កិច្ចប្រជុំកំពូលលើកទី ៥ នៃសន្និសីទស្តីពីអន្តរសកម្មភាពនិងវិធានការកសាងទំនុកចិត្តនៅអាស៊ីបានប្រារព្ធឡើងនៅក្រុង ឌូស្ហាន់ប៉េ រដ្ឋធានីតាហ្ស៊ីគីស្ថានកាលពីថៃ្ងទី ១៥ ខែមិថុនា។លោក ស៊ីជីនភីង ប្រធានរដ្ឋចិនបានអញ្ជើញចូលរួមព្រមទាំងបានថ្លែងសុន្ទរកថាសំខាន់ៗ។អន្តរជាតិសម្គាល់ជាទូទៅថា សុន្ទរកថារបស់លោកប្រធានរដ្ឋចិន ស៊ីជីនភីង បានអធិប្បាយពីគោលគំនិតរបស់ប្រទេសចិនក្នុងការជំរុញសន្តិភាពប្រកបដោយនិរន្តរភាពនិងវិបុលភាពរួមនៅទ្វីបអាស៊ី។ព្រមពេលជាមួយគ្នានេះ បានចង្អុលបង្ហាញនូវទិសដៅសម្រាប់បណ្តាប្រទេសនានានៅតំបន់អាស៊ីក្នុងការបង្កើនការយល់ដឹងគ្នា ពង្រឹងទំនុកចិត្តគ្នាទៅវិញទៅមក ក៏ដូចជាធ្វើឱ្យស៊ីជម្រៅនូវកិច្ចសហប្រតិបត្តិការនិងសម្រេចបាននូវភាពឈ្នះ-ឈ្នះព្រមទាំងបង្កើតស្ថានភាពថ្មីមួយសម្រាប់សន្តិសុខនិងការអភិវឌ្ឍនៅតំបន់អាស៊ី។
លោក Do Tien Sam អតីតៈប្រធាននៃវិទ្យាស្ថានសិក្សាស្រាវជ្រាវប្រទេសចិននៃបណ្ឌិត្យសភាសង្គមវិទ្យាសាស្ត្រវៀតណាមបានថែ្លងថា សុន្ទរកថារបស់លោកប្រធានរដ្ឋចិន ស៊ីជីនភីង បង្ហាញពីរបៀបរៀបចំផែនការស្តីពីការកសាងសហគមន៍រួមវាសនានៃតបន់អាស៊ីក្រោមស្ថានភាពថ្មី។គោលដៅទាំងនេះមិនត្រឹមតែបង្ហាញពីតួនាទីរបស់ប្រទេសចិនក្នុងនាមជាមហាអំណាចធំមួយដែលមានទំនួលខុសត្រូវនៅតំបន់អាស៊ីនិងសហគមន៍អន្ដរជាតិនោះទេ ថែមទាំងមានន័យថា ប្រទេសចិននឹងរួមចំណែកកាន់តែសកម្មដល់សន្តិភាពនិងវិបុលភាពនៅលើពិភពលោក។
លោក Anri Sharapov សាស្ត្រាចារ្យរងខាងនយោបាយនៃវិទ្យាស្ថានជាតិសម្រាប់សិក្សាស្រាវជ្រាវតំបន់ភាគខាងកើតក្រុងបូស្តុននៃប្រទេសអ៊ូសបេគីស្ថានបានថែ្លងថា គំនិតផ្តួចផ្តើម"ខ្សែក្រវាត់និងផ្លូវ"ដែលបានលើកឡើងដោយប្រទេសចិនអាចនឹងបង្កើនការតភ្ជាប់និងទំនាក់ទំនងគ្នាក្នុងតំបន់ ហើយទស្សនៈនៃការកសាងសហគមន៍រួមវាសនានៃមនុស្សជាតិនឹងនាំមកនូវសន្តិភាពនិងវិបុលភាពដល់ពិភពលោក។
លោក Jaewoo Choo សាស្ត្រាចារ្យខាងនយោបាយអន្តរជាតិនៃសាកលវិទ្យាល័យ Kyung Hee នៅប្រទេសកូរ៉េខាងត្បូងបានចង្អុលបង្ហាញថា ទន្ទឹងរង់ចាំប្រទេសចិននឹងបន្តពង្រីកតួនាទី និងលើកទឹកចិត្តដល់គ្រប់ភាគីទាំងអស់ឱ្យចូលរួមក្នុងដំណើរការពួតដៃគ្នាកសាងសន្តិភាពនិងស្ថិរភាពនៅអាស៊ី ក៏ដូចជាជំរុញកិច្ចសហប្រតិបត្តិការនិងការអភិវឌ្ឍនៅតំបន់អាស៊ី។លោកជូនពរឱ្យកិច្ចប្រជុំកំពូលលើកទី ៥ នៃសន្និសីទស្តីពីអន្តរសកម្មភាពនិងវិធានការកសាងទំនុកចិត្តនៅអាស៊ីអាចរួមចំណែកកាន់តែច្រើនដល់សន្តិភាពនិងការអភិវឌ្ឍក្នុងតំបន់៕
អ្នកបកប្រែ：Weiwei