ខណៈពេលទិវាអវកាសប្រទេសចិនលើកទី៥និងគម្រប់៥០ឆ្នាំនៃការបាញ់បង្ហោះផ្កាយរណប“Dongfanghong១”ដោយជោគជ័យជិតចូលមកដល់ លោកស៊ីជីនភីង អគ្គលេខាធិការនៃគណៈកម្មាធិការមជ្ឈិមបក្សកុម្មុយនិស្ត ប្រធានរដ្ឋនិងជាប្រធានគណៈកម្មាធិការយោធាមជ្ឈិមចិនបានតបលិខិតរបស់អ្នកវិទ្យាសាស្រ្តជើងចាស់ដែលចូលរួមភារកិច្ចបង្ហោះផ្កាយរណប“Dongfanghong១”កាលពីថ្ងៃទី ២៣ខែមេសាដោយសម្តែងការសួរសុខទុក្ខយ៉ាងស្មោះហើយបានលើកពីក្តីរំពឹងទៅលើបុគ្គលិកអវកាសក្នុងការពន្លឿនកិច្ចកសាងប្រទេសខ្លាំងក្លាខាងអវកាស។
ក្នុងសារលិខិត លោកស៊ីជីនភីងបានថ្លែងថា ៥០ឆ្នាំមុន ផ្កាយរណប“Dongfanghong១”ត្រូវបានបាញ់បង្ហោះដោយជោគជ័យ។ អ្នកទាំងអស់គ្នាបានបង្កើតសមិទ្ធផលដ៏អស្ចារ្យដែលគួរឱ្យគ្រប់ជនជាតិនៅប្រទេសចិនមានមោទនភាព និងបង្ហាញឱ្យឃើញនូវស្មារតីខិតខំតស៊ូប្រយុទ្ធរបស់ប្រជាជាតិចិន។
លោកស៊ីជីនភីងបានគូសបញ្ជាក់ថា បុគ្គលិកអវកាសក្នុងយុគសម័យថ្មីត្រូវចាត់ទុកបុគ្គលិកអវកាសជើងចាស់ជាគំរូ ហ៊ានពុះពារឧបសគ្គទាំងអស់ ក្នុងការសិក្សាស្រាវជ្រាវអវកាសនៃប្រទេសចិនដោយមានភាពកាន់នឹងនរនិងយូរអង្វែង ដើម្បីសម្រេចសុបិនដ៏អស្ចារ្យស្តីពីការកសាងប្រទេសជាតិខ្លាំងក្លាផ្នែកអវកាសក្នុងពេលឆាប់ៗ។
អ្នកបកប្រែ：Sun Lingling