ពេលថ្មីៗកន្លងទៅនេះ ភាគីអាមេរិកបានថ្លែងថា នឹងមានផែនការដំឡើងពន្ធគយ១០ភាគរយចំពោះទំនិញចិនដែលនាំចូលទីផ្សារសហរដ្ឋអាមេរិកក្នុងទំហំទឹកប្រាក់៣សែនលានដុល្លារអាមេរិកចាប់ពីថ្ងៃទី១ខែកញ្ញាខាងមុខនេះ ។ ព្រមពេលជាមួយគ្នានេះ ក៏ថ្លែងទៀតថា អាមេរិករំពឹងទុកថា នឹងធ្វើការចរចាវិជ្ជមានអំពីការឈានដល់កិច្ចព្រមព្រៀងផ្នែកសេដ្ឋកិច្ចនិងពាណិជ្ជកម្មគ្រប់ជ្រុងជ្រោយជាមួយភាគីចិនផងដែរ ។ ភាគីអាមេរិកធ្វើទង្វើមិនគួរទុកចិត្តនិងល្មើសមតិឯកភាពនៃជំនួបពិភាក្សាការងារក្រុងអូសាការវាងមេដឹកនាំប្រទេសទាំងពីរចិននិងអាមេរិកផង ហើយរំពឹងទុកថា ធ្វើការចរចាដើម្បីទទួលបានលទ្ធផលល្អប្រសើរផង គំនិតរបស់ភាគីអាមេរិកនេះពិតជាគួរធ្វើឱ្យគេឆ្ងល់ខ្លាំងណាស់ ។ ភាពស្មោះត្រង់ជាមូលដ្ឋាននៃការចរចា ឧទាហរណ៍ថា អ្នកចូលរួមការចរចាម្នាក់ដែលតែងតែប្រែប្រួល នឹងធ្វើឱ្យគេទុកចិត្តបានយ៉ាងដូចម្តេច?
ក្នុងរយៈពេលមួយឆ្នាំកន្លងទៅនេះ ភាគីចិនតែងតែឈរលើមូលដ្ឋានស្មោះត្រង់ និងធ្វើការពិគ្រោះពិភាក្សាជាមួយភាគីអាមេរិកដោយភាពស្មោះត្រង់ ហើយទទួលបានការវិវឌ្ឍធំណាស់ ។ ប៉ុន្តែ ដោយសារភាគីអាមេរិកល្មើសនឹងមតិឯកភាពគ្នាបួនលើក មិនអាចទុកចិត្តបានទេ ដូច្នេះ ការពិគ្រោះពិភាក្សាបានជួបនឹងឧបសគ្គជាច្រើន ។
កាលពីខែកុម្ភៈឆ្នាំ២០១៨ ភាគីទាំងពីរចិននិងសហរដ្ឋអាមេរិកបានឈានដល់មតិឯកភាពគ្នាជាគ្រាដំបូងអំពីការពង្រីកការនាំចូលកសិផលនិងផលិតផលថាមពលពីអាមេរិកជាដើម ។ ប៉ុន្តែកាលពីខែមីនាឆ្នាំ២០១៨ ភាគីអាមេរិកបានបញ្ចេញរបាយការណ៍ស្តីពីការត្រួតពិនិត្យលេខ៣០១ចំពោះប្រទេសចិន ហើយប្រកាសថា នឹងដំឡើងពន្ធគយ២៥ភាគរយចំពោះទំនិញចិនដែលនាំចូលទីផ្សារសហរដ្ឋអាមេរិកក្នុងទំហំទឹកប្រាក់៥ម៉ឺនលានដុល្លារអាមេរិក ។
កាលពីថ្ងៃទី១៩ខែឧសភាឆ្នាំ២០១៨ ភាគីទាំងពីរចិននិងសហរដ្ឋអាមេរិកបានប្រកាសសេចក្តីថ្លែងការណ៍រួមមួយថា បានឈានដល់មតិឯកភាពគ្នាអំពីការមិនធ្វើសង្គ្រាមពាណិជ្ជកម្មជាមួយគ្នាទៀតនោះទេ ។ ប៉ុន្តែ១០ថ្ងៃក្រោយមក សេតវិមានក៏បានលះបង់ចោលសេចក្តីថ្លែងការណ៍រួមនោះ ដោយប្រកាសថា នឹងបន្តជំរុញផែនការដំឡើងពន្ធគយតទៅទៀត ។
