នៅថ្ងៃទី២៨ខែកញ្ញា លោកស៊ីជីនភីងអគ្គលេខាធិការនៃគណៈកម្មាធិការមជ្ឈិមបក្សកុម្មុយសនិ្តចិន និងជាប្រធានរដ្ឋចិន បានផ្ញើសារលិខិតទៅវិញទៅមកជាមួយលោកRaulCastroលេខាធិការទីមួយនៃគណៈកម្មាធិការមជ្ឈិមបក្សកុម្មុយនិស្តគុយបា និងលោកDiazCanelប្រធានរដ្ឋគុយបាដើម្បីអបអរសាទរខួបទី៦០ឆ្នាំនៃការបង្កើតទំនាក់ទំនងការទូតរវាងប្រទេសទាំងពីរ។
ថ្លែងក្នុងសារលិខិត លោកស៊ីជីនភីងបានលើកឡើងថា ប្រទេសគុយបាជាប្រទេសអាមេរិកឡាទីនទីមួយដែលបានបង្កើតទំនាក់ទំនងការទូតជាមួយប្រទេសចិន។រយៈពេល៦០ឆ្នាំនៃការបង្កើតទំនាក់ទំនងការទូតមក ទំនាក់ទំនងរវាងចិននិងគុយបាបានពុះពារបម្រែបម្រួលនៃស្ថានការណ៍អន្តរជាតិ ដែលកាន់តែមានភាពរឹងមាំ។ទំនុកចិត្តផ្នែកនយោបាយរវាងចិននិងគុយបាកាន់តែស៊ីជម្រៅដោយឥតឈប់ឈរ ហើយទទួលបានផលជាផ្លែផ្កាក្នុងកិច្ចសហប្រតិបត្តិការជាក់ស្តែង។ប្រទេសទាំងពីររួមសុខរួមទុក្ខ ជួយគាំទ្រគ្នាទៅវិញទៅមក ដែលបានពួតដៃគ្នាក្នុងការបង្ការនិងគ្រប់គ្រងការរីករាលដាលនៃជំងឺកូវីដ១៩ មិត្តភាពជាប្រពៃណីរបស់ប្រទេសទាំងពីរត្រូវបានលើកកម្ពស់ម្តងទៀត។ខ្ញុំថែរក្សាថ្នាក់ថ្នមក្រៃលែងចំពោះទំនាក់ទំនងមេត្រីភាពដ៏ពិសេសរវាងចិននិងគុយបា ហើយរីករាយរក្សាការប្រាស្រ័យទាក់ទងគ្នាយ៉ាងជិតស្និទ្ធជាមួយភាគីគុយបា ចាត់ទុកខួបទី៦០ឆ្នាំនៃការបង្កើតទំនាក់ទំនងការទូតរវាងប្រទេសទាំងពីរជាឱកាស ដើម្បីជំរុញឱ្យប្រទេសទាំងពីរចិននិងគុយបាទៅជាមិត្តភក្តិល្អ សមមិត្តល្អនិងបងប្អូនល្អជារៀងរហូត។
លោកRaulCastroលេខាធិការទីមួយនៃគណៈកម្មាធិការមជ្ឈិមបក្សកុម្មុយនិស្តគុយបាបានថ្លែងក្នុងសារលិខិតថា ភាគីគុយបាសូមថ្លែងអំណរគុណចំពោះការគាំទ្រយ៉ាងមុតមាំរបស់ប្រទេសចិន ហើយក៏ជឿជាក់ថា មិត្តភាពរវាងគុយបានិងចិនដែលបានឆ្លងកាត់រយៈពេល៦០ឆ្នាំមុខជានឹងត្រូវបន្តថែរក្សានិងកាន់តែរឹងមាំនៅគ្រប់ជំនាន់ក្រោយៗទៀតជាពុំខាន។
អ្នកបកប្រែ：Ma Xiaoqing