លោក ស៊ីជីនភីង ប្រធានរដ្ឋចិនជួបពិភាក្សាការងារជាមួយលោក Emmanuel Macron ប្រធានាធិបតីបារាំង
លោក ស៊ីជីនភីង ប្រធានរដ្ឋចិនបានជួបពិភាក្សាការងារជាមួយលោក Emmanuel Macron ប្រធានាធិបតីបារាំងនៅទីក្រុងប៉ារីសកាលពីថ្ងៃទី ២៥ ខែមីនា។ប្រមុខរដ្ឋនៃប្រទេសទាំងពីរបានព្រមព្រៀងគ្នាបង្កើតទំនាក់ទំនងភាពជាដៃគូយុទ្ធសាស្រ្តគ្រប់ជ្រុងជ្រោយដែលប្រកបដោយភាពរឹងមាំ ស្ថិរភាពនិងភាពរស់រវើករវាងចិននិងបារាំងនៅឯចំណុចចាប់ផ្តើមជាប្រវត្តិសាស្ត្រថ្មីមួយ។
ថែ្លងក្នុងកិច្ចជំនួប លោក ស៊ីជីនភីង បានចង្អុលបង្ហាញថា ឆ្នាំនេះមិនត្រឹមតែជាខួបទី ៥៥ នៃការបង្កើតទំនាក់ទំនងការទូតរវាងចិននិងបារាំងប៉ុណ្ណោះទេ ថែមទាំងជាខួបទី ៧០ នៃការបង្កើតសាធារណរដ្ឋប្រជាមានិតចិនផងដែរ។ភាគីចិនសូមកោតសរសើរចំពោះឆន្ទៈរបស់លោកប្រធានាធិបតីបារាំងក្នុងការធ្វើកិច្ចសហប្រតិបត្តិការជាក់ស្តែងស្តីពីគំនិតផ្តួចផ្តើម"ខ្សែក្រវាត់មួយនិងផ្លូវមួយ"ជាមួយប្រទេសចិន ហើយភាគីទាំងពីរគួរតែអនុវត្តឲ្យបានល្អនូវគម្រោងគំរូកិច្ចសហប្រតិបត្តិការក្នុងទីផ្សារភាគីទីបីក្រោមក្របខ័ណ្ឌស្តីពីគំនិតផ្តួចផ្តើម"ខ្សែក្រវាត់មួយនិងផ្លូវមួយ"។ប្រទេសចិនទើបតែអនុម័ត<ច្បាប់វិនិយោគសម្រាប់ពាណិជ្ជករបរទេស>ដែលនឹងបន្តបង្កើតបរិយាកាសធុរកិច្ច ក៏ដូចជាបង្កើនការការពារកម្មសិទ្ធិបញ្ញាដើម្បីបង្កើតកម្រិតថ្មីចំពោះការបើកទូលាយសម្រាប់អន្តរជាតិ។
ជាការឆ្លើយតប លោក Emmanuel បានថែ្លងថា ប្រទេសបារាំងអបអរសាទរសមិទ្ធផលដ៏ធំធេងក្នុងរយៈពេល ៧០ ឆ្នាំបន្ទាប់ពីការបង្កើតសាធារណរដ្ឋប្រជាមានិតចិន ហើយមានឆន្ទៈរួមសហការជាមួយប្រទេសចិនដើម្បីកសាងពិភពលោកមួយប្រកបដោយតុល្យភាព ស្ថិរភាព សុវត្ថិភាពនិងវិបុលភាព។បារាំងមានឆន្ទៈក្នុងការបង្កើនកិច្ចសហប្រតិបត្តិការក្នុងវិស័យ ដូចជាអាកាសចរណ៍ អវកាស ថាមពលនុយគ្លេអ៊ែរជាដើម ជាមួយប្រទេសចិន ហើយតភ្ជាប់រវាង"ផែនការឧស្សាហកម្មនាពេលអនាគត"នៃប្រទេសបារាំងជាមួយនឹង"ផែនការផលិតកម្មក្នុងឆ្នាំ ២០២៥ នៃប្រទេសចិន"។ប្រទេសបារាំងមានឆន្ទៈជំរុញយ៉ាងសកម្មក្នុងការអភិវឌ្ឍទំនាក់ទំនងកិច្ចសហប្រតិបត្តិការរវាងសហភាពអឺរ៉ុបនិងចិនឲ្យឈានទៅមុខឥតឈប់ឈរនិងគាំទ្រដល់ការតភ្ជាប់រវាងយុទ្ធសាស្រ្តទំនាក់ទំនងគ្នានៃសហភាពអឺរ៉ុបជាមួយនឹងគំនិតផ្តួចផ្តើម"ខ្សែក្រវាត់មួយនិងផ្លូវមួយ"៕
អ្នកបកប្រែ：Wei Wei