ថ្ងៃទី ១០ ខែមិថុនា ក្រសួងការបរទេសចិនបានធ្វើសនិ្នសីទសារព័ត៌មានអំពីដំណើរទស្សនកិច្ចរបស់លោក ស៊ី ជីនភីងប្រធានរដ្ឋចិន។ លោក Zhang Hanhui អនុរដ្ឋមន្ត្រីការបរទេសចិនបានឧទេ្ទសនាមអំពីសភាពការណ៍ពាក់ព័ន្ធកម្មវិធីនៃដំណើរទស្សនកិច្ចផ្លូវរដ្ឋរបស់លោក ស៊ី ជីនភីងប្រធានរដ្ឋចិនដែលនឹងធ្វើឡើងនៅសាធារណរដ្ឋកៀហ្ស៉ីស៊ីស្ថាននិងសាធារណរដ្ឋតាជីគីស្ថាន ព្រមនិងអញ្ជើញចូលរួមសនិ្នសីទលើកទី១៩ នៃក្រុមប្រឹក្សាថ្នាក់ដឹកនាំនៃរដ្ឋសមាជិកអង្គការសហប្រតិបតិ្តការសៀងហៃ និងកិច្ចប្រជុំកំពូលលើកទី៥ស្តីពីអន្តរសកម្មភាពនិងវិធានការកសាងទំនុកចិត្តនៅអាស៊ី ។ ក្នុងសនិ្នសីទសារព័ត៌មាននេះ លោកអនុរដ្ឋមន្ត្រីក៏បានឆ្លើយសំណួររបស់អ្នកសារព័ត៌មានផងដែរ ។
លោក Zhang Hanhui បានថ្លែងថា ក្នុងអំឡុងពេលបំពេញទស្សនកិច្ចនៅសាធារណរដ្ឋកៀហ្ស៉ីស៊ីស្ថាននិងសាធារណរដ្ឋតាជីគីស្ថាន លោក ស៊ី ជីនភីង នឹងចូលរួមពិធីបដិសណ្ឋារកិច្ចផ្លូវរដ្ឋដែលរៀបចំដោយប្រធានាធិបតីនៃប្រទេសទាំងពីរនេះ បន្ទាប់មកនឹងចូលរួមសកម្មភាព ដូចជាកិច្ចជំនួបពិភក្សា ពិធីចុះហត្ថលេខា និងពិធីលៀងសាយភោជន៍ជាដើម លោក ស៊ី ជីនភីងក៏នឹងរួមជាមួយប្រមុខរដ្ឋនៃប្រទេសទាំងពីរនេះគ្រោងផែនការថ្មីនិងទិសដៅថ្មីអំពីការអភិវឌ្ឍទំនាក់ទំនងភាពជាដៃគូសហប្រតិបតិ្តការជាយុទ្ធសាស្ត្រគ្រប់ជ្រុងជ្រោយរវាងចិននិងសាធារណរដ្ឋកៀហ្ស៉ីស៊ីស្ថាន ចិននិងសាធារណរដ្ឋតាជីគីស្ថាននៅពេលអនាគត ក្នុងន័យបង្កើតជាមូលដ្ឋាននយោបាយដ៏រឹងមាំសម្រាប់ទំនាក់ទំនងរវាងចិននិងសាធារណរដ្ឋកៀហ្ស៉ីស៊ីស្ថាន ចិននិងសាធារណរដ្ឋតាជីគីស្ថាន ដើម្បីគ្រោងផែនទីបង្ហាញផ្លូវថ្មីនៃកិច្ចសហប្រតិបតិ្តការរួមគ្នាកសាង “ខ្សែក្រវាត់និងផ្លូវ”រវាងចិននិងសាធារណរដ្ឋកៀហ្ស៉ីស៊ីស្ថាន ចិននិងសាធារណរដ្ឋតាជីគីស្ថាន ក៏ដូចជាប្រែក្លាយទំនុកចិត្តផ្នែកនយោបាយកម្រិតខ្ពស់រវាងគ្នានិងគ្នាទៅជាសមិទ្ធផលថ្មីនៃកិច្ចសហប្រតិបតិ្តការជាក់ស្តែងកាន់តែច្រើន សំដៅបង្កើនសុខសុខុមាលភាពរបស់ប្រជាជន ជំរុញវឌ្ឈនភាពនិងវិបុលភាពរបស់ប្រទេសរៀងខ្លួន និងធានាឲ្យទំនាក់ទំនងរវាងចិននិងសាធារណរដ្ឋកៀហ្ស៉ីស៊ីស្ថាន ចិននិងសាធារណរដ្ឋតាជីគីស្ថានសម្រេចបាននូវការអភិវឌ្ឍកាន់តែធំធេង ៕
អ្នកបកប្រែ：Guo Xiangqing