ថ្ងៃទី ១៨ ខែមេសា លោក ស៊ី ជីនភីង ប្រធានរដ្ឋចិន និងព្រះចៅ Hamad Bin Isa Al-Khalifa ព្រះមហាក្សត្រនៃប្រទេសបារ៉ែនបានផ្ញើសារជូនពរគ្នាទៅវិញទៅមក ដើម្បីអបអរសាទរយ៉ាងកក់ក្តៅចំពោះខួបទី៣០នៃការបង្កើតទំនាក់ទំនងការទូតរវាងប្រទេសទាំងពីរ ។
ថ្លែងក្នុងសារលិខិត លោក ស៊ី ជីនភីងបានលើកឡើងថា ប្រទេសចិនរីករាយរួមសហការជាមួយប្រទេសបារ៉ែនដើម្បីធ្វើការខិតខំប្រឹងប្រែងជាមួយគ្នា និងចាត់ទុកខួបទី៣០នៃការបង្កើតទំនាក់ទំនងការទូតជាកាលានុវត្តភាពសម្រាប់ប្រទេសទាំងពីររួមគ្នាកសាង “ខ្សែក្រវាត់មួយនិងផ្លូវមួយ ” ដើម្បីជំរុញកិច្ចសហប្រតិបតិ្តការលើគ្រប់វិស័យរវាងចិននិងបារ៉ែនឈានដល់កម្រិតថ្មី ក្នុងន័យផ្តល់សុខសុភមង្គលនិងផលប្រយោជន៍ជូនចំពោះប្រជាជននៃប្រទេសទាំងពីរ ។
មានព្រះបន្ទូលក្នុងសារលិខិត ព្រះចៅ Hamad Bin Isa Al-Khalifa បានលើកឡើងថា ប្រទេសបារ៉ែននឹងបន្តធ្វើការខិតខំប្រឹងប្រែងតទៅទៀត ដើម្បីធ្វើឲ្យទំនាក់ទំនងរវាងបារ៉ែននិងចិនទទួលបានការអភិវឌ្ឍនិងមានភាពកាន់តែស៊ីជម្រៅ សូមជូនពរឲ្យប្រជាជនចិនទទួលបានវឌ្ឍនភាពកាន់តែធំធេងឥតឈប់ឈរ ។
សូមបញ្ជាក់ថា នៅថ្ងៃដដែល លោក លី ខឺឈាង នាយករដ្ឋមន្ត្រីចិននិងលោក Khalifa នាយករដ្ឋមន្ត្រីបារ៉ែនក៏បានផ្ញើសារជូនពរទៅវិញទៅមកផងដែរ ៕
អ្នកបកប្រែ：Guo Xiangqing