#CCFRComment#បទវិភាគ៖ការប៉ុនប៉ងចង់បង្ករឿងហេតុនៅសមុទ្រចិនខាងត្បូងរបស់អ្នកនយោបាយអាមេរិក ដូចជាលោក Pompeo ជាដើមមុខជានឹងបរាជ័យជាមិនខាន
នាពេលថ្មីៗកន្លងទៅនេះ បញ្ហាសមុទ្រចិនខាងត្បូងបានឡើងកម្តៅម្តងទៀត។លោក Pompeo រដ្ឋមន្រ្តីក្រសួងការបរទេសអាមេរិកបានចេញសេចក្តីថ្លែងការណ៍កាលពីថ្ងៃទី ១៣ ខែកក្កដា តាមម៉ោងសហរដ្ឋអាមេរិកដោយអះអាងថា ការទាមទារសិទ្ធិនិងការផ្តើមគំនិតរបស់ទីក្រុងប៉េកាំងលើប្រភពធនធានសមុទ្រចិនខាងត្បូង គឺ"មិនស្របច្បាប់ទាំងស្រុង"។មនុស្សស្ទើរតែគ្រប់ៗគ្នាទាំងអស់សុទ្ធតែបានដឹងថា នេះគឺជាទង្វើចុងក្រោយរបស់រដ្ឋាភិបាលអាមេរិកក្នុងខណៈពេលពិសេសមួយ ជាពិសេស លោក Pompeo មានចេតនាអុជអាលបំបែកបំបាក់ទំនាក់ទំនងរវាងចិននិងអាស៊ាន! យ៉ាងណាមិញ គោលជំហររបស់ប្រទេសអាស៊ានមួយចំនួនលើបញ្ហាសមុទ្រចិនខាងត្បូងធ្វើឱ្យទង្វើរបស់លោក Pompeo ត្រូវរងការវាយបុកយ៉ាងខ្លាំងក្លា ។
លោក Locsin រដ្ឋមន្រ្តីក្រសួងការបរទេសហ្វីលីពីនបានសង្កត់ធ្ងន់ម្តងទៀតនាពេលថ្មីៗនេះអំឡុងពេលជួបពិភាក្សាតាមប្រព័ន្ធវីដេអូជាមួយលោកវ៉ាងអ៊ី សមាជិកក្រុមប្រឹក្សាកិច្ចការរដ្ឋនិងជារដ្ឋមន្រ្តីក្រសួងការបរទេសចិនថា ភាគីហ្វីលីពីនរីករាយបន្តធ្វើកិច្ចខិតខំប្រឹងប្រែងដើម្បីដោះស្រាយឱ្យបានល្អនូវជម្លោះសមុទ្រចិនខាងត្បូងតាមរយៈការពិគ្រោះពិភាក្សាដោយមេត្រីភាពរវាងទ្វេភាគី ជំរុញយ៉ាងសកម្មនូវកិច្ចសហប្រតិបត្តិការតាមសមុទ្រដើម្បីរួមគ្នាគាំពារសន្តិភាពនិងស្ថិរភាពនៅសមុទ្រចិនខាងត្បូង។ព្រមពេលជាមួយគ្នានេះ លោក ស៊ីជីនភីង ប្រធានរដ្ឋចិនបានជួបពិភាក្សាតាមទូរស័ព្ទដោយឡែកពីគ្នាជាមួយលោក Prayuth នាយករដ្ឋមន្រ្តីថៃនិងលោក Lee Hsien Loong នាយករដ្ឋមន្រ្តីសិង្ហបុរី។ភាគីទាំង ៣ សុទ្ធតែបានសង្កត់ធ្ងន់នូវភាពចាំបាច់ក្នុងការពង្រឹងទំនាក់ទំនងទ្វេភាគីនិងគាំពារសន្តិភាពនិងស្ថិរភាពក្នុងតំបន់ ជាពិសេសក្នុងបរិបទនៃសភាពការណ៍ជំងឺឆ្លងនាពេលបច្ចុប្បន្ន កាន់តែត្រូវរួមសុខរួមទុក្ខនិងជួយគ្នាទៅវិញទៅមកដើម្បីរួមគ្នាពុះពារការលំបាក។សម្តេចតេជោ ហ៊ុនសែន នាយករដ្ឋមន្រ្តីកម្ពុជាក៏បានថែ្លងជាច្រើនលើកថា "លោកគាំទ្រប្រទេសពាក់ព័ន្ធដោះស្រាយវិវាទនៅសមុទ្រចិនខាងត្បូងតាមរយៈសន្តិវិធី"និងប្រឆាំងការចូលជ្រៀតជ្រែកពីកម្លាំងបរទេស។
នាពេលបច្ចុប្បន្ននេះ ទន្ទឹមនឹងការបង្កើតយន្តការពិគ្រោះពិភាក្សាលើបញ្ហាដែនសមុទ្ររវាងចិននិងហ្វីលីពីន ចិននិងម៉ាឡេស៊ី ក៏ដូចជាចិននិងវៀតណាម នៅក្រោមការខិតខំប្រឹងប្រែងរួមរបស់ចិននិងបណ្តាប្រទេសអាស៊ាន ស្ថានការណ៍សមុទ្រចិនខាងត្បូងមានស្ថិរភាពជាទូទៅដែលបានបង្ហាញឱ្យឃើញនូវភាពល្អប្រសើរ។ បច្ចុប្បន្ន ការពិគ្រោះពិភាក្សាពាក់ព័ន្ធនឹង"ក្រមប្រតិបត្តិសមុទ្រចិនខាងត្បូង"រវាងចិននិងបណ្តាប្រទេសអាស៊ាននានាបានឈានចូលដំណាក់កាលទី ២ នៃការពិនិត្យពិភាក្សាដែលបង្ហាញនូវការប្តេជ្ញាចិត្តយ៉ាងមុតមាំរបស់គ្រប់ភាគីទាំងអស់ក្នុងការរួមគ្នាគាំពារសន្តិភាពនិងស្ថិរភាពព្រមទាំងសេរីភាពនាវាចរណ៍នៅសមុទ្រចិនខាងត្បូង។
ប្រទេសចិននិងបណ្តាប្រទេសអាស៊ាននានាមានសមត្ថភាពនិងមានពុទ្ធិក្នុងការដោះស្រាយឱ្យបានល្អនូវបញ្ហារបស់ខ្លួន មិនត្រូវការហើយក៏មិនអនុញ្ញាតឱ្យប្រទេសនៅក្រៅតំបន់ណាមួយមកជ្រៀតជ្រែកនោះទេ។ឧបាយកលប៉ុនប៉ងរបស់អ្នកនយោបាយអាមេរិក ដូចជាលោក Pompeo ជាដើមដែលបង្ករឿងហេតុនៅសមុទ្រចិនខាងត្បូងនិងបំផ្លិចបំផ្លាញទំនាក់ទំនងប្រកបដោយស្ថិរភាពរវាងចិននិងបណ្តាប្រទេសអាស៊ាន ក៏ដូចជាបន្តទប់ស្កាត់ការអភិវឌ្ឍរបស់ប្រទេសចិនមុខជានឹងបរាជ័យជាមិនខាន!
អ្នកបកប្រែ：Sun Lingling