ការសង្កេត|ឥស្សរជនបរទេសមកបំពេញទស្សនកិច្ចនៅប្រទេសចិនជាបន្តបន្ទាប់ តើហេតុអ្វីពួកគេមកប្រទេសចិន?
ថ្មីៗនេះ ឯកឧត្តម Pedro Sánchez Pérez-Castejón នាយករដ្ឋមន្ត្រីអេស្ប៉ាញ ឯកឧត្តម Dato' Seri Anwar bin Ibrahim នាយករដ្ឋមន្ត្រីម៉ាឡេស៊ី ឯកឧត្តម Lee Hsien Loong នាយករដ្ឋមន្ត្រីសិង្ហបុរី ឯកឧត្តម Emmanuel Macron ប្រធានាធិបតីបារាំង និងលោកជំទាវ Ursula von der Leyen ប្រធានគណៈកម្មការអឺរ៉ុប បានមកបំពេញទស្សនកិច្ចនៅប្រទេសចិនជាបន្តបន្ទាប់។
អ្នកអត្ថាធិប្បាយមួយចំនួនជឿថា ទន្ទឹមនឹងវិបត្តិជាច្រើនដូចជា វិបត្តិសន្តិសុខ វិបត្តិសេដ្ឋកិច្ច និងភាពវឹកវរផ្នែកនយោបាយកើតឡើង ភាគីអឺរ៉ុបយល់ថាកិច្ចសហប្រតិបត្តិការ និងការសន្ទនារវាងចិន និងសហភាពអឺរ៉ុបគឺមានភាពចាំបាច់។គេហទំព័រនៃកាសែត «El Mundo» របស់អេស្ប៉ាញផ្តល់ទស្សនៈថា ប្រទេសចិនមានការចាប់អារម្មណ៍និងមានគោលបំណងក្នុងការទាក់ទងប្រទេសទាំងអស់ និងស្វាគមន៍មេដឹកនាំគ្រប់ប្រទេសមកបំពេញទស្សនកិច្ចនៅប្រទេសចិន។ ឥឡូវនេះ ផ្លូវទាំងអស់សុទ្ធតែនាំពួកគេទៅដល់ទីក្រុងប៉េកាំង។
ឥស្សរជនបរទេសមកបំពេញទស្សនកិច្ចនៅប្រទេសចិនជាបន្តបន្ទាប់ តើហេតុអ្វីពួកគេមកប្រទេសចិន?
ដើម្បីបង្កើតកិច្ចសហប្រតិបត្តិការ និងទទួលផលយកប្រយោជន៍ទៅវិញទៅមក
ឯកឧត្តម លូ សាយា ឯកអគ្គរដ្ឋទូតចិនប្រចាំប្រទេសបារាំង បាននិយាយនៅក្នុងបទសម្ភាសន៍ផ្តាច់មុខជាមួយកាសែត «Nouvelles D'Europe» ថា តាមស្ថិតិថ្មីបំផុតពីភាគីបារាំងបានឱ្យដឹងថា ទំហំពាណិជ្ជកម្មរវាងចិន និងបារាំងបានលើសពី ១០០ ពាន់លានអឺរ៉ូជាលើកដំបូងក្នុងឆ្នាំ២០២២ កើនឡើង ១៤,៦% បើប្រៀបធៀបនឹងរយៈពេលដូចគ្នានៅឆ្នាំមុន ដែលបង្ហាញពីសន្ទុះដ៏ខ្លាំងក្លា។ ពីយុទ្ធសាស្ត្រ សេដ្ឋកិច្ច និងពាណិជ្ជកម្មដល់ទំនាក់ទំនងរវាងប្រជាជនលើវិស័យវប្បធម៌ ប្រទេសទាំងពីររៀបចំផែនការអភិវឌ្ឍទំនាក់ទំនងនាពេលអនាគតគ្រប់ជ្រុងជ្រោយ ដែលបើកចេញនូវទស្សនវិស័យថ្មីសម្រាប់កិច្ចសហប្រតិបត្តិការចិន-បារាំង។
