កាលពីយប់ថៃ្ងទី ១២ ខែមីនា លោក ស៊ីជីនភីង ប្រធានរដ្ឋចិនបានសន្ទនាតាមទូរសព្ទជាមួយលោក António Guterres អគ្គលេខាធិការអង្គការសហប្រជាជាតិតាមការណាត់។
លោក ស៊ីជីនភីង បានចង្អុលបង្ហាញថា បន្ទាប់ពីកិច្ចខិតខំប្រឹងប្រែងដ៏លំបាក ស្ថានភាពនៃការបង្ការនិងគ្រប់គ្រងការរាតត្បាតនៃជំងឺកូវីដ-១៩ នៅក្នុងប្រទេសចិនបានប្រសើរឡើងហើយផលិតកម្មនិងសណ្តាប់ធ្នាប់នៃជីវភាពរស់នៅក៍បានប្រសើរឡើងឡើងវិញផងដែរ។នៅជំហានបន្ទាប់ រដ្ឋាភិបាលចិននឹងបន្តពង្រឹងការបង្ការនិងគ្រប់គ្រងការរាតត្បាតនៃជំងឺកូវីដ-១៩ ទន្ទឹមគ្នានឹងការជំរុញការអភិវឌ្ឍសេដ្ឋកិច្ចនិងសង្គមជាដើម។លោកជឿជាក់ថា ប្រជាជនចិនប្រាកដជានឹងយកជ័យជម្នះលើការប្រយុទ្ធប្រឆាំងនឹងការរីករាលដាលនៃជំងឺនេះមិនខាននិងមុខជានឹងសម្រេចបាននូវគោលដៅអភិវឌ្ឍន៍សេដ្ឋកិច្ចនិងសង្គមរបស់ខ្លួនតាមការគ្រោងទុកផងដែរ។
លោក ស៊ីជីនភីង បានសង្កត់ធ្ងន់ថា ប្រទេសចិនមានឆន្ទៈក្នុងការចែករំលែកនូវបទពិសោធនៃការបង្ការនិងគ្រប់គ្រងការរាតត្បាតនៃជំងឺនេះជាមួយបណ្តាប្រទេសពាក់ព័ន្ធនិងអនុវត្តការសិក្សាស្រាវជ្រាវរួមគ្នា ក៍ដូចជាការអភិវឌ្ឍឱសថនិងវ៉ាក់សាំងព្រមទាំងផ្តល់ជំនួយតាមសមត្ថភាពរបស់ខ្លួនដល់ប្រទេសមួយចំនួនដែលមានការរីករាលដាលនៃជំងឺនេះ។
លោក António Guterres ជឿជាក់ថា ប្រទេសចិននឹងមិនត្រឹមតែអាចយកឈ្នះលើការប្រយុទ្ធប្រឆាំងនឹងការរីករាលដាលនៃជំងឺនេះក្នុងពេលឆាប់ៗប៉ុណ្ណោះទេ ថែមទាំងអាចស្តារសណ្តាប់ធ្នាប់នៃសេដ្ឋកិច្ចឡើងវិញដែលនឹងមិនត្រឹមតែផ្តល់ផលប្រយោជន៍ដល់ប្រជាជនចិនប៉ុណ្ណោះទេ ថែមទាំងផ្តល់វិភាគទានសំខាន់ៗដល់ពិភពលោកផងដែរ។អង្គការសហប្រជាជាតិសូមថ្លែងអំណរគុណដល់ប្រទេសចិនចំពោះការផ្តល់ជំនួយគាំទ្រដល់បណ្តាប្រទេសនានាដែលមានការលំបាកក្នុងការប្រយុទ្ធប្រឆាំងនឹងជំងឺនេះ៕
អ្នកបកប្រែ：Wei Wei