ទាក់ទិននឹងរឿងដែលកាសែត Yomiuri Shimbun ជប៉ុនបានចុះផ្សាយបទអត្ថាធិប្បាយនាពេលកន្លងទៅនេះដោយបានថ្កោលទោសចំពោះប្រទេសចិនថាបានបណ្តាលឱ្យករណីជំងឺកូវីដ១៩រីករាលដាល លោក Zhao Lijian អ្នកនាំពាក្យក្រសួងការបរទេសចិនបានថ្លែងកាលពីថ្ងៃទី១៣ខែមេសាថា អត្ថបទពាក់ព័ន្ធនៃកាសែតYomiuri Shimbunជប៉ុនគឺមិនគិតពីការពិតជាក់ស្តែង បានបរិហារកេរ្តិ៍រដ្ឋាភិបាលនិងបក្សកុម្មុយនិស្តចិនក្នុងចេតនាអាក្រក់ដែលពោរពេញទៅដោយភាពអគតិ ទស្សនៈលំអៀងនិងភាពក្រអឺតក្រទមចំពោះប្រទេសចិន ប្រការនេះគឺជាការបំភាន់ភ្នែកសហគមន៍អន្តរជាតិ បូករួមទាំងប្រជាជនជប៉ុនឱ្យយល់ច្រឡំចំពោះប្រទេសចិនដែលជាការបំពានយ៉ាងធ្ងន់ធ្ងរនូវបទដ្ឋានវិជ្ជាជីវៈ ក្រមសីលធម៌និងសតិសម្បជញ្ញៈជាអ្នកសារព័ត៌មាន ប្រទេសចិនមិនអាចទទួលយកការមួលបង្កាច់និងលាបពណ៌ទាំងនេះឡើយ ហើយក៏បានលើកការតវ៉ាយ៉ាងម៉ឺងម៉ាត់ចំពោះអ្នកទទួលខុសត្រូវពាក់ព័ន្ធនៃកាសែតនេះដែរ ។
គួររំលឹកថា កាសែតYomiuri Shimbunជប៉ុនបានចុះផ្សាយអត្ថបទកាលពីថ្ងៃទី១២ខែមេសាថា ប្រព័ន្ធរបបនៃរដ្ឋាភិបាលនិងបក្សកុម្មុយនិស្តចិនជាមូលហេតុដែលបណ្តាលឱ្យករណីជំងឺកូវីដ១៩រីករាលដាលខ្លាំង ហើយប្រទេសចិនមិនទទួលកំហុសរបស់ខ្លួនក្នុងការទប់ទល់នឹងជំងឺឆ្លង ៕
អ្នកបកប្រែ：Zheng Lei