ក្រសួងទំនាក់ទំនងអន្តរជាតិនៃគណៈកម្មាធិការមជ្ឈិមបក្សកុម្មុយនិស្តចិនបើកធ្វើសន្និសីទកាសែតអំពីដំណើរទស្សនកិច្ចផ្លូវរដ្ឋនៅកូរ៉េខាងជើងរបស់លោក ស៊ី ជីនភីង
ក្រសួងទំនាក់ទំនងអន្តរជាតិនៃគណៈកម្មាធិការមជ្ឈិមបក្សកុម្មុយនិស្តចិនបានបើកធ្វើសន្និសីទកាសែតមួយនៅថ្ងៃទី ១៧ ខែមិថុនា។ លោក សុង ថាវ រដ្ឋមន្ត្រីក្រសួងទំនាក់ទំនងអន្តរជាតិនៃគណៈកម្មាធិការមជ្ឈិមបក្សកុម្មុយនិស្តចិនបានធ្វើការណែនាំអំពីដំណើរទស្សនកិច្ចផ្លូវរដ្ឋនៅកូរ៉េខាងជើងរបស់លោក ស៊ី ជីនភីង អគ្គលេខាធិការនៃគណៈកម្មាធិការមជ្ឈិមបក្សកុម្មុយនិស្តចិន និងជាប្រធានរដ្ឋចិន។
លោក សុង ថាវ បានថ្លែងថា តបតាមសេចក្តីអញ្ជើញរបស់លោក គីម ជុងអ៊ុន ប្រធានគណៈកម្មាធិការបក្សពលករកូរ៉េខាងជើង និងជាប្រធានគណៈកម្មាធិការកិច្ចការរដ្ឋកូរ៉េខាងជើង លោក ស៊ី ជីនភីង អគ្គលេខាធិការនៃគណៈកម្មាធិការមជ្ឈិមបក្សកុម្មុយនិស្តចិន និងជាប្រធានរដ្ឋចិននឹងអញ្ជើញទៅបំពេញទស្សនកិច្ចផ្លូវរដ្ឋនៅកូរ៉េខាងជើងពីថ្ងៃទី ២០ ដល់ថ្ងៃទី ២១ ខែមិថុនាខាងមុខនេះ។ ដំណើរទស្សនកិច្ចនេះ គឺនៅក្នុងឱកាសខួបលើកទី ៧០ នៃការបង្កើតទំនាក់ទំនងការទូតរវាងចិននិងកូរ៉េខាងជើង ហើយមានសារសំខាន់ខ្លាំងណាស់សម្រាប់ទំនាក់ទំនងរវាងប្រទេសទាំងពីរ។
លោក សុង ថាវ បានបន្តទៀតថា ភាគីទាំងពីរចិននិងកូរ៉េខាងជើងសុទ្ធតែយល់ឃើញថា ការរក្សា ពង្រឹងនិងអភិវឌ្ឍឱ្យបានល្អនូវទំនាក់ទំនងចិន-កូរ៉េខាងជើង សមស្របនឹងផលប្រយោជន៍របស់ប្រទេសទាំងពីរនិងប្រជាជនប្រទេសទាំងពីរ ។ ភាគីទាំងពីរសុទ្ធតែលើកទឹកចិត្តដល់បណ្តាភាគីមានពាក់ព័ន្ធនានា គួរចេះថ្នាក់ថ្នមភាពបន្ធូរបន្ថយភាពតានតឹងដែលបានមកពីការចរចាឧបទ្វីបដែលទទួលបានដោយលំបាក ប្រកាន់ទិសដៅសម្រេចការគ្មាននុយគ្លេអ៊ែរក្នុងឧបទ្វីប រក្សាគាំពារសន្តិភាពនិងស្ថិរភាពនៃឧបទ្វីប និងដោះស្រាយបញ្ហាឧបទ្វីបតាមរយៈការចរចានិងការពិគ្រោះពិភាក្សា។ ភាគីចិនគាំទ្រភាគីកូរ៉េខាងជើងក្នុងការអនុវត្តខ្សែយុទ្ធសាស្ត្រថ្មី ផ្តោតសំខាន់លើការអភិវឌ្ឍសេដ្ឋកិច្ច និងការកែលម្អជីវភាពរស់នៅរបស់ប្រជាជន និងយកចិត្តទុកដាក់យ៉ាងរឹងមាំលើមាគ៌ាអភិវឌ្ឍដែលសមស្របនឹងសភាពការជាតិផ្ទាល់ខ្លួន៕
អ្នកបកប្រែ：Deng Qian