អគ្គនាយកដ្ឋានគយចិន៖ ការនាំចេញនាំចូលសរុបនៃពាណិជ្ជកម្មអន្តរជាតិរបស់ប្រទេសចិនក្នុងឆមាសទីមួយនាឆ្នាំនេះកើនឡើងចំនួន ៣.៩% បើប្រៀបធៀបនឹងរយៈពេលដូចគ្នានាឆ្នាំទៅមិញ
លោក Li Kuiwen អ្នកនាំពាក្យនៃអគ្គនាយកដ្ឋានគយចិនបានប្រាប់ឱ្យដឹងកាលពីថ្ងៃទី ១២ ខែកក្កដាថា ឆមាសទីមួយនាឆ្នាំ ២០១៩ នេះ ការនាំចេញនាំចូលនៃពាណិជ្ជកម្មអន្តរជាតិរបស់ប្រទេសចិនមានចំនួនជាង ១៤ ទ្រីលានយាន់ប្រាក់ចិន បានកើនឡើងចំនួន ៣.៩ % បើប្រៀបធៀបនឹងរយៈពេលដូចគ្នានាឆ្នាំទៅមិញ។
លោកបានឱ្យដឹងថា ក្នុងឆមាសទីមួយឆ្នាំនេះ ចំនួននាំចេញនិងនាំចូលរវាងប្រទេសចិននិងដៃគូពាណិជ្ជកម្មសំខាន់ៗដូចជាសហភាពអឺរ៉ុប ,អាស៊ាន ,ប្រទេសជប៉ុនជាដើម ក៏ដូចជាបណ្តាប្រទេសតាមបណ្តោយ “ខ្សែក្រវាត់និងផ្លូវ” សុទ្ធតែមានការកើនឡើង។ ក្នុងនោះ ចំនួននៃការនាំចេញនិងនាំចូលរវាងចិននិងអាស៊ានមានដល់ទៅ 1 ទ្រីលាន 98 ប៊ីលានយាន់ប្រាក់ចិន បានកើនឡើងជាង ១០ % ។ ព្រមពេលជាមួយគ្នានេះ ចំនួននៃការនាំចេញនិងនាំចូលពីសហគ្រាសវិនិយោគទុនបរទេសក្នុងប្រទេសចិនមានចំនួន 5 ទ្រីលាន 92 ប៊ីលានយាន់ប្រាក់ចិន ស្មើនឹង ៤០.៤% នៃចំនួននាំចេញនាំចូលសរុបរបស់ប្រទេសចិន។
លោកបានបន្តទៀតថា បូកសរុបទៅ ក្នុងឆមាសទីមួយនាឆ្នាំនេះ ការនាំចេញនាំចូលនៃពាណិជ្ជកម្មអន្តរជាតិរបស់ចិនមានស្ថិរភាព មានភាពរលូនល្អជាទូទៅ ទទួលបានការអភិវឌ្ឍជាបន្ត ហើយពាណិជ្ជកម្មអន្តរជាតិរបស់ចិនវិវឌ្ឍរីកចម្រើនទៅមុខជាបន្តបន្ទាប់៕
អ្នកបកប្រែ：Deng Qian