តាមការផ្សាយដំណឹងបានឱ្យដឹងថា កាលពីថ្ងៃទី ៧ ខែតុលា ក្រសួងពាណិជ្ជកម្មអាមេរិកបានចេញសេចក្តីប្រកាសមួយថា នឹងបញ្ចូលនាយកដ្ឋានសន្តិសុខសាធារណៈនៃភូមិភាគអ៊ុយហ្គ័រស៊ីនជាំងនិងស្ថាប័នក្រោមឱវាទចំនួន ១៨ មន្ទីរសន្តិសុខសាធារណៈនៃកងកម្លាំងវិស្វកម្មភូមិភាគស៊ីនជាំង ព្រមទាំងសហគ្រាសចិនចំនួន ៨ មានក្រុមហ៊ុនHikvision ជាដើមទៅក្នុងបញ្ជីសហគ្រាសដែលត្រូវគ្រប់គ្រងការនាំចេញ ។ ឆ្លើយតបនឹងបញ្ហានេះ លោកGengshuang អ្នកនាំពាក្យក្រសួងការបរទេសចិនបានថ្លែងក្នុងសន្និសីទសារព័ត៌មានជាប្រចាំកាលពីថ្ងៃទី ៨ ខែតុលាថា ទង្វើរបស់អាមេរិកបានល្មើសនឹងច្បាប់មូលដ្ឋានស្តីពីទំនាក់ទំនងអន្តរជាតិយ៉ាងធ្ងន់ធ្ងរ បានជ្រៀតជ្រែកកិច្ចការផ្ទៃក្នុងប្រទេសចិននិងបំផ្លាញដល់ផលប្រយោជន៍ភាគីចិន ភាគីចិនសម្តែងការមិនពេញចិត្តយ៉ាងខ្លាំងនិងប្រឆាំងយ៉ាងដាច់ខាតចំពោះការនេះ ។
លោកGengshuang បានចង្អុលបង្ហាញថា វិធានការប្រឆាំងភេរវកម្មនិងលុបបំបាត់ភាពជ្រុលនិយមដែលភូមិភាគស៊ីនជាំងបានចាត់ប្រើ គឺក្នុងគោលបំណងបង្ការការកើតឡើងនៃជ្រុលនិយមនិងភេរវនិយមពីឬសគល់ វាសមស្របនឹងច្បាប់ចិននិងការអនុវត្តជាក់ស្តែងនៃអន្តរជាតិទាំងស្រុង បានរួមចំណែកយ៉ាងវិជ្ជមានដល់កិច្ចការប្រឆាំងភេរវកម្មអន្តរជាតិ ។ ការចោទប្រកាន់របស់ភាគីអាមេរិកប្រឆាំងនឹងចិនគឺក្រឡាប់ពីសទៅជាខ្មៅ បានបង្ហាញឱ្យឃើញបន្ថែមទៀតនូវចេតនាអាក្រក់របស់អាមេរិកដែលចង់បំផ្លាញកិច្ចខិតខំផ្នែកប្រឆាំងភេរវកម្មរបស់ភូមិភាគស៊ីនជាំងនិងរារាំងការអភិវឌ្ឍដោយស្ថិរភាពនៃប្រទេសចិន ។
លោកGengshuang បានថ្លែងថា ភាគីចិននឹងបន្តចាត់វិធានការដ៏ម៉ឺងម៉ាត់និងខ្លាំងក្លា ដើម្បីគាំពារអធិបតេយ្យភាពជាតិ សន្តិសុខនិងផលប្រយោជន៍នៃការអភិវឌ្ឍនៃប្រទេសចិន ៕
អ្នកបកប្រែ：Xu Xiaoxia