ថ្ងៃទី ២៩ ខែ មីនា លោក ស៊ី ជីនភីង ប្រធានរដ្ឋចិនបានអញ្ជើញចុះត្រួតពិនិត្យការងារនៅខេត្តZhejiang ។ នេះជាលើកទីបួនហើយដែលលោកស៊ី ជីនភីង ប្រធានរដ្ឋចិនបានអញ្ជើញចុះត្រួតពិនិត្យការងារនៅតាមខេត្តតាំងពីការចាប់ប្រយុទ្ធប្រឆាំងនឹងករណីជំងឺឆ្លងមក ។
គោលដៅទីមួយនៃដំណើរត្រួតពិនិត្យការងាររបស់លោក គឺតំបន់កំពង់ផែChuanshan នៃកំពង់ផែZhoushan ក្រុងNingbo ។ នៅទីនោះ លោកបានស្វែងយល់ពីសភាពការណ៍ស្តារផលិតកម្មឡើងវិញ ។
សូមបញ្ជាក់ថា ពិតមែនតែបានរងផលប៉ះពាល់ពីករណីជំងឺឆ្លង ប៉ុន្តែក្នុងអំឡុងពេលពីរខែដើមឆ្នាំនេះ កំពង់ផែZhoushan បានសម្រេចការលើកដាក់ទំនិញ ១៦៣លានតោន ដែលជាចំនួនលើសពី៩៨ភាគរយនៃចំនួនឆ្នាំមុន បានសម្រេចការលើកដាក់កុងតឺន័រ៤០៦ម៉ឺន តួលេខនេះជាចំនួន៩០ភាគរយនៃចំនួនឆ្នាំមុន ។
លោក ស៊ី ជីនភីង បានចុះត្រួតពិនិត្យការងារនៅកំពង់ផែធំជាងគេនៅលើពិភពលោកលើកនេះ ជាសញ្ញាបង្ហាញយ៉ាងច្បាស់ពីការរួមគ្នាគាំពារស្ថិរភាពនៃខ្សែសង្វាក់ឧស្សាហកម្មនិងខ្សែសង្វាក់ផ្គត់ផ្គងជាសកល ។
គោលដៅទីពីរនៃដំណើរត្រួតពិនិត្យការងាររបស់លោក ស៊ីជីនភីងលើកនេះ គឺសួនឧស្សាហកម្មផលិតពុម្ពគ្រឿងបង្គុំនិងគ្រឿងបន្លាស់រថយន្តDaqi នៅខណ្ឌBeilun ក្រុង Ningbo ។ បច្ចុប្បន្ន ក្នុងសួនឧស្សាហកម្មនេះមានសហគ្រាសចំនួនជាង៧០ ត្រូវបានវាយតម្លៃថាជា "មូលដ្ឋានគំរូនៃឧស្សាហកម្ម សិតពុម្ពរបស់ប្រទេសចិន " ។
លោក ស៊ី ជីនភីងបានថ្លែងថា “ក្នុងគ្រាកាន់តែលំបាក កាន់តែត្រូវប្រើចក្ខុវិស័យគ្រប់ជ្រុងជ្រោយ សត្យានុម័តនិងយូរអង្វែងទៅមើលពីការអភិវឌ្ឍរបស់ប្រទេសចិន និងកាន់តែត្រូវពង្រឹងជំនឿចិត្តយ៉ាងមុតមាំថែមទៀត” ៕
អ្នកបកប្រែ：Guo Xiangqing