លោក វ៉ាង យី ជួបពិភាក្សាការងារជាមួយលោក ប្រាក់ សុខុន ឧបនាយករដ្ឋមន្រ្តីនិងជារដ្ឋមន្រ្តីក្រសួងការបរទេសនិងសហប្រតិបត្តិការអន្តរជាតិកម្ពុជា
លោក វ៉ាង យី សមាជិកក្រុមប្រឹក្សាកិច្ចការរដ្ឋចិននិងជារដ្ឋមន្ត្រីក្រសួងការបរទេសចិនបានជួបពិភាក្សាការងារជាមួយលោក ប្រាក់ សុខុន ឧបនាយករដ្ឋមន្រ្តីនិងជារដ្ឋមន្រ្តីក្រសួងការបរទេសនិងសហប្រតិបត្តិការអន្តរជាតិកម្ពុជាកាលពីថ្ងៃទី ៣០ ខែកក្កដា នៅក្រុងបាងកកនៃប្រទេសថៃ។
ថែ្លងក្នុងកិច្ចជំនួប លោក វ៉ាងយី បានមានប្រសាសន៍ថា នៅឆ្នាំនេះ ទំនាក់ទំនងរវាងចិននិងកម្ពុជាបានបន្តរក្សានិន្នាការនៃការអភិវឌ្ឍយ៉ាងឆាប់រហ័ស។ប្រទេសទាំងពីរបានឈានមុខគេក្នុងការចុះហត្ថលេខាលើផែនការសកម្មភាពសម្រាប់កសាងសហគមន៍រួមវាសនារវាងចិននិងកម្ពុជា ដែលនឹងដើរតួនាទីឈានមុខគេនិងគំរូ។ប្រទេសចិនមានឆន្ទៈក្នុងការរក្សាការផ្លាស់ប្តូរកម្រិតខ្ពស់ជាមួយកម្ពុជាដើម្បីជំរុញយ៉ាងសកម្មនូវកិច្ចសហប្រតិបត្តិការគំនិតផ្តួចផ្តើម"ខ្សែក្រវាត់និងផ្លូវ"។ប្រទេសចិនរីករាយរួមសហការជាមួយបណ្តាប្រទេសអាស៊ានដើម្បីរៀបចំឱ្យបានល្អនូវកិច្ចប្រជុំថ្នាក់រដ្ឋមន្ត្រីក្រសួងការបរទេសមួយចំនួនស្តីពីកិច្ចសហប្រតិបត្តិការនៅអាស៊ីបូព៌ានិងរួមគ្នាការពារស្ថិរភាពនិងវិបុលភាពក្នុងតំបន់។
ជាការឆ្លើយតប លោក ប្រាក់ សុខុនបានថែ្លងថា ប្រទេសកម្ពុជាគឺជាប្រទេសដំបូងគេដែលបានចុះហត្ថលេខាលើផែនការសកម្មភាពសម្រាប់កសាងសហគមន៍រួមវាសនាជាមួយប្រទេសចិន។នេះក៏ជាវិធានការជាក់ស្តែងសម្រាប់ភាគីទាំងពីរដើម្បីធ្វើឱ្យស៊ីជម្រៅនូវទំនាក់ទំនងភាពជាដៃគូយុទ្ធសាស្ត្រ។ភាគីកម្ពុជាមានឆន្ទៈរួមសហការជាមួយប្រទេសចិនក្នុងការជំរុញកិច្ចប្រជុំថ្នាក់រដ្ឋមន្ត្រីក្រសួងការបរទេសអាស៊ានមួយចំនួនដោយផ្តោតលើកិច្ចសហប្រតិបត្តិការនិងការអភិវឌ្ឍដើម្បីបង្កើតគំនិតឯកភាពគ្នានិងបញ្ចេញនូវសញ្ញាជាវិជ្ជមានទៅខាងក្រៅ៕
អ្នកបកប្រែ：Wei Wei