លោកWangHuningជួបសន្ទនាជាមួយសម្តេចហ៊ុនសែននាយករដ្ឋមន្រ្តីកម្ពុជា
លោក Wang Huning សមាជិកអចិន្រ្តៃយ៍នៃការិយាល័យនយោបាយមជ្ឈិមបក្សកុម្មុយនិស្តចិននិងជាលេខាធិការនៃលេខាធិការដ្ឋានមជ្ឈិមបក្សកុម្មុយនិស្តចិនបានជួបសន្ទនាជាមួយសម្តេចហ៊ុនសែននាយករដ្ឋមន្រ្តីកម្ពុជានៅសណ្ឋាគាររដ្ឋ DiaoYutai កាលពីថ្ងៃទី២៧ខែមេសា។
លោក Wang Huning បានថ្លែងថា ប្រទេសទាំងពីរចិននិងកម្ពុជាកំពុងកសាងសហគមន៍រួមវាសនាដែលប្រកបដោយអត្ថន័យយុទ្ធសាស្រ្តរវាងចិននិងកម្ពុជាដោយយោងតាមមតិឯកភាពសំខាន់ដែលលោកប្រធានរដ្ឋស៊ីជីនភីងនិងសម្តេចហ៊ុនសែនបានឈានដល់។ប្រទេសចិននឹងបន្តគាំទ្រប្រទេសកម្ពុជាក្នុងការរក្សាឯករាជ្យ អធិបតេយ្យភាពនិងសេចក្តីថ្លៃថ្នូររបស់ជាតិជាប់ជានិច្ច គាំទ្រប្រទេសកម្ពុជាដើរតាមផ្លូវអភិវឌ្ឍដែលសមស្របទៅនឹងសភាពការណ៍ជាតិរបស់ខ្លួន មានឆន្ទៈក្នុងកិច្ចកសាងគំនិតផ្តួចផ្តើមខ្សែក្រវាត់មួយនិងផ្លូវមួយជាមួយភាគីកម្ពុជា ធ្វើឲ្យស៊ីជម្រៅនូវកិច្ចសហប្រតិបត្តិការក្នុងគ្រប់វិស័យ ដើម្បីនាំមកផលប្រយោជន៍កាន់តែច្រើនដល់ប្រជាជនប្រទេសទាំងពីរ។
សម្តេចហ៊ុនសែនបានថ្លែងថា ភាគីកម្ពុជាសូមថ្លែងអំណរគុណចំពោះប្រទេសចិនដែលបានផ្តល់ការគាំទ្រយ៉ាងរឹងមាំនិងជំនួយជាច្រើនសម្រាប់ប្រទេសកម្ពុជាក្នុងរយៈពេលយូរ ហើយមានឆន្ទៈបង្កើនការតភ្ជាប់យុទ្ធសាស្រ្តចតុកោណរបស់ប្រទេសកម្ពុជាជាមួយនឹងគំនិតផ្តួចផ្តើមខ្សែក្រវាត់មួយនិងផ្លូវមួយរបស់ប្រទេសចិន សម្រាប់ជំរុញកិច្ចសហប្រតិបត្តិការរវាងកម្ពុជានិងចិនទទួលសមិទ្ធផលកាន់តែច្រើន។
អ្នកបកប្រែ：Ma Xiaoqing