កុមារកម្ពុជាដែលមានជម្ងឺបេះដូងចំហពីកំណើត៦រូបបានមកដល់ទីក្រុងគុនមីញដើម្បីទទួលការព្យាបាលដោយឥតគិតថ្លៃ

នារសៀលម៉ោង១និង៥០នាទីថ្ងៃទី១៦ ខែកក្កដា  ឆ្លងកាត់ការធ្វើដំណើរតាមយន្តហោះអស់រយៈពេលជាង៣ម៉ោង  កុមារកម្ពុជាដែលមានជម្ងឺបេះដូងចំហពីកំណើត៦រូបបានមកដល់អាកាសយានដ្ឋានអន្តរជាតិឆាងសួយក្រុងគុនមីញខេត្តយូណានប្រទេសចិនដោយសុវត្ថិភាព។

អ្នកសារព័ត៌មានបានទទួលដំណឹងថា  នាថ្ងៃទី០៥ ខែកក្កដា ឆ្នាំ២០១៩ មន្ទីរពេទ្យហ្វូវ៉ាយបានចាត់ក្រុមគ្រូពេទ្យឯកទេសចំនួន៧រូបនិងអ្នកស្ម័គ្រចិត្តចំនួន៥រូបមកប្រទេសកម្ពុជា  ហើយបានរៀបចំការងារត្រួតពិនិត្យអំពីជម្ងឺបេះដូងចំហពីកំណើតដល់កុមារនៅខេត្តបាត់ដំបង សៀមរាប  កំពង់ធំ កំពង់ចាម និងខេត្តត្បូងឃ្មុំ  ដែលបានរកឃើញមានកុមារដែលមានជម្ងឺបេះដូងចំហពីកំណើតចំនួន៦រូប។

ក្នុងរយៈពេលនៃការត្រួតពិនិត្យជម្ងឺចំនួន១២ថ្ងៃទៅលើសិស្សបឋមសិក្សានិងសិស្សអនុវិទ្យាល័យចំនួន២០១៦៦នាក់ក្នុងសាលាចំនួន៤៣ដែលស្ថិតនៅខេត្តចំនួន៥ខាងលើ រួចគ្រូពេទ្យឯកទេសបានពិនិត្យឃើញមានកុមារសង្ស័យផ្ទុកជម្ងឺចំនួន៣១៣នាក់  ចុងក្រោយគ្រូពេទ្យបានកំណត់យកកុមារចំនួន៣៥នាក់។  ក្នុងក្រុមទីមួយមានកុមារដែលមានជម្ងឺចំនួន៦នាក់និងសមាជិកគ្រួសារជាអ្នកកំដរមកដល់មន្ទីរពេទ្យដើម្បីទទួលការព្យាបាល។  ជាបន្តបន្ទាប់កុមារដែលមានជម្ងឺដទៃទៀតនឹងត្រូវចែកជាក្រុម ដើម្បីធ្វើដំណើរទៅព្យាបាលនៅទីក្រុងគុនមីញ។

យោងតាមដំណឹងបានឱ្យដឹងថា  ចាប់តាំងពីឆ្នាំ២០១៨មក រដ្ឋាភិបាលនៃប្រទេសចិននិងកម្ពុជាបានបើកដំណើការរួមគ្នានូវគម្រោងការ“ធ្វើដំណើរការដោយក្តីស្រឡាញ់”ដែលប្រើប្រាស់រយៈពេលបីឆ្នាំក្នុងការត្រួតពិនិត្យជម្ងឺបេះដូងចំហទូទៅដល់កុមារដែលមានអាយុក្រោមជាង១៤ឆ្នាំ។មន្ទីរពេទ្យហ្វូវ៉ាយជម្ងឺបេះដូងចំហខេត្តយូណានក្នុងនាមជាស្ថាប័នអនុវត្តគម្រោងនេះ  បានបញ្ជូនក្រុមសុខាភិបាលឯកទេសដល់ប្រទេសកម្ពុជាក្នុងការរៀបចំការងារគម្រោង។

    

ចំពោះកុមារកម្ពុជាដែលមានជម្ងឺបេះដូងចំហលើកនេះ  មន្ទីរពេទ្យមិនគ្រាន់តែផ្តល់ជំនួយផ្នែកសុខាភិបាលដ៏ល្អបំផុតប៉ុណ្ណោះទេ  ថែមទាំងយកចិត្តទុកដាក់និងថែទាំទៅលើការរស់នៅរបស់ពួកគេផងដែរហើយក្នុងនោះ នាយកដ្ឋានកិច្ចការសុខាភិបាលសង្គម  នឹងកំដរពួកគេតាំងពីចូលដល់មន្ទីរពេទ្យធ្វើការត្រួតពិនិត្យ ទទួលព្យាបាលរហូតដល់ចាកចេញពីមន្ទីរពេទ្យវិញ  ដើម្បីជួយពួកគេដោះស្រាយបញ្ហានៃការរស់នៅនៅប្រទេសចិន៕

អ្នកសារព័ត៌មាន៖ Chen Xinlong Peng Xi

ប្រភពរូបថត៖Li Qiuming

អ្នកបកប្រែ៖ លីហ្សា