«អង្ករកម្ពុជានឹងទទួលបានការស្វាគមន៍កាន់តែខ្លាំងក្នុងប្រទេសចិន!»-- ពាណិជ្ជករនាំចេញស្រូវអង្ករកម្ពុជាមានក្តីរំពឹងទុកយ៉ាងខ្លាំងចំពោះការសម្ពោធបើកនៃពិព័រណ៍នាំចូលចិនអន្តរជាតិ
«ម្ហូបចិនញ៉ាំជាមួយអង្ករកម្ពុជាកាន់តែឆ្ងាញ់បំផុត! ខ្ញុំជឿថាអង្ករកម្ពុជានឹងទទួលបានការស្វាគមន៍កាន់តែច្រើនក្នុងប្រទេសចិន។» នេះបើតាមពាក្យសម្តីរបស់លោក សុង សារ៉ន ប្រធានសហព័ន្ធស្រូវអង្ករកម្ពុជានៅពេលលោកទទួលបទសម្ភាសន៍ពីទីភ្នាក់ងារព័ត៌មានចិនស៊ិនហួរកាលពីពេលកន្លងទៅនេះ។
លោក សុង សារ៉ន បានឱ្យដឹងថា សហគ្រាសនាំចេញអង្ករកម្ពុជាចំនួន ១៣ នឹងចូលរួមពិព័រណ៍នាំចូលចិនអន្តរជាតិ (CIIE)លើកទី ២ ដែលនឹងធ្វើឡើងពីថ្ងៃទី ៥ ដល់ថ្ងៃទី ១០ ខែវិច្ឆិកាខាងមុខនេះនៅទីក្រុងសៀងហៃប្រទេសចិន។ សហគ្រាសកម្ពុជាទាំងនេះនឹងចាប់យកឱកាសដ៏ល្អនៃពិព័រណ៍នេះ ដើម្បីជំរុញឱ្យអង្ករដែលមានគុណភាពខ្ពស់របស់កម្ពុជាអាចចូលក្នុងទីផ្សារចិនក៏ដូចជាទីផ្សារអន្តរជាតិ។
លោកបានបន្តបង្ហាញថា បន្ទាប់ពីបានចូលរួមពិព័រណ៍នាំចូលចិនអន្តរជាតិលើកដំបូងនាឆ្នាំទៅ ចំនួននាំចេញអង្ករកម្ពុជាទៅចិនបានកើនឡើងយ៉ាងខ្លាំង។ រយៈពេល ៩ ខែដើមឆ្នាំ ២០១៩ នេះ កម្ពុជាបាននាំចេញអង្ករទៅកាន់ប្រទេសចិនចំនួន 15.78 ម៉ឺនតោន បានកើនឡើងចំនួន 44 % បើប្រៀបធៀបនឹងរយៈពេលដូចគ្នានាឆ្នាំទៅមិញ។ ការនាំចេញទៅចិនត្រូវនឹងចំនួន 39.6 % នៃការនាំចេញអង្ករសរុបរបស់កម្ពុជា។ ប្រទេសចិនជាទីផ្សារធំបំផុតសម្រាប់ការនាំចេញអង្ករកម្ពុជា៕
អ្នកបកប្រែ：Deng Qian