នៅថ្ងៃទី៣១ខែមីនា ឯកឧត្តម Lee Hsien Loong នាយករដ្ឋមន្ត្រីសិង្ហបុរីបានអញ្ជើញមកបំពេញទស្សនកិច្ចនៅប្រទេសចិនជាផ្លូវការ ហើយឯកឧត្តមបានមានប្រសាសន៍ថា "ខ្ញុំមានទំនុកចិត្តយ៉ាងមុតមាំលើភាពធន់នៃសេដ្ឋកិច្ចចិន ហើយខ្ញុំជឿជាក់ថាសេដ្ឋកិច្ចចិននឹងបន្តអភិវឌ្ឍបានល្អជាបន្តបន្ទាប់ ប្រទេសជិតខាងដូចជាសិង្ហបុរីទន្ទឹងរង់ចាំកិច្ចសហប្រតិបត្តិការសេដ្ឋកិច្ចកាន់តែស៊ីជម្រៅជាមួយចិន"។
នៅថ្ងៃទី១ ខែមេសា ឯកឧត្តមDato' Seri Anwar bin Ibrahim នាយករដ្ឋមន្ត្រីម៉ាឡេស៊ីបានបញ្ចប់ដោយជោគជ័យនូវដំណើរបំពេញទស្សនកិច្ចរយៈពេលបួនថ្ងៃនៅប្រទេសចិន។ សម្រាប់ដំណើរបំពេញទស្សនកិច្ចនេះ កាសែត «Sin Chew Daily» បានផ្សព្វផ្សាយព័ត៌មានថា ក្នុងរយៈពេលប៉ុន្មានឆ្នាំខាងមុខ ការវិនិយោគពីប្រទេសចិនតែមួយគឺនឹងក្លាយជាមូលដ្ឋានគ្រឹះដ៏ល្អសម្រាប់ការអភិវឌ្ឍសេដ្ឋកិច្ចរបស់ប្រទេសម៉ាឡេស៊ី។
ដំណើរទស្សនកិច្ចរបស់ថ្នាក់ដឹកនាំប្រទេសជាច្រើននៅប្រទេសចិនបានបញ្ជាក់ថា ប្រទេសចិនដើរតួនាទីដែលមិនអាចខ្វះបានក្នុងការស្ទុះងើបឡើងវិញនៃសេដ្ឋកិច្ចពិភពលោក និងក្នុងតំបន់។ ប្រឈមនឹងតម្រូវការសកលទន់ខ្សោយ ពិភពលោករំពឹងថាទីផ្សារដ៏ធំបំផុតរបស់ប្រទេសចិន និងការអភិវឌ្ឍដែលមានគុណភាពខ្ពស់អាចបង្កើតឱកាសកាន់តែច្រើន។
ដើម្បីកសាងទំនាក់ទំនងទ្វេភាគីដែលមានការប្តេជ្ញាចិត្តជាយុទ្ធសាស្ត្រ
ក្នុងអំឡុងសកម្មភាពការទូតជាញឹកញាប់នាពេលថ្មីៗនេះ ឯកឧត្តម ស៊ី ជីនភីង ប្រធានាធិបតីចិន និងថ្នាក់ដឹកនាំបរទេសមិនត្រឹមតែបាននិយាយអំពីមិត្តភាព និងកិច្ចសហប្រតិបត្តិការរវាងប្រទេសទាំងពីរប៉ុណ្ណោះទេ ថែមទាំងបានលើកឡើងអំពីប្រធានបទដ៏កាន់តែទូលំទូលាយផងដែរ គឺទំនាក់ទំនងទ្វេភាគី និងស្វ័យភាពជាយុទ្ធសាស្ត្រ។ ទន្ទឹមនឹងនេះដែរ ប្រទេសចិនក៏គោរព និងគាំទ្រជម្រើសឯករាជ្យសម្រាប់ផ្លូវអភិវឌ្ឍន៍ដែលធ្វើឡើងដោយប្រជាជននៃប្រទេសផ្សេងៗ។
នៅពេលជួបជាមួយ ឯកឧត្តម Pedro Sánchez Pérez-Castejón នាយករដ្ឋមន្ត្រីអេស្ប៉ាញ ឯកឧត្តម ស៊ី ជីនភីងបានមានប្រសាសន៍ថា ចង់អភិវឌ្ឍន៍ទំនាក់ទំនងចិន-អឺរ៉ុបអោយល្អនោះ អឺរ៉ុបត្រូវប្រកាន់ខ្ជាប់នូវស្វ័យភាពជាយុទ្ធសាស្ត្រ។ ឯកឧត្តម ស៊ី ជីនភីង សង្ឃឹមថា អេស្ប៉ាញនឹងដើរតួនាទីយ៉ាងសកម្មក្នុងការលើកកម្ពស់កិច្ចសន្ទនា និងកិច្ចសហប្រតិបត្តិការរវាងចិន និងសហភាពអឺរ៉ុប។
