ថ្ងៃទី៩ ខែមិថុនា លោកស៊ីជីនភីងប្រធានរដ្ឋចិននិងលោកRodrigo Duterteប្រធានាធិបតីហ្វីលីពីនបានផ្ញើសារលិខិតជូនពរទៅវិញទៅមក ដើម្បីអបអរសាទរខួបទី៤៥នៃការបង្កើតទំនាក់ទំនងការទូតរវាងប្រទេសចិននិងហ្វីលីពីន។
នៅក្នុងសារលិខិតជូនពរ លោកស៊ីជីនភីងបានគូសបញ្ជាក់ថា ប្រទេសចិននិងហ្វីលីពីនជាប្រទេសជិតខាងដ៏មេត្រីភាព។ប៉ុន្មានឆ្នាំចុងក្រោយនេះ ទំនុកចិត្តទៅវិញទៅមកផ្នែកគោលនយោបាយរវាងប្រទេសចិននិងហ្វីលីពីនមានភាពកាន់តែស៊ីជម្រៅ ការរួមគ្នាកសាងខ្សែក្រវាត់និងផ្លូវមានសមិទ្ធផលយ៉ាងច្រើន បានរួមចំណែកយ៉ាងសកម្មដល់ការអភិវឌ្ឍដោយស្ថិរភាពក្នុងតំបន់ ព្រមទាំងបានជំរុញទំនាក់ទំនងសហប្រតិបត្តិការជាខាងយុទ្ធសាស្ត្រគ្រប់ជ្រុងជ្រោយរវាងប្រទេសចិននិងហ្វីលីពីនឱ្យបោះជំហានទៅមុខឥតឈប់ឈរ។ភាគីចិនទទួលអារម្មរណ៍ពីទុក្ខលំបាកដូចគ្នាចំពោះហ្វីលីពីនដែលរងគ្រោះដោយសារជំងឺកូវីដ-១៩ដែរ ហើយរីករាយធ្វើកិច្ចខិតខំប្រឹងប្រែងរួមគ្នាជាមួយហ្វីលីពីន ដើម្បីប្រកៀកស្មាគ្នាឆ្លងកាត់ការលំបាក។
ដោយឡែក លោកRodrigo Duterteបានថ្លែងក្នុងសារលិខិតថា បច្ចុប្បន្ន សន្តិសុខនិងស្ថិរភាពលើពិភពលោកបន្តប្រឈមមុខនឹងបញ្ហា ការគំរាមកំហែងខាងសន្តិសុខមិនមែនប្រពៃណី ដូចជាជំងឺកូវីដ-១៩ជាដើមកាន់តែលេចធ្លោ ដូច្នេះការបង្កើនទំនាក់ទំនងភាពជាដៃគូរវាងហ្វីលីពីននិងប្រទេសចិនថែមមួយកម្រិតទៀតគឺមានសារៈសំខាន់ណាស់។ភាគីហ្វីលីពីនចាត់ទុកភាគីចិនជាប្រទេសជិតខាងយ៉ាងជិតស្និទ្ធនិងជាដៃគូសំខាន់ រីករាយធ្វើឱ្យកិច្ចសហប្រតិបត្តិការជាយុទ្ធសាស្ត្រគ្រប់ជ្រុងជ្រោយកាន់តែស៊ីជម្រៅ ដើម្បីជំរុញសន្តិភាព វឌ្ឍនភាពនិងភាពរុងរឿងនៃប្រទេសទាំង២៕
អ្នកបកប្រែ：Liu Yan