កាលពីថ្ងៃទី១ខែធ្នូ លោកប្រធានរដ្ឋចិនស៊ីជីនភីងនិងលោកត្រាំប្រធានាធិបតីសហរដ្ឋអាមេរិកបានជួបពិភាក្សាការងារនៅប្រទេសអាហ្សង់ទីន ។ តាមដំណឹងដែលផ្សាយបន្ទាប់ពីជំនួបពិភាក្សាការងារនេះឲ្យដឹងថា ភាគីទាំងពីរសម្រេចបញ្ឈប់វិធានការដាក់កំហិតផ្នែកពាណិជ្ជកម្មដូចជាដំឡើងពន្ធគយជាដើម ។ ភាគីទាំងពីរនឹងប្រើរយៈពេល៩០ថ្ងៃធ្វើការពិគ្រោះពិភាក្សា ដើម្បីសម្រេចកិច្ចព្រមព្រៀងលុបចោលពន្ធគយដែលបានបន្ថែមលើគ្នាទៅវិញទៅមកនៅឆ្នាំ២០១៨នេះ ។ បើបរាជ័យ នោះ ភាគីអាមេរិកទំនងជានឹងបន្តបង្កើនសង្គ្រាមពាណិជ្ជកម្ម ។
តើត្រូវតែមើលលទ្ធផលនៃជំនួបពិភាក្សាការងារនេះយ៉ាងដូចម្តេច? មុនដំបូង គឺជំនួបពិភាក្សាការងាររវាងមេដឹកនាំចិននិងសហរដ្ឋអាមេរិកធ្វើឲ្យសង្គ្រាមពាណិជ្ជកម្មរវាងចិននិងអាមេរិកចូលក្នុងសភាពការណ៍បញ្ឈប់សង្គ្រាម ដោយក្នុងនោះ មានការណែនាំនិងលំហដល់ភាគីទាំងពីរសម្រាប់ពិគ្រោះពិភាក្សាដើម្បីដោះស្រាយបញ្ហា វាគឺមានអត្ថន័យវិជ្ជមានដែលមិនអាចប្រកែកបាន ។ ព្រមពេលជាមួយនេះ ក៏មានន័យថា ក្នុងរយៈពេលបីខែខាងមុខនេះ ក្រុមសេដ្ឋកិច្ចនិងពាណិជ្ជកម្មរបស់ភាគីទាំងពីរនឹងប្រកួតប្រជែងគ្នាវគ្គថ្មីមួយទៀត ហើយដំណើរនេះមុខជាស្មុគស្មាញនិងពិបាកណាស់ ។
ហេតុអ្វីបានជាប្រទេសចិននិងអាមេរិកអាចបញ្ឈប់សង្រ្គាមពាណិជ្ជកម្មនោះ?មូលហេតុសំខាន់គឺដោយសារសង្រ្គាមពាណិជ្ជកម្មរយៈពេលជាង៨ខែនោះធ្វើឲ្យភាគីទាំងពីរសុទ្ធតែបង់ថ្លៃ។នៅពេលចាប់ផ្តើមនៃជម្លោះពាណិជ្ជកម្មរវាងចិននិងអាមេរិកកាលពីខែមីនាឆ្នាំនេះ អាមេរិកយល់ឃើញថា សង្រ្គាមពាណិជ្ជកម្មអាចឈ្នះដោយងាយស្រួល។តែការពិតបញ្ជាក់ឲ្យឃើញថា សង្រ្គាមពាណិជ្ជកម្មគ្មានអ្នកឈ្នះទេ មានតែទទួលបរាជ័យទាំងអស់។តាមតួលេខស្ថិតិបង្ហាញឲ្យឃើញថា ឱនភាពពាណិជ្ជកម្មទំនិញរបស់អាមេរិកនៅខែតុលាបានឡើងដល់៧ម៉ឺន៧ពាន់២រយលានដុល្លាអាមេរិក បានបង្កើតឯតទគ្គកម្មខ្ពស់ថ្មី ក្រុមហ៊ុន： General Motorsបានប្រកាសបិទរោងចក្រចំនួន៧លើពិភពលោកនៅចុងខែវិច្ឆិកា ដែលបានធ្វើឲ្យរដ្ឋាភិបាលអាមេរិកមានសម្ពាធហើយអស់សង្ឃឹមណាស់។ជាការច្បាស់លាស់ណាស់ថា សង្រ្គាមពាណិជ្ជកម្មមិនបានជួយអាមេរិកសម្រេចគោលដៅក្នុងការកាត់បន្ថយឱនភាពជាដើមទេ ផ្ទុយទៅវិញបានបង្កើនហានិភ័យនៃសេដ្ឋកិច្ចអាមេរិកថែមទៀត។លោកត្រាំប្រធានាធិបតីអាមេរិកបានថ្លែងពេលទទួលបទសម្ភាសន៍ពីក្រុមហ៊ុន Columbia Broadcasting System (CBS)អាមេរិកកាលពីថ្ងៃទី១៤ខែតុលាថា អ្វីដែលបានកើតរវាងចិននិងអាមេរិកមិនមែនជាសង្រ្គាមពាណិជ្ជកម្មនេះទេ គ្រាន់តែជាការវិវាទតូច ហើយបន្តថា លោកកំពុងគិតពិចារណាធ្វើវិវាទតូចនេះចុះត្រជាក់វិញ។
