លោកវ៉ាងយី៖ ប្រទេសចិននឹងប្រកាន់ខ្ជាប់ការអភិវឌ្ឍប្រកបដោយសន្តិភាព បើកទូលាយ សហប្រតិបត្តិការ ឈ្នះ-ឈ្នះ និងបរិយាប័ន្ន
កាលពីថ្ងៃទី ៣០ ខែសីហាតាមម៉ោងក្នុងតំបន់ លោកវ៉ាងយី សមាជិកក្រុមប្រឹក្សាកិច្ចការរដ្ឋនិងជារដ្ឋមន្ត្រីការបរទេសចិនបានថ្លែងសុន្ទរកថានៅវិទ្យាស្ថានសិក្សាស្រាវជ្រាវអំពីទំនាក់ទំនងអន្តរជាតិនៃប្រទេសបារាំងក្រោមចំណងជើងថា សាមគ្គីភាព សហប្រតិបត្តិការ បើកទូលាយនិងបរិយាប័ន្ន ដើម្បីរួមគ្នាគាំពារចរន្តវិវឌ្ឍន៍រីកចម្រើននៃការអភិវឌ្ឍប្រកបដោយសន្តិភាពរបស់មនុស្សជាតិ ។
លោកវ៉ាងយីបានថ្លែងថា ស្ថិតចំពោះមុខបរិយាកាសអន្តរជាតិដែលមានបម្រែបម្រួលជានិច្ច ប្រទេសចិនបានលើកឡើងថា ត្រូវតែពង្រីកឧត្តមភាពទីផ្សារដោយទ្រង់ទ្រាយធំនិងសក្តានុពលផ្នែកតម្រូវការក្នុងស្រុក បង្កើតរចនាសម្ព័ន្ធអភិវឌ្ឍន៍ថ្មីដែលមានដំណើរវិលជុំក្នុងស្រុកជាតួអង្គសំខាន់ ហើយដំណើរវិលជុំទាំងក្នុងនិងក្រៅប្រទេសជំរុញគ្នាទៅវិញទៅមក ។ ប្រទេសចិននឹងពង្រីកតម្រូវការក្នុងស្រុកថែមទៀត ពង្រីកការបើកទូលាយចំពោះក្រៅប្រទេស ចែករំលែកផលប្រយោជន៍នៃការអភិវឌ្ឍរបស់ប្រទេសចិនជាមួយពិភពលោកទាំងមូល ដើម្បីជំរុញការរួមគ្នាងើបឡើងវិញនៃពិភពលោកតាមរយៈការងើបឡើងវិញនៃប្រទេសចិន ។
ប្រទេសចិននឹងបន្តប្រកាន់ខ្ជាប់ការអភិវឌ្ឍប្រកបដោយសន្តិភាព បើកទូលាយ សហប្រតិបត្តិការ ឈ្នះ-ឈ្នះនិងបរិយាប័ន្ន ។ ចិនគោរពសិទ្ធិនៃប្រជាជននៃបណ្តាប្រទេសនានាក្នុងការជ្រើសរើសផ្លូវអភិវឌ្ឍន៍ដោយម្ចាស់ការ ហើយនឹងបន្តគាំពារពិពិធកម្មនៃអរិយធម៌ពិភពលោកដោយប្រតិបត្តិការជាក់ស្តែង ក៏ដូចជាជំរុញការផ្លាស់ប្តូរគ្នានិងរៀនសូត្រពីគ្នាផ្នែករូបមន្តអភិវឌ្ឍន៍ ៕
អ្នកបកប្រែ：Xu Xiaoixia