នៅក្នុងជំនួបជាមួយលោកជំទាវ Ursula von der Leyen ប្រធានគណៈកម្មការអឺរ៉ុបឯកឧត្តម ស៊ី ជីនភីងបានសង្កត់ធ្ងន់ថា យើងត្រូវគោរពសិទ្ធិរបស់ប្រជាជននៃប្រទេសទាំងអស់ក្នុងការជ្រើសរើសផ្លូវអភិវឌ្ឍន៍របស់ខ្លួនដោយឯករាជ្យ។ ការអភិវឌ្ឍទំនាក់ទំនងទ្វេភាគីរវាងចិន និងប្រទេសណាមួយមិនផ្តោតលើ មិនពឹងផ្អែកលើ និងជាកម្មវត្ថុរបស់ភាគីទីបីទេ។
ប្រសិនបើយើងចង់សម្រេចបាន"ស្វ័យភាពជាយុទ្ធសាស្ត្រ"ជាក់ស្តែង យើងត្រូវតែកម្ចាត់និចលភាពនៃការរាំរាំងជាមួយអ្នកដទៃ ហើយធ្វើជាម្ចាស់គ្រប់គ្រងលើខ្លួនយើង។ អ្នកជំនាញខ្លះជឿជាក់ថា ដំណើរទស្សនកិច្ចទៅកាន់ប្រទេសចិនរបស់ឯកឧត្តម Emmanuel Macron គឺជាការឆ្លើយតបដ៏ខ្លាំងក្លាមួយចំពោះគោលនយោបាយដែលគេហៅថា "បំបែកបំបាក់អោយដាច់ចេញ" របស់សហរដ្ឋអាមេរិក។
ដើម្បីពិភពលោកកាន់តែមានសន្តិភាព និងស្ថិរភាព
តួនាទីដ៏សំខាន់របស់ប្រទេសចិនក្នុងការដោះស្រាយនយោបាយវិបត្តិអ៊ុយក្រែនត្រូវបានកោតសរសើរយ៉ាងខ្លាំងដោយថ្នាក់ដឹកនាំនៃប្រទេសជាច្រើន។
នាថ្ងៃទី៦ ខែមេសា នៅទីក្រុងប៉េកាំង រដ្ឋមន្ត្រីក្រសួងការបរទេសអារ៉ាប៊ីសាអូឌីត និងអ៊ីរ៉ង់បានប្រកាសថា ទំនាក់ទំនងការទូតនឹងត្រូវបានស្តារឡើងវិញដោយមានប្រសិទ្ធិភាពចាប់ពីពេលនេះតទៅ។ ប្រទេសអារ៉ាប៊ីសាអូឌីត និងអ៊ីរ៉ង់ពួតដៃគ្នាបង្កើតសន្តិភាព ស្តារឡើងវិញជាជំហានតូចៗមួយ ក៏ប៉ុន្តែនេះក៏ជាជំហានដ៏ធំមួយសម្រាប់មនុស្សជាតិក្នុងការជម្នះជម្លោះ និងសម្រេចបាននូវការផ្សះផ្សាគ្នា។
រដ្ឋមន្ត្រីក្រសួងការបរទេសអារ៉ាប៊ីសាអូឌីត និងអ៊ីរ៉ងបានកោតសរសើរចំពោះការទទួលខុសត្រូវរបស់ប្រទេសចិនដែលជាប្រទេសសំខាន់មួយ ហើយបានថ្លែងអំណរគុណចំពោះប្រទេសចិនដែលបានផ្តល់ការគាំទ្រយ៉ាងរឹងមាំសម្រាប់កិច្ចប្រជុំដ៏សំខាន់រវាងភាគីទាំងពីរ។ ពួកគេបានសម្តែងថា នឹងជំរុញការអនុវត្ត"កិច្ចព្រមព្រៀងទីក្រុងប៉េកាំង" បន្តកែសម្រួលទំនាក់ទំនងទ្វេភាគី និងរួមគ្នារក្សាសន្តិភាព សន្តិសុខ និងស្ថិរភាពក្នុងតំបន់។
ការផ្លាស់ប្តូរនៃពិភពលោក ពេលវេលា និងប្រវត្តិសាស្រ្តកំពុងកើតឡើងតាមរបៀបដែលមិនធ្លាប់កើតមានពីមុនមក។ ប្រទេសចិននៅក្នុងយុគសម័យថ្មីដែលបន្តធ្វើការរួមចំណែកថ្មី នឹងនាំមកនូវឱកាសថ្មី និងកម្លាំងចលករកាន់តែខ្លាំងសម្រាប់ទូទាំងពិភពលោក៕
អ្នកបកប្រែ ៖Shen Yan