លោកលីខឺឈាងនាយករដ្ឋមន្រ្តីចិនអញ្ជើញចូលរួមកិច្ចប្រជុំកំពូលអាស៊ីបូព៌ាលើកទី១៣
នាល្ងាចថ្ងៃទី១៥ខែវិច្ឆិកា លោកលីខឺឈាងនាយករដ្ឋមន្រ្តីចិនបានអញ្ជើញចូលរួមកិច្ចប្រជុំកំពូលអាស៊ីបូព៌ាលើកទី១៣នៅមជ្ឈមណ្ឌលពិព័រណ៍សិង្ហបុរី និងក្រោមវត្តមានរបស់ថ្នាក់ដឹកនាំនៃបណ្តាប្រទេសអាស៊ាននានា លោកភូទីនប្រធានាធិបតីរុស្ស៊ី លោកមូន ចេអ៊ីនប្រធានាធិបតីកូរ៉េខាងត្បូង លោកស៊ីនហ្សូ អាបេ នាយករដ្ឋមន្ត្រីជប៉ុនលោកម៉ូឌីនាយករដ្ឋមន្ត្រីឥណ្ឌា លោកម៉ូរីសិននាយករដ្ឋមន្រ្តីអូស្ត្រាលីនិងលោកផឹសអនុប្រធានាធិបតីអាមេរិកជាដើម។ លោកលី សៀនឡុងនាយករដ្ឋមន្រ្តីសិង្ហបុរីធ្វើជាអធិបតីនៃកិច្ចប្រជុំ។
លោកលីខឺឈាងបានថ្លែងថា តាំងពីកិច្ចប្រជុំកំពូលអាស៊ីបូព៌ាបង្កើតឡើងអស់រយៈពេល១៣ឆ្នាំមក បានក្លាយទៅជាវេទិកាដ៏សំខាន់មួយសម្រាប់ជំរុញកិច្ចសន្ទនានិងកិច្ចសហប្រតិបត្តិការក្នុងតំបន់អាស៊ីបូព៌ា ដែលបានដើរតួនាទីយ៉ាងសំខាន់សម្រាប់ការបង្កើនការយោគយល់និងកសាងទំនុកចិត្តទៅវិញទៅមករវាងគ្រប់ភាគី គាំពារសន្តិភាពនិងស្ថិរភាពក្នុងតំបន់ ក៏ដូចជាជំរុញវឌ្ឍនភាពនិងភាពរុងរឿងក្នុងតំបន់ផងដែរ។ បច្ចុប្បន្ននេះ កត្តាមិនប្រាកដប្រជានៃស្ថានការណ៍អន្តរជាតិបាននិងកំពុងកើនឡើង ដូច្នេះ យើងត្រូវតែបន្តប្រកាន់ខ្ជាប់ទស្សនៈរួមរស់នៅដោយសុខដុមរមនា ធ្វើកិច្ចសហប្រតិបត្តិការនិងឈ្នះ-ឈ្នះ ពង្រឹងការពិភាក្សាដោយសមភាព ជំរុញការបើកទូលាយទៅវិញទៅមក ដើម្បីគាំពារសន្តិភាព ស្ថិរភាពនិងវឌ្ឍនភាពនៃតំបន់អាស៊ីបូព៌ា។
លោកលីខឺឈាងបានលើកសំណើ៥ចំណុចអំពីកិច្ចសហប្រតិបត្តិការនៃអាស៊ីបូព៌ាដូចតទៅ៖
ទី១ ប្រកាន់ខ្ជាប់ពហុភាគីនិយម។
ទី២ គាំពារពាណិជ្ជកម្មសេរី។
ទី៣ ពន្លឿនដំណើរនៃការធ្វើសមាហរណកម្មសេដ្ឋកិច្ចក្នុងតំបន់។
ទី៤ ជំរុញកិច្ចសហប្រតិបត្តិការខាងការអភិវឌ្ឍជានិរន្តរភាពក្នុងតំបន់។
ទី៥ ធ្វើកិច្ចសហប្រតិបត្តិការខាងសន្តិសុខនយោបាយ៕
អ្នកបកប្រែ：Zhai Qianqian
អ្នកនិពន្ធ៖ លីហ្សា