ក្រុមហ៊ុនដំណាំឈើចិនបង្កើតលទ្ធភាពរកចំណូលជូនប្រជាពលរដ្ឋក្នុងមូលដ្ឋាននៅខេត្តក្រចេះ
បច្ចុប្បន្ននៅប្រទេសកម្ពុជា សំណង់លំនៅស្ថានគ្រប់ប្រភេទ បានរីកដុះដាលកាន់តែច្រើនទ្បើងៗ។ ទន្ទឹមនឹងការកើនទ្បើងនៃសំណង់នេះ តម្រូវការនៃការប្រើប្រាស់ឈើពីមួយថ្ងៃទៅមួយថ្ងៃក៏កាន់តែខ្ពស់ផងដែរ។ ក្រុមហ៊ុនស៊ីងបាយអូថេក ដែលទទួលបានសិទ្ធវិនិយោគដំណាំឈើស្របច្បាប់ពីរដ្ឋាភិបាលកម្ពុជានោះ មានផែនការណ៍ដាំដុះរហូត៣០លានដើម ដើម្បីផ្គត់ផ្គង់តម្រូវទីផ្សារ។ ដំណាំឈើដ៏ច្រើននេះ ត្រូវការកំលាំងពលកម្មជាច្រើននាក់ចូលរួមដាំដុះ។ ដែលនេះជាឱកាសល្អសម្រាប់ប្រជាកសិកររស់នៅជុំវិញតំបន់នោះ រកចំណូលបន្ថែម បង្កើនជីវភាពគ្រួសាររបស់ពួកគាត់ ។ ការវិនិយោគចំការឈើដាំ មិនត្រឹមតែផ្តល់លទ្ធភាពរកប្រាក់ចំណូលដល់កសិករប៉ុណ្ណោះទេ ប៉ុន្តែសំខាន់ទៅទៀតនោះ គឺបានផ្តល់ប្រាក់ចំណូលដល់សេដ្ឋកិច្ចជាតិផងដែរ។
បន្ទាប់ពីក្រុមហ៊ុនស៊ីងបាយអូថេក ទទួលបានការអនុញ្ញាតសិទ្ធិត្រឹមត្រូវពីក្រសួងកសិកម្ម រុក្ខាប្រមាញ់ និង នេសាទ ធ្វើការវិនិយោគចំការឈើដាំជាលក្ខណៈឧស្សាហកម្មរួចមក ក្រុមហ៊ុនបានរៀបចំធ្វើការឈូសឆាយដី ក្នុងគម្រោងផែនការសម្រាប់ដាំកូនឈើប្រមាណ ជាង៣០លានដើម លើទំហំផ្ទៃដី ៣៤០០០ហិចតា។
លោក សាន់ សុខហៀងតំណាងក្រុមហ៊ុន ស៊ីងបាយអូថេក បានប្រាប់អ្នកយកព័ត៌មានយើងដឹងថា ដីដំណាំឈើដាំនេះ ជាប្រភេទដីព្រៃរិចរិល អតីតដីស្ថានីយផ្សព្វផ្សាយ និង ស្តារព្រៃឈើបឹងចារ ស្ថិតនៅក្នុងខេត្តក្រចេះ និង ស្រុកសៀមបូក ក្នុងខេត្តស្ទឹងត្រែង។ លោកបន្តថា ការវិនិយោគ ចំការឈើដាំនេះ ចាប់អនុវត្ត ក្រោយពីមានការផ្លាស់ប្តូរថ្នាក់ដឹកនាំថ្មីនៅចុងឆ្នាំ ២០១៨ ដោយមានកិច្ចសហការពីរដ្ឋបាលព្រៃឈើ ។ លោកបន្តថា ចាប់ពីខែកញ្ញា ឆ្នាំ២០១៩មក ក្រុមហ៊ុនបានឈូសឆាយផ្ទៃដីប្រមាណ៥០០០ហិចតា សម្រាប់ធ្វើការដាំដុះ២៤០០ហិចតានៅក្នុងឆ្នាំ២០២០ ហើយនៅឆ្នាំ២០២១-ឆ្នាំ២០២២ ក្រុមហ៊ុនត្រៀមឈូសឆាយផ្ទៃដី៥០០០ហិចតា លើគម្រោងដាំដុះកូនឈើ៧៥០០០០០ដើមបន្ថែមទៀត។
ចំការឈើដាំក្រុមហ៊ុនស៊ីងបាយអូថេកមួយចំនួនបានកំពុងធ្វើការដាំដុះ រីឯមួយចំនួនទៀតបានរីកលូតលាស់ជាបណ្តើរហើយ មកទល់ពេលនេះ។
