កាលពីយប់ថ្ងៃទី ១ ខែធ្នូ តាមម៉ោងនៅក្នុងតំបន់ តបតាមសេចក្តីអញ្ជើញ លោក ស៊ីជីនភីង ប្រធានរដ្ឋចិនបានជួបពិភាក្សាការងារជាមួយលោកត្រាំ ប្រធានាធិបតីអាមេរិកនៅក្រុងប៊ុយណូស៊ែ ហើយបានឈានដល់មតិឯកច្ឆន្ទគ្នាដ៏សំខាន់មួយ។នៅក្នុងបទសម្ភាសន៍ជាមួយអ្នកយកព័ត៌មាន ឥស្សរជននៃមជ្ឈដ្ឋានធុរកិច្ចនិងធនាគារគំនិតរបស់អឺរ៉ុបបានវាយតម្លៃជាវិជ្ជមានពីលទ្ធផលនៃកិច្ចជំនួបរវាងប្រមុខរដ្ឋចិននិងអាមេរិក ហើយជឿថា ប្រទេសចិននិងសហរដ្ឋអាមេរិកបានឈានដល់មតិឯកច្ឆន្ទគ្នាមួយលើបញ្ហាសេដ្ឋកិច្ចនិងពាណិជ្ជកម្មដែលជាសញ្ញាវិជ្ជមានដល់ពិភពលោកដែលនឹងផ្តល់អត្ថប្រយោជន៍ដល់ការអភិវឌ្ឍនៃសេដ្ឋកិច្ចអឺរ៉ុបផងដែរ។
លោក Bernard Dewit ប្រធានគណៈកម្មាធិការសេដ្ឋកិច្ចនិងពាណិជ្ជកម្មរវាងបែលហ្ស៊ិកនិងចិនបានថែ្លងថា លោក ស៊ីជីនភីង ប្រធានរដ្ឋចិននិងលោកត្រាំ ប្រធានាធិបតីអាមេរិកបានឈានដល់មតិឯកច្ឆន្ទគ្នាមួយក្នុងអំឡុងពេលសន្និសីទកំពូលក្រុមប្រទេស G20 ដែលជាដំណឹងល្អសម្រាប់ប្រទេសចិននិងសហរដ្ឋអាមេរិកព្រមទាំងពិភពលោក ហើយក៏នឹងផ្តល់ផលប្រយោជន៍ផងដែរសម្រាប់ការអភិវឌ្ឍរយៈពេលវែងនៃសេដ្ឋកិច្ចអឺរ៉ុប។
លោក Axel Goethals នាយកប្រតិបត្តិទីមួយនៃវិទ្យាស្ថានសិក្សាស្រាវជ្រាវកិច្ចការអាស៊ីអឺរ៉ុបជឿជាក់ថា ទំនាក់ទំនងដ៏ល្អប្រសើររវាងប្រទេសចិននិងសហរដ្ឋអាមេរិកនឹងនាំមកនូវភាពប្រាកដប្រជាកាន់តែច្រើនចំពោះសេដ្ឋកិច្ចពិភពលោក។នៅក្នុងដំណើរការ អឺរ៉ុបក៏ជាអ្នកទទួលផលផងដែរ ពីព្រោះអឺរ៉ុបនិងចិនមានផលប្រយោជន៍រួមកាន់តែច្រើន៕
អ្នកបកប្រែ：Wei Wei