ក្នុងខណៈពេលដែលទិវាមនុស្សចាស់ដែលជាថ្ងៃបុណ្យប្រពៃណីចិនជិតចូលមកដល់ លោកស៊ីជីនភីងប្រធានរដ្ឋចិនបានផ្ញើសំបុត្រឆ្លើយតបនឹងក្រុមមនុស្សចាស់ជរាចំនួន៣០រូបនៃមណ្ឌលចាស់ជរាYijunនៃសមាគមអ្នកជិតខាងម៉ាកាវកាលពីថ្ងៃទី៦ខែតុលា ដើម្បីសម្តែងការសួរសុខទុក្ខនិងលើកទឹកចិត្តយ៉ាងស្និទ្ធស្នាលចំពោះពួកគាត់ ព្រមទាំងជូនពរមនុស្សចាស់គ្រប់រូបនៅទូទាំងប្រទេសចិនឱ្យមានសុខភាពល្អបរិបូរណ៍ មានអាយុយឺនយូរនិងមានជីវភាពប្រកបដោយសុភមង្គល ។
ថ្លែងក្នុងសំបុត្រឆ្លើយតប លោកស៊ីជីនភីងបានលើកឡើងថា អ្នកទាំងអស់គ្នាជាសាក្សីនៃការប្រែប្រួលយ៉ាងខ្លាំងក្លារបស់ប្រទេសជាតិក្នុងរយៈពេលរាប់សិបឆ្នាំកន្លងមក ដែលបានមើលឃើញដោយផ្ទាល់ភ្នែកនូវការអនុវត្តដោយជោគជ័យនូវគោលនយោបាយប្រទេសមួយប្រព័ន្ធគ្រប់គ្រងពីរនៅម៉ាកាវ ។ អ្នកទាំងអស់គ្នាបាននិយាយក្នុងសំបុត្រថា ខ្លួនមានមោទនភាពណាស់ដែលកើតមកជាជនជាតិចិន ខ្ញុំជឿជាក់ថា នេះក៏ជាទឹកចិត្តរបស់ជនរួមជាតិម៉ាកាវទាំងឡាយដែរ ។ រំពឹងថា អ្នកទាំងអស់គ្នាអាចបន្តរួមចំណែករបស់ខ្លួន លើកទឹកចិត្តដល់យុវជនម៉ាកាវឱ្យបន្តវេននូវស្មារតីស្នេហាជាតិនិងស្នេហាម៉ាកាវ ដើម្បីរួមគ្នាកសាងម៉ាកាវឱ្យកាន់តែល្អបវរ ។
គួររំលឹកថា មណ្ឌលចាស់ជរាYijunនៃសមាគមអ្នកជិតខាងម៉ាកាវគឺជាគ្រឹះស្ថានមួយដែលផ្តល់សេវាជំនាញដល់មនុស្សចាស់ជរា។ ពេលថ្មីៗនេះ មនុស្សចាស់ជរា៣០រូបនៃគ្រឹះស្ថាននេះបានសរសេរសំបុត្រជូនលោកស៊ីជីនភីង ដើម្បីរៀបរាប់នូវការអភិវឌ្ឍនិងបម្រែបម្រួលបន្ទាប់ពីម៉ាកាវវិលត្រឡប់ចូលមាតុប្រទេសចិនវិញ ក៏ដូចជាបានបង្ហាញពីទឹកចិត្តរបស់ខ្លួនស្តីពីមោទនភាពដែលកើតមកជាជនជាតិចិននិងការបេ្តជ្ញាចិត្តក្នុងការបន្តផ្សព្វផ្សាយនូវស្មារតីស្នេហាជាតិនិងស្នេហាម៉ាកាវឱ្យបានល្អផងដែរ ៕
អ្នកបកប្រែ：Zheng Lei