មានតែបរិយាកាសប្រកបដោយសន្តិសុខនិងមេត្រីភាពប៉ុណ្ណោះទើបអាចទាក់ទាញអ្នកទេសចរចិនបាន
ថ្ងៃទី៤ខែមិថុនា ក្រសួងការបរទេសចិនបានប្រកាសការព្រមានអំពីស្ថានភាពសន្តិសុខនៅសហរដ្ឋអាមេរិកថា ដោយសារស្ថាប័នអនុវត្តច្បាប់របស់សហរដ្ឋអាមេរិកបានរំខានជនជាតិចិនដែលធ្វើដំណើរទៅកាន់សហរដ្ឋអាមេរិកតាមមធ្យោបាយផ្សេងៗដូចជាការពិនិត្យពេលចេញចូលដែននិងការចុះធ្វើអធិការកិច្ចនៅតាមផ្ទះឬសហគ្រាសជាច្រើនលើកនៅពេលថ្មីៗកន្លងទៅនេះ ។ ដូច្នេះក្រសួងការបរទេសចិនសូមដាស់តឿនដល់ជនជាតិចិនដែលធ្វើដំណើរទៅកាន់សហរដ្ឋអាមេរិកនិងអង្គការនានារបស់ចិននៅសហរដ្ឋអាមេរិកធ្វើការពិចារណាឱ្យបានល្អិតល្អន់អំពីសន្តិសុខ ។ ក្រសួងវប្បធម៌និងទេសចរណ៍របស់ចិនក៏បានប្រកាសការដាស់តឿនខាងសន្តិសុខចំពោះការធ្វើដំណើរទៅទេសចរណ៍នៅសហរដ្ឋអាមេរិកផងដែរ ដោយសង្កត់ធ្ងន់ថា មានករណីបាញ់ប្រហារនិងចោរកម្មកើតឡើងជាញឹកញយនៅសហរដ្ឋអាមេរិកនៅពេលថ្មីៗកន្លងទៅនេះ ។ ដូច្នេះដាស់តឿនដល់អ្នកទេសចរចិនវាយតម្លៃឱ្យបានពេញលេញចំពោះហានិភ័យនៃការធ្វើដំណើរកម្សាន្តនៅក្នុងទឹកដីសហរដ្ឋអាមេរិក ។
ការក្រើនរំលឹកចំនួន២នេះមានសុពលភាពរហូតដល់ចុងឆ្នាំនេះ។ការនេះបង្ហាញថា អាមេរិកដែលជាកន្លែងគោលដៅដ៏សំខាន់មួយនៃការចេញពីដែនរបស់ប្រជាពលរដ្ឋចិន កំពុងមានបរិយាកាសសន្តិសុខកាន់តែអាប់អួរ ហានិភ័យផ្នែកទេសចរណ៍កំពុងកើនឡើងឥតឈប់ឈរ លក្ខណៈសំដៅនិងលក្ខណៈរើសអើងនៃការអនុវត្តច្បាប់កាន់តែលេចធ្លោ។សភាពការណ៍ទាំងនេះមិនត្រឹមតែប៉ះពាល់ដល់សុវត្តិភាពផ្ទាល់ខ្លួនរបស់ប្រជាពលរដ្ឋចិនតែប៉ុណ្ណោះ ថែមទាំងក៏បំផ្លាញដល់សិទ្ធិនិងផលប្រយោជន៍របស់ប្រជាពលរដ្ឋចិនផងដែរ ដូច្នេះស្ថាប័នមានពាក់ព័ន្ធនៃប្រទេសចិនត្រូវបង្ខំចេញសេចក្តីក្រើនរំលឹកនេះ។
ទន្ទឹមនឹងការពង្រីកការបើកទូលាយនិងបង្កើនការប្រើប្រាស់ឥតឈប់ឈររបស់ប្រទេសចិន ប្រជាជនចិនដែលបម្រើការងារនិងធ្វើទេសចរន៍នៅក្រៅប្រទេសកាន់តែច្រើនឡើងៗ ។ ឆ្នាំ ២០១៨ ប្រជាជនចិនដែលទៅកម្សាន្តនៅក្រៅប្រទេសមានចំនួនជិត ១៥០ លាននាក់ បានកើនឡើង ១៤.៧ ភាគរយបើប្រៀបធៀបនឹងឆ្នាំ ២០១៧ ពោលគឺប្រទេសចិនបានជាប់ជាប្រទេសប្រភពភ្ញៀវទេសចរដ៏ធំបំផុតលើទូទាំងពិភពលោក ។ ប៉ុន្តែ សហរដ្ឋអាមេរិកដែលជាគោលដៅទេសចរណ៍ដ៏សំខាន់មួយសម្រាប់ប្រជាជនចិនបានទទួលអ្នកទេសចរចិនមិនដល់ ៣ លាននាក់ទេនាឆ្នាំ ២០១៨ គឺថយចុះ ៥.៧ ភាគរយបើប្រៀបធៀបនឹងឆ្នាំ ២០១៧ ដែលជាការថយចុះលើកដំបូងក្នុងរយៈពេល ១៥ ឆ្នាំមកនេះ ។ មូលហេតុនៃការធ្លាក់ចុះនេះគឺដោយសារបរិយាកាសសន្តិសុខរបស់អាមេរិកកាន់តែអាប់អួរទៅៗ ។
