មនោសញ្ចេតនាចំពោះផ្លូវរថភ្លើងចិន-ថៃរបស់នារីជនជាតិថៃ ផាន ណាឡ
នៅឯការដ្ឋានសាងសង់ផ្លូវរថភ្លើងចិន-ថៃ ក្នុងស្រុក Pak Chong ខេត្ត Nakhon Ratchasimaភាគឦសាននៃប្រទេសថៃ គ្រឿងចក្រសំណង់ខ្នាតធំកំពុងដំណើរការយ៉ាងមមាញឹក ហើយរថយន្តដឹកទំនិញធុនធ្ងន់បានធ្វើដំណើរទៅវិញទៅមក អ្នកនាង ផាន ណាឡ ជាមួយវិស្វករចិន និងថៃកំពុងរវល់ចូលធ្វើការ។ ដោយសារចូលចិត្តវប្បធម៌ចិន ហើយមានសុទិដ្ឋិនិយមអំពីលទ្ធភាពនៃកិច្ចសហប្រតិបត្តិការសេដ្ឋកិច្ច និងពាណិជ្ជកម្មរវាងប្រទេសចិន និងថៃ ដូច្នេះ កញ្ញា ផាន ណាឡ បានទៅបន្តការសិក្សានៅប្រទេសចិនជាច្រើនឆ្នាំ។ ឆ្នាំនេះ អ្នកនាងមានអាយុ ៣៣ ឆ្នាំ ហើយបានទៅទស្សនាកម្សាន្តតំបន់ជាច្រើនក្នុងប្រទេសចិន ក៏បានឃើញពីអត្ថប្រយោជន៍នៃការអភិវឌ្ឍសេដ្ឋកិច្ចដែលនាំមកដោយរថភ្លើងល្បឿនលឿនដល់ជីវិតរបស់មនុស្សតាមខ្សែបន្ទាត់នោះ។ បន្ទាប់ពីទទួលបានសញ្ញាប័ត្របណ្ឌិតជំនាញភាសាវិទ្យាពីសាកលវិទ្យាល័យណានខាយ ប្រទេសចិន។ នាងបានត្រឡប់ទៅប្រទេសថៃវិញ និងបានក្លាយជាអ្នកបកប្រែពេញម៉ោងនៅស្ថានីយត្រួតពិនិត្យទូទៅនៃនាយកដ្ឋានគម្រោងផ្លូវរថភ្លើងចិន-ថៃ ដំណាក់កាលទីមួយ។
ដើម្បីសម្រួលដល់ការងារ អ្នកនាង ផាន ណាឡ រស់នៅផ្ទះជីដូនជីតានៅខេត្ត Nakhon Ratchasimaនាពេលបច្ចុប្បន្ននេះ ។ ជាការពិតខេត្ត Nakhon Ratchasimaជាចំណុចបញ្ចប់នៃដំណាក់កាលទីមួយនៃផ្លូវរថភ្លើងចិន-ថៃ ដែលមានចម្ងាយប្រហែល ២០០ គីឡូម៉ែត្រពីទីក្រុងបាងកក ផ្លូវនេះជាប្រព័ន្ធផ្លូវដែកចាស់ដែលបានសាងសង់កាលពីមួយរយឆ្នាំមុន បច្ចុប្បន្ននេះ គេត្រូវចំណាយពេលជាង ៤ ម៉ោងក្នុងការធ្វើដំណើរទៅ ឬមក។ បន្ទាប់ពីផ្លូវរថភ្លើងចិន-ថៃដំណាក់កាលទីមួយត្រូវបានកសាងឡើង ការដំណើរនឹងត្រូវកាត់បន្ថយមកត្រឹមជាងមួយម៉ោងប៉ុណ្ណោះ។ អ្នកនាង និងក្រុមគ្រួសាររបស់នាងទាំងអស់សង្ឃឹមថា ផ្លូវរថភ្លើងចិន-ថៃដំណាក់កាលទីមួយនឹងបើកឱ្យធ្វើដំណើរជាផ្លូវការឆាប់រហ័ស។ អ្នកនាង ផាន ណាឡ បានប្រាប់អ្នកកាសែតថា "ពីក្រុងបាងកកទៅកាន់ខេត្តNakhon Ratchasimaមានស្ថានីយតូចៗជាច្រើនតាមផ្លូវរថភ្លើងថៃ-ចិន បន្ទាប់ពីបើកឱ្យធ្វើដំណើរ ផ្លូវរថភ្លើងនេះនឹងនាំមកនូវភាពងាយស្រួលដល់ការដឹកជញ្ជូនដ៏អស្ចារ្យទៅកាន់កន្លែងទាំងនេះ អាចទាក់ទាញភ្ញៀវទេសចរ និងជំរុញការអភិវឌ្ឍសេដ្ឋកិច្ចក្នុងតំបន់"។
យោងតាមការវាយតម្លៃរបស់នាយកដ្ឋានដឹកជញ្ជូនផ្លូវដែកនៃក្រសួងដឹកជញ្ជូនថៃ ការសាងសង់ផ្លូវរថភ្លើងចិន-ថៃដំណាក់កាលទីមួយត្រូវបានគេរំពឹងថានឹងបញ្ចប់និងបើកឱ្យដំណើរការនៅឆ្នាំ២០២៦ ហើយដំណាក់កាលទីពីរត្រូវបានគេរំពឹងថានឹងបញ្ចប់និងដាក់ឱ្យដំណើរការនៅឆ្នាំ២០២៩។ ក្នុងនាមជាគម្រោងសំខាន់នៃការសាងសង់រួមគ្នារវាងចិន-ថៃតាម"ខ្សែក្រវាត់ និងផ្លូវ" និងជាផ្លូវរថភ្លើងល្បឿនលឿនស្តង់ដារដំបូងរបស់ប្រទេសថៃ ផ្លូវរថភ្លើងចិន-ថៃត្រូវបានរចនា និងសាងសង់ដោយប្រើស្តង់ដារចិន ខ្សែផ្លូវដែកដំណាក់កាលទីមួយនឹងតភ្ជាប់ទីក្រុងបាងកក និង Nakhon Ratchasimaហើយខ្សែផ្លូវដែកដំណាក់កាលទីពីរនឹងតភ្ជាប់ជាមួយផ្លូវរថភ្លើងចិន-ឡាវ ហើយឆ្លងកាត់ច្រកព្រំដែនម៉ូទីងរបស់ប្រទេសឡាវ និងច្រកព្រំដែនម៉ហានរបស់ប្រទេសចិន ទើបអាចទៅកាន់ក្រុងគុនមីង ខេត្តយូណាននៃប្រទេសចិនតែម្តង។
អ្នកនាង ផាន ណាឡ បន្ថែមទៀតថា "នៅឆ្នាំ២០១២ ខ្ញុំបានជិះឡានក្រុងចម្ងាយឆ្ងាយពីក្រុងគុនមីងត្រឡប់ទៅក្រុងឈៀងមៃ៉ដែលបានចំណាយពេលជាង ២០ ម៉ោង ការធ្វើដំណើរគឺពិបាកខ្លាំងណាស់។ ក្រោយពីផ្លូវរថភ្លើងថៃ-ចិនបើកដំណើរជាផ្លូវការនៅពេលអនាគត នាងខ្ញុំមុខជានឹងជិះរថភ្លើងល្បឿនលឿនទៅកាន់ទីក្រុងគុនមីងប្រកបដោយផាសុកភាព"៕
អ្នកសារព័ត៌មាន៖ វ៉ាង ធឺង
អ្នកបកប្រែ ៖ Shen Yan