លោក សុខហៀង បានបន្តឱ្យដឹងផងថា រយៈពេល៣ឆ្នាំខាងមុខ គឺពីឆ្នាំ ២០២០ ដល់ឆ្នាំ ២០២២ ក្រុមហ៊ុនធ្វើការកែច្នៃឈើដាំដុះទាំងនោះ ផ្គត់ផ្គង់ទៅទីផ្សារនៅក្នុងស្រុក ដែលកំពុងមានតម្រូវការនាពេលបច្ចុប្បន្ន។
លោកបន្តថា ចំការឈើដាំនេះ បានផ្តល់ផលប្រយោជន៍ជួយទ្រទ្រង់សេដ្ឋកិច្ចជាតិជួយ សង្គមនៅក្នុងការផ្តល់ការងារជូនប្រជាពលរដ្ឋជាច្រើនពាន់កន្លែង បង្កើតឱ្យមានប្រាក់ចំណូលផ្តល់ជីវភាពប្រចាំថ្ងៃជូនប្រជាពលរដ្ឋ ក៏ដូចជាកម្មករកម្មការនីនៅកន្លែងនេះ។ តាមរយៈវិស័យឧស្សាហកម្មឈើនេះ បានផ្តល់ការងារជូនប្រជាពលរដ្ឋប្រមាណ ៤៥០នាក់។
ក្រោយពីទទួលទានបាយថ្ងៃត្រង់រួចរាល់ហើយ មិនបង្អង់យូ កម្មករទាំងអស់មានប្រុស ស្រី ចាស់ក្មេងបានរូតរះ ខ្លះធ្វើដំណើរតាមយានជំនិះម្នាក់ឯង ខ្លះធ្វើដំណើរតាមមធ្យោបាយរមករួមគ្នាសំដៅទៅចំការ។ ទៅដល់ទីនោះ កម្មករម្នាក់ៗបានប្រញាប់ប្រញាល់ទៅយកកូនប្រេងខ្យល់ដែលគេបានដាក់នៅអែបមាត់ផ្លូវដើម្បីយកទៅដាំរៀងៗខ្លួន។
អ្នកស្រី គឹម ផល្លី ជាកម្មករដាំដុះកូនឈើរបស់ក្រុមហ៊ុន ស៊ីងបាយអូថេក ប្រាប់ថា អ្នកស្រីទើបចូលធ្វើការងារនេះបាន២ខែប៉ុណ្ណោះ។ ស្រ្តីរូបនេះបន្តថា កូនឈើមួយដើមមានតម្លៃ១០០រៀល ក្នុងមួយថ្ងៃពីរនាក់កូនស្រីដាំបាន ពី៧០០-១០០០ដើម បានប្រាក់កំរ៉ៃ ៧-១០ម៉ឺនរៀល បានជួយសម្រាលជីវភាពគ្រួសារអ្នកស្រីបានមួយកំរិតដែរ។
ស្រ្តីវ័យ៥០ឆ្នាំប្លាយរូបនេះបន្តថា ក្រៅពីមុខរបរដាំកូនឈើ នៅផ្ទះធ្វើសែ្រចំការបន្តិចបន្តួចបន្តួចប៉ុណ្ណឹង។ អ្នកស្រី ផល្លី រស់នៅក្នុងភូមិ អំពិលទឹក ឃុំកំពង់ចាម ស្រុកសំបូរ ខេត្តក្រចេះ។
លោកញាណ ផានិត បុគ្គលិកទទួលបន្ទុកគ្រប់គ្រងការងារដាំដុះរបស់ក្រុមហ៊ុន ស៊ីងបាយអូថេក ដែលបានបំរើការងារនេះតាំងពីឆ្នាំ២០១២ ពោលគឺតាំងពីក្រុមហ៊ុនរបស់កូរ៉េមុនរហូតមកដល់ក្រុមហ៊ុនថ្មីនេះ ឃើញថា បានផ្តល់លទ្ធភាពល្អទាំងថវិកា ក៏ដូចផែនការងារសម្រាប់កម្មករយើង។
លោកបន្ត និយាយរួមគាត់មកបំរើការងារផ្នែកកសិកម្មនៅក្រុមហ៊ុនគឺគាត់ទទួលបានកំរ៉ៃច្រើន ក្នុងមួយថ្ងៃបើគាត់ដាំជាលក្ខណៈម៉ៅការ គាត់ដាំបាន៦០០-៧០០កូន អញ្ចឹងបានន័យថាគាត់ទទួលបានកំរ៉ៃ៦០០០០-៧០០០០។ កម្មករក្រៅពីដាំកូនឈើ ពួកគាត់មើលថែទាំកូនឈើ ដូចជាដាក់ជី ឬ បោចស្មៅជាដើម។ ដោយពួកគាត់ទទួលបានប្រាក់ចំណូលបន្តរហូត។ លោកឱ្យដឹងទៀតថា មួយវិញទៀតក្រុមហ៊ុន មិនបំបិទសិទ្ធដល់កម្មករនោះទ្បើយ។