កាលពីថ្ងៃទី ១ ខែធ្នូ ឆ្នាំ ២០១៨ កិច្ចសន្ទនារវាងប្រមុខរដ្ឋចិននិងសហរដ្ឋអាមេរិកនៅ អាហ្សង់ទីនបានឈានដល់គំនិតឯកភាពគ្នាដ៏សំខាន់ដោយបានយល់ព្រមបញ្ឈប់ការដំឡើងពន្ធគយថ្មីលើគ្នាទៅវិញទៅមក ហើយភាគីទាំងពីរបានប្រើរយៈពេល ៩០ ថ្ងៃធ្វើការពិគ្រោះពិភាក្សាដើម្បីខិតខំប្រឹងប្រែងសម្រាប់ឆ្ពោះទៅរកទិសដៅនៃការលុបបំបាត់ការដំឡើងពន្ធគយទាំងអស់។ទីបំផុត ក្រុមការងារសេដ្ឋកិច្ចនិងពាណិជ្ជកម្មនៃភាគីទាំងពីរបានចំណាយពេលធ្វើការពិគ្រោះពិភាក្សានិងបានឈានដល់គំនិតឯកភាពគ្នាលើបញ្ហាជាច្រើន។ទោះជាយ៉ាងណាក៏ដោយ ភាគីអាមេរិកបានបន្តបង្កើនតម្លៃនៃកិច្ចចរចាឥតឈប់ឈរ ហើយបានដំឡើងយកអត្រាពន្ធគយទៅលើផលិតផលចិនដែលនាំចូលទីផ្សារអាមេរិកក្នុងទឹកប្រាក់ ២ សែនលានដុល្លារអាមេរិក ពោលគឺ ១០ ភាគរយទៅដល់ ២៥ ភាគរយកាលពីថៃ្ងទី ១០ ខែឧសភានៅឆ្នាំនេះដែលធ្វើឱ្យដំណើរការនៃការពិគ្រោះពិភាក្សាផែ្នកសេដ្ឋកិច្ចនិងពាណិជ្ជកម្មរវាងចិននិងអាមេរិកត្រូវរាំងស្ទះ។
ក្នុងជំនួបនៅក្រុងអូសាកាកាលពីថ្ងៃទី ២៩ ខែមិថុនា ឆ្នាំ ២០១៩ ប្រមុខរដ្ឋប្រទេសចិននិងសហរដ្ឋអាមេរិកបានឈានដល់គំនិតឯកភាពគ្នាដោយបានយល់ព្រមដំណើរការឡើងវិញនូវកិច្ចពិគ្រោះពិភាក្សាផែ្នកសេដ្ឋកិច្ចនិងពាណិជ្ជកម្មដោយឈរលើមូលដ្ឋានស្មើភាពនិងគោរពគ្នាទៅវិញទៅមក។ភាគីអាមេរិកសន្យាថា លែងដំឡើងពន្ធគយថ្មីទៅលើផលិតផលនាំចូលពីប្រទេសចិនទៀតហើយ។បន្ទាប់ពីបញ្ចប់កិច្ចពិគ្រោះពិភាក្សាជាន់ខ្ពស់ផែ្នកសេដ្ឋកិច្ចនិងពាណិជ្ជកម្មរវាងចិននិងអាមេរិក វគ្គទី ១២ ភាគីទាំងពីរបានចេញផ្សាយសេចក្តីថ្លែងការណ៍ដាច់ដោយឡែកពីគ្នានិងបានឯកភាពគ្នាដើម្បីធ្វើការផ្លាស់ប្តូរប្រកបដោយលក្ខណៈស្ថាបនា ហើយបានយល់ព្រមនឹងបើកកិច្ចពិគ្រោះពិភាក្សាវគ្គបន្ទាប់នៅសហរដ្ឋអាមេរិកនៅខែកញ្ញាខាងមុខនេះ។ទោះជាយ៉ាងណាក៏ដោយ ត្រឹមតែរយៈពេលជាង ៣០ ម៉ោងប៉ុណ្ណោះ ភាគីអាមេរិកបានក្រឡាស់ភ្លាមៗម្តងទៀត ដែលធ្វើឱ្យកិច្ចពិគ្រោះពិភាក្សាផែ្នកសេដ្ឋកិច្ចនិងពាណិជ្ជកម្មងាកចេញពីផ្លូវត្រឹមត្រូវឡើងវិញម្តងទៀត។
គេអាចមើលឃើញថា អាមេរិកត្រូវទទួលខុសត្រូវទាំងស្រុងចំពោះកិច្ចពិគ្រោះពិភាក្សាផែ្នកសេដ្ឋកិច្ចនិងពាណិជ្ជកម្មរវាងចិននិងអាមេរិកដែលត្រូវបានឆ្លងកាត់ក្តីលំបាកនិងការបត់បែនជាច្រើនលើក។កិច្ចចរចាតែងតែជាបញ្ហារបស់ភាគីទាំងសងខាង ប្រសិនបើចង់ឈានដល់កិច្ចព្រមព្រៀង នោះ ភាគីទាំងពីរចាំបាច់ត្រូវបង្ហាញនូវអាកប្បកិរិយាដែលដើរស្របតាមទិសដៅតែមួយជាមួយគ្នា។ក្នុងរយៈពេលមួយឆ្នាំកន្លងមកនេះ ប្រទេសចិនតែងតែអនុវត្តយ៉ាងសកម្មនូវគំនិតឯកភាពគ្នាក្នុងអំឡុងពេលនៃដំណើរការកិច្ចពិគ្រោះពិភាក្សានិងអាចជឿទុកចិត្តបាន។ភាគីអាមេរិកតែងតែក្រឡាស់ភ្លាមៗនិងមិនអាចជឿទុកចិត្តបានទេដែលធ្វើឱ្យកិច្ចពិគ្រោះពិភាក្សាត្រូវរាំងស្ទះម្តងហើយម្តងទៀត ហើយធ្វើឱ្យសហគមន៍អន្តរជាតិមានការភ្ញាក់ផ្អើល។
អ្នកនយោបាយមួយចំនួននៃប្រទេសអាមេរិកបានធ្វើឱ្យបញ្ហាសេដ្ឋកិច្ចនិងពាណិជ្ជកម្មទៅជាបញ្ហានយោបាយដើម្បីស្វែងរកផលប្រយោជន៍ផ្ទាល់ខ្លួន និងបានប្រើប្រាស់អ្វីដែលហៅថាសិល្បៈនៃការធ្វើជំនួញក្នុងការទាក់ទងប្រាស្រ័យគ្នារវាងប្រទេស ពួកគេបានល្មើសនឹងមតិឯកភាពដែលបានឈានដល់នៃការពិគ្រោះពិភាក្សាផ្នែកសេដ្ឋកិច្ចនិងពាណិជ្ជកម្មរវាងចិននិងអាមេរិកម្តងហើយម្តងទៀត និងបង្ខូចកិត្តិយសអាមេរិកម្តងហើយម្តងទៀត ប្រការទាំងអស់នេះបានបង្កភាពលំបាកយ៉ាងធ្ងន់ធ្ងរដល់ការចរចាដែលផ្ទុយពីការចង់បានរបស់ប្រជាជនប្រទេសទាំងពីរ។ពេលបច្ចុប្បន្ននេះ សមាគមឧស្សាហកម្មជាច្រើននៃប្រទេសអាមេរិកបានចេញសេចក្តីថ្លែងការណ៍សម្តែងការប្រឆាំងចំពោះសេតវិមានអាមេរិកលើការបន្ថែមយកពន្ធគយទៅលើទំនិញនាំចេញរបស់ចិនទៅកាន់អាមេរិក ដោយបានថ្លែងថា ការធ្វើយ៉ាងនេះនឹងធ្វើឱ្យកសិករ កម្មករនិងអ្នកប្រើប្រាស់អាមេរិករងនូវការខាតបង់កាន់តែច្រើន។ក្រុមប្រឹក្សាជាតិស្តីពីពាណិជ្ជកម្មជាមួយចិននៃអាមេរិកបានសម្តែងការព្រួយបារម្ភចំពោះការបន្ថែមពន្ធនេះនឹងធ្វើឱ្យខូចនូវកិត្តិយសរបស់អាមេរិកដែលជាអ្នកផ្គត់ផ្គង់ដែលអាចទុកចិត្តបាន។
ភាគីចិនបានយល់ឃើញជានិច្ចថា ការបន្ថែមយកពន្ធគយមិនអាចដោះស្រាយបញ្ហាទេ ហើយមានតែដោះស្រាយការខ្វែងគំនិតគ្នាតាមរយៈការពិគ្រោះពិភាក្សា។ភាគីចិនមិនខ្លាចការដាក់សម្ពាធនិងការគំរាមកំហែងណាមួយទេ ហើយក៏បានត្រៀមខ្លួនដោយគ្រប់ជ្រុងជ្រោយរួចហើយដើម្បីឆ្លើយតបនឹងបញ្ហាប្រឈមទាំងអស់។ប្រសិនបើអាមេរិកទទូចអនុវត្តវិធានការបន្ថែមយកពន្ធគយតទៅទៀត នោះ ប្រទេសចិននឹងត្រូវបង្ខំប្រើប្រាស់វិធានការតបតដ៏ចាំបាច់ដើម្បីការពារផលប្រយោជន៍ជាស្នូលរបស់ជាតិនិងផលប្រយោជន៍ជាមូលដ្ឋានរបស់ប្រជាជន។បើមនុស្សមួយចំនួននៃអាមេរិកតែងតែមិនគោរពកិច្ចសន្យារបស់ខ្លួន នោះ មិនថាធ្វើការពិគ្រោះពិភាក្សាយ៉ាងណាក៏មុខជាមិនអាចទទួលលទ្ធផលនោះទេ។
អ្នកបកប្រែ：Sun Lingling