លោក Xi Jinping ផ្ញើលិខិតជូនចំពោះលោកស្រី Sheikh Hasina ដើម្បីចូលរួមអបអរសាទរលោកស្រីបានជាប់ឆ្នោតបន្ដកាន់តំណែងជានាយករដ្ឋមន្ត្រីបង់ក្លាដែស
ថ្ងៃទី១១ ខែមករា លោក Xi Jinping ប្រធានរដ្ឋចិនបានផ្ញើលិខិតជូនចំពោះលោកស្រី Sheikh Hasina ដើម្បីចូលរួមអបអរសាទរលោកស្រីដែលបានបន្តជាប់ឆ្នោតជានាយករដ្ឋមន្ត្រីថ្មីនៃប្រទេសបង់ក្លាដែស។
ថ្លែងក្នុងសារលិខិត លោក Xi Jinping បានលើកឡើងថា ចិននិងបង់ក្លាដែសជាប្រទេសជិតខាងមេត្រីភាពប្រពៃណី ។ ក្នុងរយៈពេល៤៩ ឆ្នាំបន្ទាប់ពីការបង្កើតទំនាក់ទំនងការទូត ប្រទេសទាំងពីរបានគោរពគ្នា រាប់អានគ្នាដោយសមភាព ផ្តល់ផលប្រយោជន៍គ្នានិងឈ្នះ-ឈ្នះ។ សង្ឃឹមថាភាគីទាំងពីរនឹងបន្តខិតខំពង្រីកការជឿទុកចិត្តគ្នាខាងនយោបាយឱ្យកាន់តែស៊ីជម្រៅ ផ្សព្វផ្សាយនិងបន្តវេននូវមិត្តភាពដ៏ប្រពៃណី បង្កើនការតភ្ជាប់យុទ្ធសាស្ត្រអភិវឌ្ឍន៍ រួមគ្នាកសាង«ខ្សែក្រវាត់និងផ្លូវ» ដែលប្រកបដោយគុណភាពខ្ពស់ ដើម្បីជម្រុញទំនាក់ទំនងភាពជាដៃគូយុទ្ធសាស្ត្រគ្រប់ជ្រុងជ្រោយរវាងចិននិងបង់ក្លាដែសឡើងដល់កម្រិតថ្មីដោយឥតឈប់ឈរ។
ថ្ងៃដដែល លោក Li Qiang នាយករដ្ឋមន្ត្រីចិនក៏បានផ្ញើសារលិខិតសាទរចំពោះលោកស្រី Sheikh Hasina នាយករដ្ឋមន្ត្រីបង់ក្លាដែសផងដែរ៕