ប្រទេសចិនធ្វើពិធីអបអរសាទរយ៉ាងឱឡារិកដើម្បីរំលឹកខួបទី៤០នៃការអនុវត្តកំណែទម្រង់និងការបើកទូលាយរបស់ប្រទេសចិន
ព្រឹកថ្ងៃទី ១៨ ខែធ្នូ មហាសនិ្នបាតអបអរសាទរខួបទី ៤០នៃការអនុវត្តគោលនយោបាយកំណែទម្រង់និងបើកទូលាយបានប្រារព្ធធ្វើនៅក្រុងប៉េកាំង ។ ក្រោមអធិបតីភាពរបស់លោក ស៊ីជីនភីង អគ្គលេខាធិការនៃគណៈកម្មាធិការមជ្ឈិមបក្សកុម្មុយនិស្តចិន ប្រធានរដ្ឋចិន និងជាប្រធានគណៈកម្មាធិការយោធាមជ្ឈិមចិន ព្រមទាំងមានការថ្លែងសុន្ទរកថាគន្លឹះរបស់លោកផងដែរ ។
គួរបញ្ជាក់ថា នៅថ្ងៃទី ១៨ ខែធ្នូឆ្នាំ ១៩៧៨ មជ្ឈិមបក្សកុម្មុយនិស្តចិនបានបើកធ្វើសនិ្នសីទពេញអង្គលើកទី៣នៃគណៈកម្មាធិការមជ្ឈិមបក្សកុម្មុយនិស្តចិនអាណតិ្តទី ១១ ។ សនិ្នសីទលើកនេះបានធ្វើសេចក្តីសម្រេចចិត្តជាលក្ខណៈប្រវតិ្តសាស្ត្រស្តីពីការចាត់ទុកកិច្ចកសាងសេដ្ឋកិច្ចជាការងារសំខាន់ និងអនុវត្តគោលនយោបាយកំណែទម្រង់និងបើកទូលាយ ។ ៤០ ឆ្នាំកន្លងមក កម្លាំងជាក់ស្តែងរបស់ប្រទេសចិនបានសម្រេចការវិវឌ្ឍរីកចម្រើនដោយលោតភ្លោះ កំណើននៃផលិតផលក្នុងស្រុកសរុបគិតជាមធ្យមក្នុងមួយឆ្នាំៗ គឺ ៩,៥ភាគរយ ប្រាក់ចំណូលដែលអាចប្រើប្រាស់បានរបស់ប្រជាពលរដ្ឋគិតជាមធ្យមក្នុងមនុស្សម្នាក់ៗបានកើនឡើង២២,៨ដង ប្រជាជនក្រីក្រត្រូវបានកាត់បន្ថយចំនួន៧៤០លាននាក់ ហើយអត្រារួមចំណែកក្នុងកំណើនសេដ្ឋកិច្ចពិភពលោកគឺលើសពី៣០ភាគរយជាប់ៗគ្នាជាច្រើនឆ្នាំ ។
៤០ឆ្នាំកន្លងមក ប្រទេសចិនបានធ្វើពាណិជ្ជកម្មនិងធ្វើការអភិវឌ្ឍប្រកបដោយភាពបើកទូលាយ ទំហំទំនិញនាំចេញនាំចូលបានកើនឡើង១៩៨ដង ទំហំពាណិជ្ជកម្មនិងសេវាកម្មនាំចេញនាំចូលបានកើនឡើងលើសពី១៤៧ដង និងបានកៀរគរបានប្រាក់ទុនបរទេសសរុបជាង២ទ្រីលានដុល្លារអាមេរិក ។ ប្រទេសចិនបានក្លាយជាអង្គភាពសេដ្ឋកិច្ចធំទីពីរ ប្រទេសឧស្សាហកម្មធំទីមួយ ប្រទេសពាណិជ្ជកម្មទំនិញធំទីមួយ និងជាប្រទេសមានរូបិយប័ណ្ណបម្រុងច្រើនជាងគេនៅលើពិភពលោក ៕
អ្នកបកប្រែ：Guo Xiangqing