មជ្ឈដ្ឋាននានាបានមើលឃើញថា ចាប់តាំងពីដើមឆ្នាំនេះ ជនជាតិចិនបានរងនូវអំពើចោរកម្មក៏ដូចជាបាញ់ប្រហារដ៏ធ្ងន់ធ្ងរជាង ១០០ លើកនៅក្នុងទឹកដីសហរដ្ឋអាមេរិក ។ ព្រមពេលជាមួយគ្នានេះ ការអនុវត្តច្បាប់របស់អាមេរិកមានលក្ខណៈសំដៅនិងលក្ខណៈរើសអើងកាន់តែលេចធ្លោ ។ នាពេលកន្លងទៅនេះ ប្រជាពលរដ្ឋចិនមួយចំនួនចូលដែនឬស្នាក់នៅអាមេរិក ត្រូវរងការស៊ើបសួរនិងឆាឆៅឥតហេតុផលពីស្ថាប័នអនុវត្តច្បាប់អាមេរិក ធ្វើឱ្យសេចក្តីថ្លៃថ្នូរនិងសន្តិសុខបានរងការគំរាមកំហែង ។ លោកChristopher Wray ប្រធាននាយកដ្ឋានស៊ើបអង្កេតសហរដ្ឋអាមេរិកធ្លាប់និយាយថា ប្រទេសចិនបានបង្កជាគំរាមកំហែងចំពោះសង្គមអាមេរិក ដូច្នេះសង្គមអាមេរិកត្រូវឆ្លើយតបទៅវិញ ។ ពាក្យសំដីដ៏ជ្រុលបែបនេះកំពុងបង្កជាការគំរាមកំហែងចំពោះសុវត្ថិភាពផ្ទាល់ខ្លួនរបស់ប្រជាពលរដ្ឋចិនដែលទៅកាន់អាមេរិក ។
ក្នុងរយៈពេល ៤០ ឆ្នាំនៃការបង្កើតចំណងទំនាក់ទំនងការទូតរវាងចិននិងសហរដ្ឋអាមេរិក ប្រទេសចិនតែងតែជំរុញយ៉ាងសកម្មនូវការផ្លាស់ប្តូរផែ្នកវប្បធម៌និងកិច្ចសហប្រតិបត្តិការរវាងចិននិងសហរដ្ឋអាមេរិក ហើយជឿជាក់ថា នេះមិនត្រឹមតែសមស្របនឹងផលប្រយោជន៍រួមនៃភាគីទាំងពីរប៉ុណ្ណោះទេ ថែមទាំងក៏សមស្របនឹងបំណងប្រាថ្នារួមរបស់ប្រជាជននៃប្រទេសទាំងពីរទៀតផង។ប៉ុន្តែគោលនយោបាយប្រទូសនិងសង្កត់ចំពោះប្រទេសចិនដែលបានអនុវត្តដោយអ្នកនយោបាយមួយចំនួននៅក្រុងវ៉ាស៊ីនតោនទីបំផុតបានធ្វើឱ្យប៉ះពាល់យ៉ាងធ្ងន់ធ្ងរដល់ការផ្លាស់ប្តូរផែ្នកវប្បធម៌និងមនុស្សជាតិដែលជាមូលដ្ឋានគ្រឹះនៃស្ថិរភាពសម្រាប់ទំនាក់ទំនងរវាងចិននិងអាមេរិក ហើយក៏បណ្តាលឱ្យវិស័យទេសចរណ៍អាមេរិកធ្លាក់ក្នុងភាពព្រួយបារម្ភនិងងឿងឆ្ងល់ឥតឈប់ឈរផងដែរ។ការព្រមានអំពីហានិភ័យដែលចេញផ្សាយដោយភាគីចិនគួរតែជំរុញឱ្យសហរដ្ឋអាមេរិកមានការប្រុងប្រយ័ត្ន ក៏ដូចជាកែលម្អនូវបរិយាកាលសន្តិសុខឱ្យបានឆាប់ និងធានាសិទ្ធិនិងផលប្រយោជន៍ស្របច្បាប់របស់ភ្ញៀវទេសចរចិនដែលធ្វើដំណើរទៅកាន់សហរដ្ឋអាមេរិកដើម្បីផ្តល់ភាពងាយស្រួលដល់ការប្រាស្រ័យទាក់ទងគ្នារវាងប្រជាជននៃប្រទេសទាំងពីរ។មានតែកែលម្អបរិយាកាលសន្តិសុខប៉ុណ្ណោះទេ សហរដ្ឋអាមេរិកទើបអាចទាក់ទាញភ្ញៀវទេសចរចិនកាន់តែច្រើនឡើងៗ៕
អ្នកបកប្រែ：Sun Lingling