កិច្ចប្រជុំកំពូលស្តីពីកិច្ចសហប្រតិបតិ្តការឡានឆាង-មេគង្គលើកទីបីបានប្រារព្ធធ្វើនៅថ្ងៃទី២៤ ខែសីហា លោក លីខឺឈាង នាយករដ្ឋមន្ត្រីចិនបានចូលរួមកិច្ចប្រជុំតាមរយៈប្រព័ន្ធវីដេអូនៅក្រុងប៉េកាំង ។ ឥស្សរជននៃប្រទេសជាច្រើនសម្គាល់ឃើញថា កិច្ចប្រជុំលើកនេះបានគ្រោងផែនទីបង្ហាញផ្លូវដោយគ្រប់ជ្រុងជ្រោយសម្រាប់កិច្ចសហប្រតិបតិ្តការនៃប្រទេសទាំង៦តាមដងទន្លេឡានឆាងនិងមេគង្គនៅពេលអនាគត ប្រការនេះមានអំណោយផលដល់ការជំរុញឱ្យប្រទេសទាំង៦បង្កើនទំនាក់ទំនងភាពជាដៃគូ ធ្វើឱ្យកិច្ចសហប្រតិបតិ្តការជាក់ស្តែងលើគ្រប់វិស័យមានភាពកាន់តែស៊ីជម្រៅ ក្នុងន័យរួមគ្នាទល់ទប់នឹងការរីករាលដាលនៃជំងឺកូវីដ១៩ ដើម្បីជំរុញការងើបឡើងវិញនៃសេដ្ឋកិច្ចសង្គម ក៏ដូចជារួមគ្នាបង្កើតសហគមន៍រួមវាសនារបស់ប្រទេសតាមដងទន្លេឡានឆាងនិងមេគង្គផងដែរ ។
ទាក់ទិននឹងប្រការនេះ រដ្ឋលេខាធិការនៃក្រសួងការបរទេសនិងសហប្រតិបតិ្តការអន្តរជាតិកម្ពុជាបានថ្លែងថា កិច្ចប្រជុំលើកនេះបានលើកឡើងថា នឹងជំរុញការតភ្ជាប់គ្នារវាងកិច្ចសហប្រតិបតិ្តការឡានឆាង-មេគង្គនិង “ ច្រករបៀងពាណិជ្ជកម្មអន្តរជាតិថ្មីតាមផ្លូវគោកនិងសមុទ្រ” ក្នុងន័យជំរុញការបង្កើតខ្សែក្រវាត់អភិវឌ្ឍន៍សេដ្ឋកិច្ចតាមបណ្តោយទន្លេឡានឆាងនិងមេគង្គ ប្រការនេះនឹងមានអំណោយផលដល់ការនាំចេញដោយផ្ទាល់នូវផលិតផលនៃប្រទេសតាមដងទន្លេមេគង្គទៅកាន់ទីផ្សារធំនៅតំបន់កណ្តាលនិងខាងលិចនៃប្រទេសចិន ជាងនេះទៅទៀតអាចនាំចេញទៅកាន់ទីផ្សារអាស៊ីកណ្តាលនិងអឺរ៉ុបទៀតផង ។ ក្រោមបរិបទដែលសេដ្ឋកិច្ចពិភពលោករងការវាយប្រហារមិនធ្លាប់មានដែលបណ្តាលមកពីការរាលដាលនៃជំងឺឆ្លង ការបង្កើតខ្សែក្រវាត់អភិវឌ្ឍន៍សេដ្ឋកិច្ចតាមបណ្តោយទន្លេឡានឆាងនិងមេគង្គនឹងក្លាយជាក្បាលម៉ាស៊ីនសម្រាប់ការអភិវឌ្ឍន៍សេដ្ឋកិច្ចក្នុងតំបន់ថ្មីមួយនេះ ។
អគ្គលេខាធិការនៃវិទ្យាស្ថានសិក្សាស្រាវជ្រាវអំពីយុទ្ធសាស្ត្រនិងបញ្ហាអន្តរជាតិនៃប្រទេសមីយ៉ាន់ម៉ាបានថ្លែងថា និយាយចំពោះការអភិវឌ្ឍនៃប្រទេសតាមដងទន្លេឡានឆាងនិងមេគង្គ ការអភិវឌ្ឍន៍កសិកម្មមានសារៈសំខាន់ណាស់ ដូច្នេះ បណ្តាប្រទេសនានាគួរតែបង្កើនកិច្ចសហប្រតិបតិ្តការលើវិស័យបច្ចេកវិទ្យាកសិកម្ម ចរាចរណ៍ទំនិញនិងការការពារបរិស្ថាន ។ លោកសម្តែងការស្វាគមន៍ចំពោះសេចកី្តសម្រេចរបស់ប្រទេសចិន ដែលថានឹងបង្កើតកញ្ចប់ថវិកាពិសេសលើវិស័យសុខាភិបាលសាធារណៈ ហើយបានវាយតម្លៃខ្ពស់ចំពោះប្រទេសចិនដែលនឹងបន្តផ្តល់ការគាំទ្រជាសម្ភារៈនិងបច្ចេកទេសសម្រាប់ប្រយុទ្ធប្រឆាំងនឹងជំងឺឆ្លងដល់ប្រទេសតាមដងទន្លេមេគង្គជាបន្តទៀត ៕
អ្នកបកប្រែ：Guo Xiangqing