លោក ស៊ីន ជីនភីង អគ្គលេខាធិការនៃគណៈកម្មាធិការមជ្ឈិមបក្សកុម្មុយនិស្តចិន ប្រធានរដ្ឋនិងជាប្រធានគណៈកម្មាធិការយោធាមជ្ឈិមចិនបានតាងនាមមជ្ឈិមបក្ស សូមសម្តែងការជូនពរនិងសួរសុខទុក្ខយ៉ាងស្មោះចំពោះ គិលានុបដ្ឋាកនៅទូទាំងប្រទេសចិនក្នុងឱកាសទិវាគិលានុបដ្ឋាកអន្តរជាតិ !
លោក ស៊ី ជីនភីងបានលើកឡើងថា បន្ទាប់ពីករណីជំងឺកូវីដ១៩បានផ្ទុះឡើង គិលានុបដ្ឋាកយ៉ាងច្រើនមិនគិតពីផលប្រយោជន៍ផ្ទាល់ខ្លួន បានខិតខំប្រឹងប្រែងប្រយុទ្ធប្រឆាំងនឹងជំងឺឆ្លងទាំងក្នុងស្រុកនិងអន្តរជាតិយ៉ាងអង់អាចក្លាហាន បានរួមចំណែកដ៏សំខាន់ក្នុងការប្រយុទ្ធប្រឆាំងជំងឺឆ្លងនិងយកឈ្នះក្នុងការបង្ការនិងគ្រប់គ្រងជំងឺឆ្លង ក៏ដូចជាធានានូវសុវត្ថិភាពអាយុជីវិតនិងសុខភាពរបស់ប្រជាជននៃបណ្តាប្រទេសនានា ហើយក៏បានធ្វើសកម្មភាពជាក់ស្តែងដោយបានអនុវត្តតាមស្មារតីស្តីពីការគោរពអាយុជីវិត ការជួយសង្គ្រោះអាយុជីវិតនិងព្យាបាលអ្នកជំងឺ សុខចិត្តលះបង់កម្លាំងកាយចិត្តនិងមានក្តីស្រឡាញ់គ្មានព្រំដែន ។
លោក ស៊ី ជីនភីងបានគូសបញ្ជាក់ថា ការងារថែទាំអ្នកជំងឺជាចំណែកសំខាន់ក្នុងកិច្ចការសុខាភិបាល ។ គណៈកម្មការបក្សនិងរដ្ឋបាលគ្រប់ជាន់ថ្នាក់គួរតែយកចិត្តទុកដាក់និងថែរក្សាចំពោះគិលានុបដ្ឋាកទាំងឡាយ ហើយចាត់ទុកកិច្ចកសាងក្រុមគិលានុបដ្ឋាកជាការងារមូលដ្ឋានដ៏សំខាន់ក្នុងការអភិវឌ្ឍបុព្វហេតុសុខាភិបាល ត្រូវធ្វើឱ្យប្រសើរឡើងនូវយន្តការលើកទឹកចិត្ត ត្រូវផ្សាព្វផ្សាយរឿងរ៉ាវរបស់បុគ្គលគំរូ និងគាំទ្រគិលានុបដ្ឋាកដ៏ឆ្នើមប្រកបការងារថែទាំអ្នកជំងឺឱ្យបានយូរ ។ ដូច្នេះ សង្គមទាំងមូលត្រូវយោគយល់និងគាំទ្រការងាររបស់គិលានុបដ្ឋាក ៕
អ្នកបកប្រែ：Guo Xiangqing