ថ្ងៃទី ១៤ ខែឧសភា គណៈកម្មាធិការអចិន្ត្រៃយ៍នៃការិយាល័យនយោបាយកមជ្ឈិមបក្សកុម្មុយនិស្តចិនបានបើកធ្វើកិច្ចប្រជុំ ដើម្បីវិភាគពីស្ថានភាពបង្ការនិងគ្រប់គ្រងជំងឺកូវីដ១៩ទាំងជាតិនិងអន្តរជាតិ ព្រមនិងសិក្សានិងរៀបចំចាត់ចែងការងារ ក្នុងន័យធ្វើឱ្យវិធានការបង្ការនិងគ្រប់គ្រងជំងឺឆ្លងជាប្រចាំអាចទទួលបានការអនុវត្តដោយមានប្រសិទ្ធភាព ក៏ដូចជាបានសិក្សាអំពីការលើកកម្ពស់កម្រិតស្ថិរភាពនិងកម្លាំងប្រកួតប្រជែងនៃខ្សែសង្វាក់ឧស្សាហកម្មនិងខ្សែសង្វាក់ផ្គត់ផ្គង់របស់ប្រទេសចិនផងដែរ ។ លោក ស៊ីជីនភីង អគ្គលេខាធិការមជ្ឈិមបក្សកុម្មុយនិស្តចិនបានអញ្ជើញជាអធិបតីព្រមទាំងថ្លែងសុន្ទរកថាគន្លឹះ ។
ក្នុងកិច្ចប្រជុំ លោក ស៊ី ជីនភីង បានលើកឡើងថា បច្ចុប្បន្ន ការងារបង្ការនិងគ្រប់គ្រងជំងឺឆ្លងនៅទូទាំងប្រទេសចិនមានស្ថិរភាពល្អប្រសើរជាទូទៅ ប៉ុន្តែព្រមជាមួយគ្នានេះ ស្ថានការណ៍ជំងឺឆ្លងនៅក្រៅដែនមានភាពកាន់តែធ្ងន់ធ្ងរនិងស្មុគស្មាញ ដូច្នេះ ភារកិច្ចរបស់ប្រទេសចិនដែលបង្ការកុំឱ្យជំងឺឆ្លងរីករាលដាលជាថ្មីឡើងវិញ នៅតែមានភាពលំបាកនិងធ្ងន់ធ្ងរដដែល ។
លោក ស៊ី ជីនភីង បានគូសបញ្ជាក់ថា ត្រួវបង្កើនការងារបង្ការកុំឱ្យមានជំងឺឆ្លងរាតត្បាតឡើងវិញនៅតំបន់និងទីតាំងសំខាន់ៗ ។ រដ្ឋបាលក្រុងប៉េកាំងត្រូវបង្កើនការងារបង្ការនិងគ្រប់គ្រងជំងឺឆ្លងក្នុងអំឡុងពេលបើកធ្វើមហាសន្និបាតនៃសភាទាំងពីរ ។ ក្រៅពីនេះ ត្រួវណែនាំឱ្យសាលារៀនគ្រោងផែនការបង្ការនិងគ្រប់គ្រងជំងឺឆ្លងក្នុងខណៈពេលបើកឱ្យសិស្សចូលរៀនឡើងវិញ ដើម្បីធានាសុវត្ថិភាពនិងសុខភាពរបស់គ្រូបង្រៀននិងសិស្សានុសិស្ស ។
កិច្ចប្រជុំលើកនេះបានគូសបញ្ជាក់ថា ត្រូវចាត់វិធានការកាន់តែមានភាពរស់រវើក សំដៅចំពោះសភាពការណ៍ថ្មីនិងនិន្នាការថ្មីនៅក្រៅដែន ។ ត្រូវបន្តធ្វើឱ្យបានល្អនូវការងារយកចិត្តទុកដាក់និងថែទាំប្រជាពលរដ្ឋចិននៅបរទេស ត្រូវបន្តធ្វើឱ្យកិច្ចសហប្រតិបត្តិការអន្តរជាតិលើវិស័យបង្ការនិងគ្រប់គ្រងជំងឺឆ្លងមានភាពកាន់តែស៊ីជម្រៅ ៕
អ្នកបកប្រែ：Guo Xiangqing