នៅថៃ្ងទី១៩ ខែកក្កដា លោកស៊ីជីនភីង ប្រធានរដ្ឋចិនបានផ្ញើរសារជូនពរគ្នាទៅវិញទៅមកជាមួយព្រះករុណាព្រះបាទសម្តេចព្រះបរមនាថ នរោត្តមសីហមុនី ព្រះមហាក្សត្រកម្ពុជាដើម្បីអបអរសាទរខួបទី៦០នៃការបង្កើតទំនាក់ទំនងការទូតរវាងប្រទេសទាំងពីរ។
លោកស៊ីជីនភីង បានលើកឡើងក្នុងសារជូនពរថា ៦០ឆ្នាំកន្លងមកនេះ ប្រជាជននៃប្រទេសទាំងពីរបានឆ្លងកាត់ការផ្លាស់ប្តូរពេលវេលានិងសភាពការណ៍អន្តរជាតិនិងជួយគ្នាទៅវិញទៅមក។ប្រទេសទាំងពីរគាំទ្រដល់គ្នាទៅវិញទៅមកនិងផ្តល់ជំនួយឲ្យគ្នាទៅវិញទៅមកជាប់រហូតផ្អែកទៅលើបញ្ហាដែលពាក់ព័ន្ធនឹងផលប្រយោជន៍ជាស្នូលរបស់ភាគីទាំងពីរ ហើយបានបង្កើតចំណងមិត្ដភាពយ៉ាងជ្រាលជ្រៅ។លោកយកចិត្តទុកដាក់ខ្ពស់ចំពោះការអភិវឌ្ឍនៃទំនាក់ទំនងរវាងចិននិងកម្ពុជា លោករំពឹងថា ភាគីទាំងពីរបន្តពួតដៃជាមួយគ្នាដើម្បីកសាងសហគមន៍រួមវាសនាតែមួយនៃមនុស្សជាតិរវាងចិននិងកម្ពុជាដែលប្រកបដោយសារៈសំខាន់ជាយុទ្ធសាស្រ្តដើម្បីសម្រេចបាននូវការអភិវឌ្ឍនិងភាពរុងរឿងថ្កុំថ្កើងរួមគ្នា។
ព្រះករុណាព្រះបាទសម្តេចព្រះបរមនាថ នរោត្តមសីហមុនីបានមានព្រះបន្ទូលក្នុងសារជូនពរថា ប្រទេសកម្ពុជាប្រកាន់ខ្ជាប់យ៉ាងម៉ឺងម៉ាត់នូវគោលនយោបាយមានចិនតែមួយ ប្រទេសចិនគាំទ្រយ៉ាងពេញទំហឹងចំពោះការអភិវឌ្ឍរបស់ប្រទេសកម្ពុជាសមស្របតាមសភាពការណ៍ជាតិរបស់ខ្លួន។ប្រទេសទាំងពីររួមសហការជាមួយគ្នាដើម្បីគាំពារផលប្រយោជន៍រួមរបស់ប្រទេសទាំងពីរ ក៏ដូចជាផ្តល់វិភាគទានដល់សន្តិភាព ស្ថិរភាពនិងភាពរុងរឿងថ្កុំថ្កើងនៅក្នុងតំបន់ព្រមទាំងពិភពលោកផងដែរ។
នៅថ្ងៃដដែល លោក Li Keqiang នាយករដ្ឋមន្រ្តីចិនក៏បានផ្ញើរសារជូនពរគ្នាទៅវិញទៅមកជាមួយសម្តេចហ៊ុនសែន នាយករដ្ឋមន្រ្តីកម្ពុជាផងដែរ។
លោក Li Keqiang បានថែ្លងក្នុងសារជូនពរថា លោកមានឆន្ទៈក្នុងការខិតខំប្រឹងប្រែងជាមួយសម្តេចហ៊ុនសែន ដើម្បីពង្រឹងបន្ថែមទៀតនូវទំនាក់ទំនងមិត្តភាពជាប្រពៃណីរវាងចិននិងកម្ពុជា ធ្វើឲ្យស៊ីជម្រៅនូវកិច្ចសហប្រតិបត្តិការជាក់ស្តែង ក្នុងន័យជំរុញទំនាក់ទំនងភាពជាដៃគូកិច្ចសហប្រតិបត្តិការយុទ្ធសាស្ត្រគ្រប់ជ្រុងជ្រោយរវាងប្រទេសទាំងពីរឲ្យឈានដល់កម្រិតថ្មី។
សម្តេចហ៊ុនសែន បានថែ្លងក្នុងសារជូនពរថា ជឿជាក់ថា សកម្មភាពរំលឹកខួបទី៦០នៃការបង្កើតទំនាក់ទំនងការទូតរវាងកម្ពុជានិងចិន នឹងពង្រឹងចំណងមិត្តភាពជាបងប្អូននៃប្រទេសទាំងពីរព្រមទាំងធ្វើឲ្យស៊ីជម្រៅនូវកិច្ចសហប្រតិបត្តិការយុទ្ធសាស្ត្រគ្រប់ជ្រុងជ្រោយរវាងប្រទេសទាំងពីរទៀតផង៕