ភារកិច្ចហោះហើរជាលើកដំបូងនៃរ៉ុក្កែតដឹកជញ្ជូនLong March-៥Bនៃប្រទេសចិនទទួលបានជោគជ័យដ៏គាប់ប្រសើរព្រមទាំងចាប់ផ្តើមកិច្ចកសាងស្ថានីយអវកាសជំនាន់ថ្មីនៃប្រទេសចិនដោយបង្ហោះយានអវកាសបែបថ្មីដែលមានទម្ងន់២២តោន
កាលពីវេលាម៉ោង១៨ថ្ងៃទី៥ខែឧសភា រ៉ុក្កែតដឹកជញ្ជូនLong Marc-៥Bត្រូវបានបាញ់បង្ហោះនៅស្ថានីយបង្ហោះយានអវកាសWenchang ហើយបានចូលទៅក្នុងគន្លងតារាវិថីតាមការកំណត់បន្ទាប់ពីហោះហើរបាន៤៨៨វិនាទី និងបានបញ្ជូនយានអវកាសពិសោធន៍នៃយានអវកាសផ្ទុកមនុស្សជំនាន់ថ្មីដែលមានទម្ងន់២២តោនទៅលើលំហអវកាសដោយជោគជ័យ។
នេះជាលើកដំបូងដែលបង្ហោះយានអវកាសមានទម្ងន់លើសពី២ម៉ឺនគីឡូក្រាមតាមរយៈរ៉ុក្កែតដឹកជញ្ជូនរបស់ប្រទេសចិន ក៏ដូចជាទ្វីបអាស៊ី។តាមប្រភពព័ត៌មានឱ្យដឹងថា ប្រទេសចិនមានផែនការកសាងស្ថានីយអវកាសឱ្យរួចរាល់នៅឆ្នាំ២០២២ដែលនឹងបង្ហោះយានអវកាស៤គ្រឿងក្នុងអំឡុងពេលនេះ។បច្ចុប្បន្ននេះ អវកាសយានិកត្រូវបានជ្រើសរើសរួចហើយដែលកំពុងទទួលការហ្វឹកហាត់។យានអវកាសពិសោធន៍ជំនាន់ថ្មីដែលស្រាវជ្រាវនិងផលិតដោយប្រទេសចិនលើកនេះមានកម្ពស់ជិត៩ម៉ែត្រដែលអាចផ្ទុកអវកាសយានិកម្តងចំនួនពី៦ទៅ៧នាក់នាពេលអនាគត។
យោងតាមផែនការនេះ ក្នុងឆ្នាំ២០២០ រ៉ុក្កែតដឹកជញ្ជូនLong Marchលេខ៥នឹងត្រូវបាញ់បង្ហោះបីលើកដែលរួមទាំង យានអវកាសពិសោធន៍នៃយានអវកាសផ្ទុកមនុស្សជំនាន់ថ្មី យានរុករកនិងអភិវឌ្ឍន៍ភពព្រះអង្គារនិងយានរុករកនិងអភិវឌ្ឍន៍ភពព្រះចន្ទChange លេខ5។
អ្នកបកប្រែ：Ma Xiaoqing