សព្វថ្ងៃនេះ ប្រមុខរដ្ឋនៃប្រទេសទាំងពីរចិននិងអាមេរិកបានចុចប៊ូតុងផ្អាកសម្រាប់ជម្លោះពាណិជ្ជកម្ម នេះជាជម្រើសដ៏ត្រឹមត្រូវសម្រាប់ភាគីទាំងពីរ បើពុំនោះសោធ ចិននិងអាមេរិកនឹងចាប់ផ្តើមសង្គ្រាមពាណិជ្ជកម្មវគ្គថ្មី ដែលនឹងនាំមកនូវភាពមិនប្រាកដប្រជាកាន់តែធ្ងន់ធ្ងរដល់ប្រទេសទាំងពីរនិងពិភពលោក ។ ដូច្នេះ ក្នុងរយៈពេល ៣ ខែខាងមុខនេះ ជាដំណាក់កាលសំខាន់សម្រាប់ប្រទេសចិននិងអាមេរិក ។
វាពិតជាពេលវេលាដ៏តឹងតែងនិងទទួលបន្ទុកភារកិច្ចធ្ងន់សម្រាប់ការពិភាក្សាគ្នារវាងចិននិងអាមេរិកក្នុងរយៈពេល ៣ ខែខាងមុខ ។ ជុំវិញបញ្ហាមួយចំនួនដែលលើកឡើងដោយអាមេរិក ក្នុងនោះរួមទាំងការកាពារកម្មសិទ្ធិបញ្ញា កិច្ចសហប្រតិបត្តិការផ្នែកបច្ចេកទេស និងការអនុញ្ញាតឲ្យចូលទីផ្សារជាដើម ប្រទេសចិនបានឆ្លើយតបថា បញ្ហាដែលសមស្របនឹងទិសដៅនៃការបើកទូលាយនិងកំណែទម្រង់ចិន គឺជាបញ្ហាសំខាន់ៗមួយចំនួនសម្រាប់ការពិភាក្សាគ្នាក្នុងរយៈពេល ៣ ខែខាងមុខ ។ ពិចារណាលើភាពខ្វែងគំនិតគ្នាក្នុងក្រុមសេដ្ឋកិច្ចអាមេរិក បរិយាកាសនយោបាយដ៏ស្មុគស្មាញនៅអាមេរិកនិងភាពមិនគោរពពាក្យសន្យារបស់អាមេរិកកាលពីមុន កត្តាទាំងនេះអាចបញ្ជាក់ថា ដំណើរនៃការពិភាក្សាគ្នាក្នុងរយៈពេល ៣ ខែខាងមុខនឹងធ្វើឡើងប្រកបដោយភាពស្មុគស្មាញនិងឧបសគ្គជាច្រើន រហូតដល់មានករណីមិនអាចធ្វើតាមពាក្យសន្យាម្តងទៀត ។
ក្នុងរយៈពេល ៣ ខែខាងមុខនេះ ប្រទេសចិននឹងបន្តធ្វើការការពារផលប្រយោជន៍រួមនៃប្រទេសទាំងពីរនិងលំដាប់ពាណិជ្ជកម្មពិភពលោក ហើយព្យាយាមឲ្យអស់ពីសមត្ថភាពដើម្បីទាក់ទងជាមួយសហរដ្ឋអាមេរិកនិងឆ្ពោះទៅរកគោលដៅសម្រាប់លុបបំបាត់ពន្ធគយ។ដោយសារតែប្រទេសចិនកាន់តែមានភាពចាស់ទុំបន្ទាប់ពីជម្លោះពាណិជ្ជកម្មអស់រយៈពេលជាង ៨ ខែជាមួយសហរដ្ឋអាមេរិក ហើយកាន់តែយល់ច្បាស់លាស់ថា "គន្លឹះក្នុងការទប់ទល់នឹងជម្លោះពាណិជ្ជកម្ម គឺធ្វើឲ្យបានល្អនូវរឿងផ្ទាល់ខ្លួន"។ឥឡូវនេះ ប្រទេសចិនកំពុងអបអរសាទរខួបទី ៤០ នៃកំណែទម្រង់និងបើកទូលាយ។នេះគឺជាការរំលឹកពីអតីតកាល ហើយក៏ជាចំណុចចាប់ផ្តើមរថ្មីមួយសម្រាប់ការលើកកម្ពស់កម្រិតកាន់តែខ្ពស់នៃការបើកទូលាយផងដែរ។នៅក្នុងដំណើរការនេះ ប្រទេសចិននិងអាមេរិកអាចប្រកាន់ខ្ជាប់នូវសមភាពនិងផ្តល់ផលប្រយោជន៍ឲ្យគ្នាទៅវិញទៅមកនិងការគោរពគ្នាទៅវិញទៅមក ក៏ដូចជាការពិគ្រោះពិភាក្សាដោយស្មោះត្រង់និងដោះស្រាយការខ្វែងគំនិតគ្នាឲ្យបានសមរម្យ ជឿជាក់ថា នឹងអាចដោះស្រាយបញ្ហាសេដ្ឋកិច្ចនិងពាណិជ្ជកម្មរបស់ខ្លួននិងទទួលបានភាពឈ្នះ-ឈ្នះទាំងអស់គ្នា៕
អ្នកបកប្រែ：Sun Lingling