យប់ថ្ងៃទី១៦ខែមេសា លោកស៊ីជីនភីងប្រធានរដ្ឋចិនបានជួបពិភាក្សាតាមទូរស័ព្ទជាមួយលោកភូទីនប្រធានាធិបតីរុស្ស៊ី។
ថ្លែងក្នុងកិច្ចជំនួប លោកស៊ីជីនភីងបានលើកឡើងថា ចិននិងរុស្ស៊ីមានទឹកដីជាប់គ្នា ហើយដួងចិត្តរបស់ប្រជាជននៃប្រទេសទាំងពីរក៏បានតភ្ជាប់គ្នាផងដែរ។ ប្រទេសរុស្ស៊ីបានផ្តល់ការគាំទ្រយ៉ាងពេញទំហឹងក្នុងខណៈពេលដ៏លំបាកបំផុតដែលប្រទេសចិនប្រយុទ្ធប្រឆាំងនឹងជំងឺឆ្លង ប្រជាជនចិនចងចាំក្នុងដួងចិត្តជានិច្ច។ ប៉ុន្មានថ្ងៃកន្លងទៅនេះ ក្រុមអ្នកជំនាញវេជ្ជសាស្រ្តដែលរដ្ឋាភិបាលចិនចាត់បញ្ជូនទៅកាន់រុស្ស៊ីកំពុងបំពេញការងារនៅក្រុងម៉ស្គូ។ ភាគីចិនបានផ្តល់ជំនួយមួយចំនួនដល់ភាគីរុស្ស៊ី ហើយភាគីចិននឹងបន្តផ្តល់ការគាំទ្រយ៉ាងមុតមាំដល់ភាគីរុស្ស៊ីតទៅទៀត។ លោកស៊ីជីនភីងបានគូសបញ្ជាក់ថា ការធ្វើឱ្យជំងឺឆ្លងក្លាយជាបញ្ហានយោបាយវាគ្មានអំណោយផលដល់កិច្ចសហប្រតិបត្តិការអន្តរជាតិនោះទេ។ ចិននិងរុស្ស៊ីគួរតែចាប់ដៃសហការគ្នា ដើម្បីរួមគ្នាគាំពារសន្តិសុខសុខាភិបាលសាធារណៈនៃពិភពលោកទាំងមូល។
ជាការឆ្លើយតប លោកភូទីនបានថ្លែងថា ចាប់ពីជំងឺឆ្លងបានផ្ទុះរាលដាលមក ប្រទេសទាំងពីររុស្ស៊ីនិងចិនបានរួមសាមគ្គីនិងធ្វើកិច្ចសហប្រតិបត្តិការគ្នាជាប់រហូត ភាគីទាំងពីរបានគាំទ្រគ្នាទៅវិញទៅមកដែលបង្ហាញពីលក្ខណៈយុទ្ធសាស្រ្តនិងកម្រិតខ្ពស់នៃទំនាក់ទំនងរវាងរុស្ស៊ីនិងចិន ។ ទង្វើរបស់បុគ្គលមួយចំនួនតូចដែលប៉ុនប៉ងចង់លាបពណ៌ប្រទេសចិនក្នុងបញ្ហាប្រភពវីរុសគឺមិនអាចទទួលយកបានទេ៕
អ្នកបកប្រែ：Zhai Qianqian