លោក ស៊ីជីនភីង ប្រធានរដ្ឋចិនជួបពិភាក្សាការងារជាមួយលោក Min Aung Hlaing អគ្គមេបញ្ជាការនៃកងទ័ពការពារជាតិមីយ៉ាន់ម៉ា
កាលពីថ្ងៃទី ១០ខែមេសា នៅក្រុងប៉េកាំង លោក ស៊ីជីនភីង ប្រធានរដ្ឋចិនបានជួបពិភាក្សាការងារជាមួយលោក Min Aung Hlaing អគ្គមេបញ្ជាការនៃកងទ័ពការពារជាតិមីយ៉ាន់ម៉ាដែលកំពុងបំពេញទស្សនកិច្ចនៅប្រទេសចិន។លោក ស៊ីជីនភីង បានថែ្លងថា ប្រទេសចិនគាំទ្រដល់ដំណើរការសន្តិភាពនៅក្នុងប្រទេសមីយ៉ាន់ម៉ា ហើយមានឆន្ទៈក្នុងការបង្កើនទំនាក់ទំនងជាយុទ្ធសាស្ត្រជាមួយមីយ៉ាន់ម៉ានិងធ្វើឲ្យស៊ីជម្រៅនូវកិច្ចសហប្រតិបត្តិការដែលផ្តល់ផលប្រយោជន៍ដល់គ្នាទៅវិញទៅមកដើម្បីរួមគ្នារួមចំណែកដល់ស្ថិរភាពនិងវិបុលភាពក្នុងតំបន់។
ថែ្លងក្នុងកិច្ចជំនួប លោក ស៊ីជីនភីង បានលើកឡើងថា ទំនាក់ទំនងរវាងចិននិងមីយ៉ាន់ម៉ាជាទូទៅកំពុងអភិវឌ្ឍក្នុងទិសដៅល្អនិងទទួលបានការរីកចម្រើនថ្មីក្នុងការកសាងកិច្ចសហប្រតិបត្តិការគំនិតផ្តួចផ្តើម"ខ្សែក្រវាត់មួយនិងផ្លូវមួយ"។កងកម្លាំងយោធារវាងចិននិងមីយ៉ាន់ម៉ាគួរតែធ្វើឲ្យស៊ីជម្រៅនូវការផ្លាស់ប្តូរនិងកិច្ចសហប្រតិបត្តិការជាក់ស្តែង។
ជាការឆ្លើយតប លោក Min Aung Hlaing បានថ្លែងថា មីយ៉ាន់ម៉ាសូមថែ្លងអំណរគុណដល់ប្រទេសចិនចំពោះការគាំទ្រដល់ដំណើរការសន្តិភាពនៅក្នុងមីយ៉ាន់ម៉ា ហើយមីយ៉ាន់ម៉ាសូមស្វាគមន៍ គាំទ្រ និងមានឆន្ទៈចូលរួមយ៉ាងសកម្មក្នុងការកសាងគំនិតផ្តួចផ្តើម"ខ្សែក្រវាត់មួយនិងផ្លូវមួយ"៕
អ្នកបកប្រែ：Wei Wei