លោក ស៊ី ជីនភីង ប្រធានរដ្ឋចិនជួបពិភាក្សាការងារជាមួយលោក គីម ជុងអ៊ុន ប្រមុខដឹកនាំកំពូលរបស់កូរ៉េខាងជើង
ថ្ងៃទី ៨ ខែមករា លោក ស៊ី ជីនភីង អគ្គលេខាធិការនៃគណៈកម្មាធិការមជ្ឈិមបក្សកុម្មុយនិស្តចិន និងជាប្រធានរដ្ឋចិន បានជួបពិភាក្សាការងារជាមួយលោក គីម ជុងអ៊ុន ប្រធានគណៈកម្មាធិការបក្សពលករកូរ៉េខាងជើង និងជាប្រធានគណៈកម្មាធិការក្រុមប្រឹក្សាកិច្ចការរដ្ឋកូរ៉េខាងជើងដែលបានធ្វើដំណើរទៅដល់ក្រុងប៉េកាំងនៅថ្ងៃដដែលដើម្បីបំពេញទស្សនកិច្ចនៅប្រទេសចិន ។ ក្នុងកិច្ចជំនួប ប្រមុខរដ្ឋប្រទេសទាំងពីរបានផ្លាស់ប្តូរមតិយោបល់យ៉ាងស៊ីជម្រៅអំពីទំនាក់ទំនងរវាងចិននិងកូរ៉េខាងជើងនិងបញ្ហាយកចិត្តទុកដាក់ដូចគ្នា ព្រមទាំងបានឈានដល់គំនិតឯកភាពគ្នាសំខាន់ៗផងដែរ ។ ភាគីទាំងពីរបានឯកភាពគ្នាក្នុងការធ្វើការខិតខំប្រឹងប្រែងជាមួយគ្នា ក្នុងន័យជំរុញទំនាក់ទំនងរវាងចិននិងកូរ៉េខាងជើងឲ្យទទួលបានការអភិវឌ្ឍថ្មីឥតឈប់ឈរក្នុងយុគសម័យថ្មី បន្តជំរុញដំណើរដោះស្រាយបញ្ហាឧបទ្វីបកូរ៉េតាមរយៈវិធីនយោបាយ ដើម្បីផ្តល់សុខសុភមង្គលនិងផលប្រយោជន៍ជូនដល់ប្រជាជននៃប្រទេសទាំងពីរ ក៏ដូចជារួមចំណែកយ៉ាងសកម្មក្នុងការរក្សាសនិ្តភាព ស្ថិរភាព វិបុលភាពនិងវឌ្ឍនភាពក្នុងតំបន់និងពិភពលោកផងដែរ ។
ថ្លែងក្នុងកិច្ចជំនួប លោក ស៊ី ជីនភីង បានគូសបញ្ជាក់ថា ប្រទេសចិនគាំទ្រយ៉ាងមុតមាំចំពោះលោកប្រធានគណៈកម្មាធិការក្នុងការដឹកនាំបក្សពលករ និងប្រជាជននៃប្រទេសកូរ៉េខាងជើងក្នុងការអនុវត្តយុទ្ធសាស្ត្រថ្មី ហើយជឿជាក់ថា ប្រជាជនកូរ៉េខាងជើងពិតជានឹងទទួលបានសមិទ្ធផលកាន់តែធំធេងឥតឈប់ឈរក្នុងបុព្វហេតុកសាងសង្គមនិយមជាមិនខាន ។
ជាការឆ្លើយតប លោក គីម ជុងអ៊ុន បានថ្លែងថា ប្រទេសកូរ៉េខាងជើងសង្កេតឃើញថា បទពិសោធនៃការអភិវឌ្ឍន៍របស់ប្រទេសចិនមានតម្លៃណាស់ រំពឹងថានឹងមានឱកាសកាន់តែច្រើនមកប្រទេសចិនដើម្បីធ្វើការសិក្សានិងផ្លាស់ប្តូរបទពិសោធគ្នា ៕
អ្នកបកប្រែ：Guo Xiangqing