កាលពីថ្ងៃទី ១៧ ខែធ្នូនៅក្នុងសន្និសីទសារព័ត៌មានជាប្រចាំដែលធ្វើឡើងនៅក្រុងប៉េកាំង លោកGengshuang អ្នកនាំពាក្យក្រសួងការបរទេសចិនបានថ្លែងថា ប្រទេសចិននឹងបន្តបើកទូលាយចំពោះសហគ្រាសទូរគមនាគមន៍នៃបណ្តាប្រទេសនានា រួមទាំងសហគ្រាសអឺរ៉ុបក្នុងការចូលរួមកិច្ចសហប្រតិបត្តិការផ្នែកទីផ្សារ5Gនៃប្រទេសចិន ហើយរំពឹងថាបណ្តាប្រទេសនានាផ្សេងទៀតក៏អាចផ្តល់បរិយាកាសធ្វើពាណិជ្ជកម្មដ៏បើកទូលាយ យុត្តិធម៌និងមិនរើសអើងដល់សហគ្រាសចិនដែរ ។
លោកGengshuang បានថ្លែងថា នាពេលកន្លងទៅថ្មីៗនេះមានកិច្ចពិភាក្សាអំពីបញ្ហា 5G នៃក្រុមហ៊ុនHuaweiក្នុងប្រទេសអាល្លឺម៉ង់ ភាគីចិនមានការព្រួយបារម្ភដល់គំនិតខុសឆ្គងរបស់បក្សពួកនិងឥស្សរជនមួយចំនួននៃអាល្លឺម៉ង់ដែលប៉ុនប៉ងច្រានចោលសហគ្រាសចិនដោយមធ្យោបាយនយោបាយ ហើយសម្គាល់ថាវាល្មើសនឹងស្មារតីបើកទូលាយ បរិយាប័ន្ន ប្រកួតប្រជែងដោយយុត្តិធម៌និងសេដ្ឋកិច្ចទីផ្សារដែលអាល្លឺម៉ង់តែងតែប្រកាន់ខ្ជាប់ នឹងបំផ្លាញផលប្រយោជន៍និងកិត្តិយសលើឆាកអន្តរជាតិរបស់អាល្លឺម៉ង់ ។
លោកGengshuangសង្កត់ធ្ងន់ថា រដ្ឋាភិបាលចិនមិនដែលគាំទ្រសហគ្រាសធ្វើសកម្មភាពដែលបំផ្លាញផលប្រយោជន៍សន្តិសុខស្របច្បាប់របស់ប្រទេសដទៃនោះទេ ហើយគ្មានច្បាប់ណាមួយតម្រូវឱ្យសហគ្រាសដំឡើងទ្វារខាងក្រោយឬប្រមូលការណ៍សម្ងាត់នៃបរទេសឡើយ ៕
អ្នកបកប្រែ：Xu Xiaoxia