លោកស៊ី ជីនភីង អគ្គលេខាធិការនៃគណៈកម្មាធិការមជ្ឈិមបក្សកុម្មុយនីស្តចិននិងជាប្រធានរដ្ឋចិនបានផ្ញើសារជូន ចំពោះលោក Kim Jong-un ប្រធានគណបក្សពលករនិងជាប្រធានគណៈកម្មាធិការក្រុមប្រឹក្សាកិច្ចការរដ្ឋកូរ៉េខាងជើងដើម្បីអបអរសាទរខួប៧២ឆ្នាំនៃការឯករាជ្យជាតិកូរ៉េខាងជើង។
លោកស៊ី ជីនភីង បានគូសបញ្ជាក់ថា មិត្តភាពប្រពៃណីរវាងចិននិងកូរ៉េខាងជើងគឺជាទ្រព្យសម្បត្តិដ៏មានតម្លៃរបស់គណបក្ស ប្រទេសនិងប្រជាជនរវាងប្រទេសទាំងពីរ ខ្ញុំបានធ្វើកិច្ចជំនួបជាច្រើនលើកជាមួយលោក បានឈានដល់គំនិតឯកភាពរួមដ៏សំខាន់មួយចំនួន ហើយដឹកនាំទំនាក់ទំនងរវាងគណបក្សនិងប្រទេសទាំងពីរឱ្យឈានចូលយុគសម័យប្រវិត្តិសាស្រ្តថ្មី ចាប់តាំងពីផ្ទុះរីករាលដាលនៃជំងឺកូវីដ១៩មក ប្រទេសទាំងពីរបានគាំទ្រនិងជួយគ្នាទៅវិញទៅមក មិត្តភាពរវាងចិននិងកូរ៉េខាងជើងកាន់តែស៊ីជម្រៅថែមទៀត ។ ខ្ញុំយកចិត្តទុកដាក់ខ្ពស់ដល់ការអភិវឌ្ឍទំនាក់ទំនងរវាងចិននិងកូរ៉េខាងជើង រីករាយរួមជាមួយលោកដើម្បីជំរុញឱ្យទំនាក់ទំនងសហប្រតិបត្តិការមិត្តភាពប្រពៃណីរវាងចិននិងកូរ៉េខាងជើងទទួលបានសមិទ្ធផលថ្មីដោយឥតឈប់ឈរ ក្នុងន័យផ្តល់ផលប្រយោជន៍កាន់តែច្រើនដល់ប្រទេសនិងប្រជាជននៃប្រទេសទាំងពីរ ក៏ដូចជាជំរុញសន្តិភាព ស្ថិរភាពនិងភាពរុងរឿងក្នុងតំបន់ ។ សូមជូនពរឱ្យកូរ៉េខាងជើងមានភាពរុងរឿងថ្កុំថ្កើងនិងការអភិវឌ្ឍ ប្រជាជនមានសុភមង្គលនិងសុខដុមរមនា៕
អ្នកបកប្រែ：Li Zhanjing