ថ្ងៃទី ៣០ ខែកក្កដានៅក្នុងសន្និសីទសារព័ត៌មានជាប្រចាំ លោកGengshuang អ្នកនាំពាក្យក្រសួងការបរទេសចិនបានថ្លែងក្នុងពេលឆ្លើយសំនួរស្តីពីការបោះឆ្នោតរដ្ឋសភាអាណត្តិទី៦ នៃប្រទេសកម្ពុជាថា ភាគីចិនអបអរសាទរចំពោះដំណើរការដោយរលូននូការបោះឆ្នោតនៅកម្ពុជា រីករាយជំរុញទំនាក់ទំនងចិននិងកម្ពុជាបោះជំហានទៅមុខឥតឈប់ឈរ ។
លោកGengshuang ថ្លែងថា ក្នុងនាមជាអ្នកជិតខាងល្អនិងមិត្តភក្តិល្អ យើងសូមអបអរអស់ពីដួងចិត្តចំពោះដំណើរការដោយរលូននៃការបោះឆ្នោតនៅកម្ពុជា គណបក្សប្រជាជនកម្ពុជាបានឈ្នះការបោះឆ្នោតក្រោមការដឹកនាំរបស់សម្តេចហ៊ុនសែន ដែលជាប្រធានគណបក្សប្រជាជនកម្ពុជា ។ ជូនពរប្រជាជនកម្ពុជាទទួលបានសមិទ្ធផលកាន់តែធំថ្មីក្នុងកិច្ចការកសាងប្រទេសជាតិនៅក្រោមការដឹកនាំរបស់រដ្ឋសភានិងរាជរដ្ឋាភិបាលអាណត្តិថ្មីដែលជិតនឹងបង្កើតឡើង ។
លោកGengshuangចង្អុលបង្ហាញថា ប៉ុន្មានឆ្នាំកន្លងទៅ ទំនាក់ទំនងភាពជាដៃគូសហប្រតិបត្តិការយុទ្ធសាស្ត្រដោយគ្រប់ជ្រុងជ្រោយរវាងចិននិងកម្ពុជាបានរក្សានិន្នាការអភិវឌ្ឍដ៏ល្អប្រសើរ ។ ថ្នាក់ដឹកនាំប្រទេសទាំងពីរបានទាក់ទងគ្នាជាញឹកញាប់ កិច្ចសហប្រតិបត្តិការដ៏មានផលប្រយោជន៍ដល់គ្នាទៅវិញទៅមកលើគ្រប់វិស័យមានភាពកាន់តែស៊ីជម្រៅ បាននាំមកផលប្រយោជន៍ពិតប្រាកដដល់ប្រទេសទាំងពីរនិងប្រជាជននៃប្រទេសទាំងពីរ ហើយក៏បានរួមចំណែកជាវិជ្ជមានដល់សន្តិភាព ស្ថិរភាព ការអភិវឌ្ឍនិងភាពរុងរឿងនៃតំបន់ផងដែរ ។ ភាគីចិនរីករាយរួមជាមួយភាគីកម្ពុជា អនុវត្តឲ្យបានល្អនូវមតិឯកភាពគ្នាដ៏សំខាន់ដែលថ្នាក់ដឹកនាំប្រទេសទាំងពីរបានឈានដល់ ពួតដៃគ្នាកខាងសហគមន៍រួមវាសនាតែមួយដ៏មានអត្ថន័យយុទ្ធសាស្ត្រ ដើម្បីជំរុញទំនាក់ទំនងរវាងចិននិងកម្ពុជាបោះជំហានទៅមុខឥតឈប់ឈរ ៕
អ្នកបកប្រែ：Xu Xiaoxia