រតិបត្តិការសេដ្ឋកិច្ចថ្នាក់ជាតិរវាងរដ្ឋាភិបាលចិន និងកម្ពុជា និងជាគម្រោងតំណាងក្នុងចំណោមគម្រោងរួមកសាង”ខ្សែក្រវ៉ាត និងផ្លូវ” ។ ថ្នាក់ដឹកនាំរបស់ប្រទេសចិន និងកម្ពុជាយកចិត្តទុកដាក់លើការអភិវឌ្ឍនៃតំបន់សេដ្ឋកិច្ចពិសេសកំពង់ផែព្រះសីហនុ ។ តាមរយៈការអភិវឌ្ឍជាង ១០ ឆ្នាំកន្លងមកនេះ មានក្រុមហ៊ុនចំនួន ១៧០ បានចូលរួមតំបន់សេដ្ឋកិច្ចពិសេសកំពង់ផែព្រះសីហនុ ដែលមកពីប្រទេសចិន ជប៉ុន អាមេរិក និងអ៊ីតាលី ជាដើម បានផ្តល់ការងារដល់មនុស្សចំនួន ៣ ម៉ឺននាក់ ។ ក្រោយពីតំបន់សេដ្ឋកិច្ចពិសេសកំពង់ផែព្រះសីហនុបញ្ចប់ការកសាង នឹងមានក្រុមហ៊ុនចំនួន ៣០០ ចូលរួម ដែលនឹងផ្តល់ការងារដល់មនុស្សចំនួន ១០ ម៉ឺននាក់ ។
ប៉ុន្មានឆ្នាំកន្លងមកនេះ កិច្ចសហប្រតិបត្តិការសេដ្ឋកិច្ច និងពាណិជ្ជកម្មរវាងប្រទេសចិន និងកម្ពុជារីកចម្រើនយ៉ាងឆាប់រហ័ស តំបន់សេដ្ឋកិច្ចពិសេសកំពង់ផែព្រះសីហនុក៏អភិវឌ្ឍន៍យ៉ាងលឿនផងដែរ។ ក្នុងតំបន់សេដ្ឋកិច្ចពិសេសកំពង់ផែព្រះសីហនុ តំបន់រស់នៅថ្មី តំបន់ពាណិជ្ជកម្ម អនាម័យផ្នែកវេជ្ជសាស្ត្រ មជ្ឈមណ្ឌលអប់រំ និងមជ្ឈមណ្ឌលបណ្តុះបណ្តាលត្រូវបានកសាងជាបន្តបន្ទាប់ ហេដ្ឋារចនាសម្ព័ន្ធសេវាកម្មកាន់តែពេញលេញ។
ឃុំសំរុងស្រុកព្រៃនប់ជិតតំបន់សេដ្ឋកិច្ចពិសេសកំពង់ផែព្រះសីហនុ ដែលមានចម្ងាយមិនដល់ ២ គីឡូម៉ែត្រ ។ លោក មី ចា មេឃុំសំរុងបានប្រាប់អ្នកសារព័ត៌មានថា ក្នុងឃុំយើងមានភូមិ ៣ ដែលមានប្រជាជនអាចធ្វើការចំនួន ៥៦០០ នាក់ ប្រជាជននោះមាន ៧០% ធ្វើការនៅតំបន់សេដ្ឋកិច្ចពិសេសកំពង់ផែព្រះសីហនុ ហើយមានប្រជាជនខ្លះបើកភោជនីយដ្ឋាន ហាងលក់ទំនិញនៅក្បែរតំបន់សេដ្ឋកិច្ចពិសេសកំពង់ផែព្រះសីហនុ ។ ការរស់នៅជិត តំបន់សេដ្ឋកិច្ចពិសេសកំពង់ផែព្រះសីហនុជាអត្ថប្រយោជន៍ដ៏ល្អបំផុតរបស់យើង ។
លោក ឆាន ជិនកាំង ប្រធានក្រុមហ៊ុនតំបន់សេដ្ឋកិច្ចពិសេសកំពង់ផែព្រះសីហនុ បានរៀបរាប់ថា ក្នុងរយៈពេល ជាង ១០ ឆ្នាំកន្លងមកនេះ តំបន់សេដ្ឋកិច្ចពិសេសកំពង់ផែព្រះសីហនុ បានជំរុញការអភិវឌ្ឍសេដ្ឋកិច្ចខេត្តព្រះសីហនុយ៉ាងឆាប់រហ័ស ហើយក៏ទទួលបានការគាំទ្រយ៉ាងពេញទំហឹងពីរដ្ឋាភិបាលកម្ពុជា។ ក្នុងអគារការិយាល័យសេវាកម្មទូទៅមានច្រកចេញចូលតែមួយ សហគ្រាសដែលវិនិយោគនៅក្នុងតំបន់ពិសេសនេះអាចបំពេញគ្រប់នីតិវិធីចាប់ពីការចុះឈ្មោះ ការសាងសង់ ការផលិត រហូតដល់ការធ្វើពាណិជ្ជកម្ម ។ លោក នាង កឹធី ប្រធានគណៈកម្មាធិការនៃតំបន់សេដ្ឋកិច្ចពិសេសកំពង់ផែព្រះសីហនុនៃក្រុមប្រឹក្សាអភិវឌ្ឍន៍កម្ពុជាបានបញ្ជាក់ថា “សហគ្រាសអាចបំពេញគ្រប់នីតិវិធីដោយមិនចាំបាច់ចាកចេញពីឧទ្យាន ដែលបានបង្ហាញពីរដ្ឋាភិបាលកម្ពុជាយកចិត្តទុកដាក់លើតំបន់សេដ្ឋកិច្ចពិសេសកំពង់ផែព្រះសីហនុ។”
តាមទិន្នន័យពីអគ្គនាយកដ្ឋានគយកម្ពុជាបានឱ្យដឹងថា នៅឆមាសទី ១ ឆ្នាំ ២០២២ ទំហំពាណិជ្ជកម្មនាំចេញ និងនាំចូលរបស់សហគ្រាសនៅតំបន់សេដ្ឋកិច្ចពិសេសកំពង់ផែព្រះសីហនុមានចំនួន ៥% នៃទំហំពាណិជ្ជកម្មនាំចេញ និងនាំចូលសរុបរបស់កម្ពុជា ឈានដល់ ១.៣៧៤ ពាន់លានដុល្លារអាមេរិក កើនឡើង ៣៨.២៣% ធៀបនឹងឆ្នាំ២០២១ ។ នៅឆ្នាំ ២០២១ ទំហំពាណិជ្ជកម្មនាំចេញ និងនាំចូលនៃតំបន់សេដ្ឋកិច្ចពិសេសកំពង់ផែព្រះសីហនុ បានកើនឡើង ៤២.៧៥% ធៀននឹងឆ្នាំ២០២០ ដែលបានសម្រេចនូវការរីកចម្រើនគួរឱ្យកត់សម្គាល់ក្រោមឥទ្ធិពលនៃជំងឺកូវីដ-១៩ ។
ប្រភព៖កាសែតយូណានដេលី
អ្នកបកប្រែ៖刘蓉