លោកស៊ីជីនភីងប្រធានរដ្ឋចិនចុះផ្សាយអត្ថបទលើកឡើងថា ការរួមសាមគ្គីនិងកិច្ចសហប្រតិបត្តិការជាអាវុធដ៏ខ្លាំងក្លាបំផុតរបស់សហគមន៍អន្តរជាតិសម្រាប់យកឈ្នះលើជំងឺឆ្លង
ទស្សនវដ្តីឈ្មោះ”Q iuShi”ដែលបោះពុម្ភផ្សាយនៅថ្ងៃទី១៦ខែមេសាបានចុះផ្សាយអត្ថបទរបស់លោកស៊ីជីនភីងប្រធានរដ្ឋចិនក្រោមចំណងជើងថា” “ការរួមសាមគ្គីនិងកិច្ចសហប្រតិបត្តិការជាអាវុធដ៏ខ្លាំងក្លាបំផុតរបស់សហគមន៍អន្តរជាតិសម្រាប់យកឈ្នះលើជំងឺឆ្លង”។
អត្ថបទមួយនេះបានចែងថា បច្ចុប្បន្ននេះ ករណីជំងឺកូវីដ១៩បាននិងកំពុងរីករាលដាលនៅទូទាំងពិភពលោកដែលបាននាំមកនូវការគំរាមកំហែងយ៉ាងខ្លាំងដល់សុវត្ថិភាពអាយុជីវិតនិងសុខភាពរបស់ប្រជាជន ក៏ដូចជាបាននាំមកនូវបញ្ហាប្រឈមយ៉ាងខ្លាំងដល់សន្តិសុខសុខាភិបាលសាធារណៈពិភពលោកទាំងមូលផងដែរ។ វីរុសគ្មានព្រំដែននោះទេ ហើយជំងឺឆ្លងក៏មិនបែងចែកពូជសាសន៍ដែរ។ ប្រការដែលសហគមន៍អន្តរជាតិត្រូវការបំផុតគឺជំនឿចិត្តយ៉ាងមុតមាំ សាមគ្គីគ្នាជាធ្លុងមួយ រួមសហការគ្នាទប់ទល់នឹងជំងឺឆ្លង បង្កើនកិច្ចសហប្រតិបត្តិការអន្តរជាតិដោយគ្រប់ជ្រុងជ្រោយ ដើម្បីចាប់ដៃគ្នាយកឈ្នះលើការប្រយុទ្ធប្រឆាំងរវាងមនុស្សជាតិនិងជំងឺឆ្លងលើកនេះ ។
អត្ថបទបានគូសបញ្ជាក់ថា ជានិច្ចកាល រដ្ឋាភិបាលចិនតែងតែប្រកាន់យកអាកប្បកិរិយាបើកចំហ មានតម្លាភាព និងទទួលខុសត្រូវ បានជូនដំណឹងអំពីជំងឺឆ្លងដោយទាន់ពេលវេលាចំពោះអង្គការសុខភាពពិភពលោក ក៏ដូចជាប្រទេសនិងតំបន់ពាក់ព័ន្ធផងដែរ ដើម្បីចែករំលែកដោយគ្មានលាក់ទុកនូវបទពិសោធន៍ស្តីពីការបង្ការ គ្រប់គ្រងនិងព្យាបាលជំងឺឆ្លងជាមួយអង្គការសុខភាពពិភពលោកនិងសហគមន៍អន្តរជាតិ ។
ប្រទេសចិនរីករាយរួមសហការជាមួយអង្គការសុខភាពពិភពលោកនិងសហគមន៍អន្តរជាតិ ដើម្បីគាំពារឱ្យបានល្អនូវសន្តិសុខសុខាភិបាលសាធារណៈក្នុងតំបន់និងពិភពលោកទាំងមូល ។លោកបានលើកសំណើ៤ចំណុច៖ ទី១ ធ្វើការប្រយុទ្ធប្រឆាំងយ៉ាងមុតមាំនូវជំងឺកូវីដ១៩នៅទូទាំងពិភពលោក ទី២ រួមគ្នាបង្ការនិងគ្រប់គ្រងជំងឺឆ្លងលើផ្ទៃអន្តរជាតិដោយមានប្រសិទ្ធភាព ទី៣ គាំទ្រយ៉ាងសកម្មឱ្យអង្គការអន្តរជាតិដើរតួនាទីរបស់ខ្លួន ទី៤ បង្កើនកិច្ចសម្របសម្រួលចំពោះគោលនយោបាយម៉ាក្រូសេដ្ឋកិច្ចអន្តរជាតិ ៕
អ្នកបកប្រែ：Zheng Lei