នាម៉ោង១២ ថ្ងៃត្រង់ក្នុងថ្ងៃទី១ ខែកក្កដា យន្តហោះមួយគ្រឿងនៃក្រុមហ៊ុនអាកាសចរណ៍អន្តរជាតិJCប្រទេសកម្ពុជាបានចុះចតនៅព្រលានយន្តហោះអន្តរជាតិស៊ីសាំងបានណាខេត្តយូណាន ព្រមទាំងបានប្រកាសថាជាផ្លូវការអំពីខ្សែហោះហើរត្រង់ពីមណ្ឌលស្វយ័តស៊ីសាំងបានណានិងខេត្តសៀមរាបប្រទេសកម្ពុជា។
ទីក្រុងសៀមរាបជាទីក្រុងទេសចរណ៍ដ៏ល្បីឈ្មោះដែលមានប្រវត្តិសាស្ត្រដ៏យូរអង្វែង ក៏ជាទីក្រុងមេត្រីភាពជាមួយមណ្ឌលស្វយ័តស៊ីសាំងបានណា។ ការបើកខ្សែហោះហើរនេះ បានធ្វើឱ្យបណ្តាញអាកាសចរណ៍កាន់តែសម្បូរបែប ថែមទាំងកសាងស្ពានតភ្ជាប់ផ្លូវអាកាសសម្រាប់ស៊ីសាំងបានណាជាមួយនឹងប្រទេសកម្ពុជាក្នុងការវិនិយោគ ពាណិជ្ជកម្ម វប្បធម៌និងទេសចរណ៍ ព្រមទាំងការបន្តការសិក្សានៅបរទេសជាដើម ជាមួយគ្នានេះ បានផ្តល់ភាពងាយស្រួលសម្រាប់ភ្ញៀវទេសចរណ៍សម្រាប់ការធ្វើដំណើរ ហើយក៏ញ៉ាំងឱ្យសេដ្ឋកិច្ចនិងពាណិជ្ជកម្ម និងកិច្ចសហប្រតិបត្តិការរវាងចិននិងកម្ពុជាកាន់តែស៊ីជម្រៅ។
ក្រោយខ្សែហោះហើរនេះបើកដំណើរការ រៀងរាល់ថ្ងៃចន្ទ ថ្ងៃពុធ ថ្ងៃសុក្រ សុទ្ធតែមានជើងហោះហើររវាងខេត្តសៀមរាបនិងមណ្ឌលស៊ីសាំងបានណា ដែលមានជើងហោះហើរមុនគេពីខេត្តសៀមរាបគឺQD828 និងជើងហោះហើរមុនគេពីមណ្ឌលស៊ីសាំងបានណាគឺQD829។ ជើងហោះហើរត្រូវបានរៀបចំដូចខាងក្រោម ថ្ងៃចន្ទ ធ្វើការហោះហើរពីខេត្តសៀមរាបនៅម៉ោង៩និង៣០នាទីតាមម៉ោងតំបន់ទៅកាន់មណ្ឌលស៊ីសាំងបានណានៅម៉ោង១២ និង៣០នាទីម៉ោងទីក្រុងប៉េកាំង ហើយរសៀលម៉ោង១៣និង៤០នាទីធ្វើការហោះហើរត្រឡប់ពីមណ្ឌលស៊ីសាំងបានណាមកកាន់ខេត្តសៀមរាបនៅម៉ោង១៤និង៤០នាទី។ថ្ងៃពុធនិងថ្ងៃសុក្រ ធ្វើការហោះហើរពីខេត្តសៀមរាបនៅម៉ោង៧តាមម៉ោងតំបន់ទៅកាន់មណ្ឌលស៊ីសាំងបានណានៅម៉ោង១០ម៉ោងទីក្រុងប៉េកាំង ហើយម៉ោង១១ ធ្វើការហោះហើរត្រឡប់ពីមណ្ឌលស៊ីសាំងបានណាមកកាន់ខេត្តសៀមរាបនៅម៉ោង១២និង១០នាទី។
យោងតាមការណែនាំបានឱ្យដឹងថា ក្រុមហ៊ុនអាកាសចរណ៍អន្តរជាតិJCប្រទេសកម្ពុជានឹងបើកខ្សែហោះហើរពីកំពង់សោម-ស៊ីសាំងបានណា នាថ្ងៃទី០៦ ខែកក្កដា ដែលធ្វើការហោះហើរនៅថ្ងៃអង្គារ ថ្ងៃព្រហស្បតិ៍និងថ្ងៃសៅរ៍ ដោយជើងហោះហើរមុនគេពីកំពង់សោមគឺ QD328និងជើងហោះហើរមុនគេពីមណ្ឌលស៊ីសាំងណាគឺ QD329 ដែលធ្វើការហោះហើរពីកំពង់សោមនៅម៉ោង៨និង២០នាទីតាមម៉ោងតំបន់ទៅកាន់មណ្ឌលស៊ីសាំងបានណានៅម៉ោង១១និង៣០នាទីម៉ោងទីក្រុងប៉េកាំងហើយម៉ោង១២និង៣០នាទី ធ្វើការហោះហើរត្រឡប់ពីមណ្ឌលស៊ីសាំងបានណាមកកាន់កំពង់សោមវិញនៅម៉ោង១៣និង៤០នាទីម៉ោងនៅកម្ពុជា៕
អ្នកសារព័ត៌មាន៖ Dai zhenhua
អ្នកបកប្រែ៖លីហ្សា