លោក Xi Jinping ប្រធានរដ្ឋចិនផ្ញើសារលិខិតជូនលោក Nangolo Mbumba ប្រធានាធិបតីថ្មីនៃប្រទេសណាមីប៊ី ដើម្បីចូលរំលែកទុក្ខចំពោះមរណភាពរបស់លោក Hage Geingob ប្រធានាធិបតីណាមីប៊ី

កាលពីថ្ងៃទី៥ ខែកុម្ភៈ លោក Xi Jinping ប្រធានរដ្ឋចិនបានផ្ញើសាររំលែកទុក្ខជូនលោក Nangolo Mbumba ប្រធានាធិបតីថ្មីនៃប្រទេសណាមីប៊ីអំពីដំណឹងមរណភាពរបស់លោក Hage Geingob ប្រធានាធិបតីណាមីប៊ី ដោយតាំងនាមឱ្យរដ្ឋាភិបាលនិងប្រជាជនចិនសូមសម្តែងមរណទុក្ខយ៉ាងក្រៀមក្រំ ព្រមនិងសម្តែងការសួរសុខទុក្ខដោយស្មោះស្ម័គ្រចំពោះរដ្ឋាភិបាលនិងប្រជាជនណាមីប៊ី ក៏ដូចជាសាច់ញាតិរបស់លោកប្រធានាធិបតី Geingob ។

លោក Xi Jinping បានចង្អុលបង្ហាញថា លោកប្រធានាធិបតី Geingob គឺជាមេដឹកនាំដ៏ឆ្នើមរបស់ប្រទេសណាមីប៊ី។ លោកបានជំរុញទំនាក់ទំនងភាពជាដៃគូសហប្រតិបត្តិការយុទ្ធសាស្ត្រគ្រប់ជ្រុងជ្រោយចិន-ណាមីប៊ីវិវឌ្ឍនរីកចម្រើនយ៉ាងស៊ីជម្រៅ ដែលបានរួមចំណែកយ៉ាងសំខាន់ក្នុងការពង្រឹងចំណងមិត្តភាពរវាងចិននិងណាមីប៊ី ក៏ដូចជាមិត្តភាពរវាងចិននិងអាហ្វ្រិក។ មរណភាពរបស់លោកគឺជាការខាតបង់ដ៏ធំសម្រាប់ប្រជាជនណាមីប៊ី ហើយប្រជាជនចិនក៏បានបាត់បង់មិត្តល្អមួយរូបផងដែរ។ ប្រទេសចិនថែរក្សាចំណងមិត្តភាពជាប្រពៃណីដ៏ជ្រាលជ្រៅរវាងចិននិងណាមីប៊ី ហើយមានឆន្ទៈរួមជាមួយប្រទេសណាមីប៊ី ដើម្បីជំរុញទំនាក់ទំនងភាពជាដៃគូសហប្រតិបត្តិការយុទ្ធសាស្ត្រគ្រប់ជ្រុងជ្រោយរវាងប្រទេសទាំងពីរទទួលបានការអភិវឌ្ឍជាបន្តបន្ទាប់៕