រថភ្លើងដឹកទំនិញខ្សែសង្វាក់ត្រជាក់អន្តរជាតិ ចិន-ឡាវ និងចិន-វៀតណាម បើកដំណើរការក្នុងទិសដៅទាំងពីរ

នាព្រឹកថ្ងៃទី១៦ ខែតុលា រថភ្លើងដឹកទំនិញខ្សែសង្វាក់ត្រជាក់អន្តរជាតិចិន-ឡាវ និងចិន-វៀតណាម បានបើកដំណើរការជាលើកដំបូងនៅស្ថានីយដឹកទំនិញ យាន់ហឺ ក្នុងទីក្រុងយូស៊ី ខេត្តយូណាន។ រថភ្លើង​ដំបូង​ចំនួន​ពីរ​ខ្សែដែល​ដឹក​បន្លែ​ និងផ្លែឈើ​ពិសេស​ខេត្ត​យូណាន​ជាង ​៧០០ ​តោន​ នឹង​មក​ដល់​ទីក្រុង​វៀងចន្ទន៍ ប្រទេស​ឡាវ និងក្រុង LaoCai ប្រទេស​វៀតណាម​​ក្នុងពេល​មួយ​ថ្ងៃ។ នេះជានិមិត្តសញ្ញាដែលរថភ្លើងដឹកទំនិញខ្សែសង្វាក់ត្រជាក់អន្តរជាតិ ចិន-ឡាវ និងចិន-វៀតណាម បើកដំណើរការជាផ្លូវការ។

រថភ្លើងដឹកទំនិញតាមខ្សែសង្វាក់ត្រជាក់អន្តរជាតិចិន-វៀតណាម ពឹងផ្អែកលើផ្លូវរថភ្លើងគុនមីង-យូស៊ី-ហឺខូវ និងផ្លូវដែកម៉ែត្រ(ផ្លូវដែកមានទទឹងមួយម៉ែត្រ)ចិន-វៀតណាម ដើម្បីសម្រេចបាននូវការចូលដោយផ្ទាល់ពីទីក្រុងគុនមីង និងយូស៊ីក្នុងខេត្តយូណាន ទៅកាន់ក្រុង LaoCai ប្រទេសវៀតណាម ហើយការធ្វើដំណើរទាំងមូលត្រូវចំណាយ ២០ ម៉ោង។ មិនតែប៉ុណ្ណោះទេ ផ្លែឈើក្នុងប្រទេសថៃ ឡាវ និងវៀតណាមក៏នឹងត្រូវនាំចូលជាបន្តបន្ទាប់ទៅក្នុងទីផ្សារចិន ដែលទំហំឈានដល់ជាង ១០ ម៉ឺនតោនក្នុងមួយឆ្នាំ៕

អ្នកសារព័ត៌មាន ៖ Pu Meiling  Li Surong   Li Chenghan

អ្នកបកប្រែ ៖ Shen Yan