លោក ផានិត បានឱ្យដឹងដែរថា កម្មករមានជម្រើសពីរពីការទទួលបានផលកំរ៉ៃការងារ គឺទី១ម៉ៅការ «គិតប្រាក់តាមចំនួនកូនឈើដាំ» ទី២ គិតប្រាក់ខែ ក្នុងខែកម្មករទទួលបានប្រាក់កំរ៉ៃប្រមាណពី២០០ដុល្លារទ្បើងទៅ។ បុគ្គលិកទទួល បន្ទុកគ្រប់គ្រងការងារដាំដុះរូបនេះ ឱ្យដឹងផងថា ទាំងបុគ្គលិក និង កម្មករ ក្រុមហ៊ុនអនុញ្ញាតទទួលយកប្រជាពលរដ្ឋដែលមានលំនៅស្ថានរស់នៅជុំវិញតំបន់តែប៉ុណ្ណោះ។ បុគ្គលិក ទទួលបានប្រាក់ខែប្រមាណ៦០០ដុល្លារក្នុង១ខែ លោកផានិតចង់ឱ្យក្រុមហ៊ុនមានដំណើរការរហូតទៅ ដើម្បីឱ្យប្រជាពលរដ្ឋមានការងារធ្វើជារៀងរហូតទៅផងដែរ។
លោកសាន់ សុខ ហៀង តំណាងក្រុមហ៊ុន ចំការឈើដាំស៊ីងបាយអួថេក មានប្រសាសន៍ថា ដំណាំឈើរបស់ក្រុមហ៊ុនមានដូចជា ឈើក្រញូង , ម៉ៃសាក់ អាកាស្យា និង ដើមប្រេងខ្យល់។ លោកបន្តថា ក្នុងនេះ ដើមប្រេងខ្យល់ត្រូវបានក្រុមហ៊ុន សម្រេចជ្រើសយក ដាំដុះសម្រាប់បំរើឱ្យទីផ្សារឧស្សាហកម្មឈើ។ បន្ទាប់ពីពិនិត្យឃើញផលវិជ្ជមានពីការធ្វើពិសោធន៍រួចមក។
លោកបន្ថែមថា យើងធ្វើប្រភេទទ្បាបូដី ប្រសិនជាដីនឹងវាត្រូវជាមួយដើមឈើណា យើងត្រូវដាំដើមឈើនោះ កន្លងមកយើងធ្លាប់ដាំដើមឈើប្រភេទអាកាស្យា វាមានការលូតលាស់យឺត ហើយយើង ដាំដើមប្រេងខ្យល់យើងឃើញថាតែរយៈពេល១៥ខែទេ ឃើញមានការលូតលាស់រហូតដល់ជាង១០ម៉ែត្រកម្ពស់។ អញ្ចឹងយើងសម្រេចថា ចាប់យកដើមប្រេងខ្យល់ធ្វើជាមូលដ្ឋាននៃការ ដាំដើមឈើយកទៅប្រើប្រាស់ក្នុងវិស័យឧស្សាហកម្មកែច្នៃឈើដាំរបស់យើង។
លោកបណ្ឌិត វៃ ប្រធានគ្រប់គ្រងការដ្ឋានដាំដុះរបស់ ក្រុមហ៊ុនស៊ីងបាយអូថេក បានមានប្រសាសន៍ថា នៅប្រទេសកម្ពុជាតម្រូវការឈើដាំប្រើប្រាស់ទូរទាំងប្រទេសក្នុងមួយឆ្នាំមានប្រមាណ២៥០០០០០ម៉ែត្រគូប លើទំហំផ្ទៃដី១០០០ម៉ឺនហិចតា។ ទន្ទឹមតម្រួវការប្រើប្រាស់ ឈើធម្មជាតិមាន១៥០០០០០ម៉ែត្រគូបក្នុង១ឆ្នាំ។ លោកវៃបន្តថា ដូច្នេះប្រសិនបើក្រុមហ៊ុន ជោគជ័យតាម គម្រោងផែនការដាំកូនឈើប្រមាណ ជាង៣០លានដើម លើទំហំផ្ទៃដី ៣៤០០០ហិចតា ក្នុងរយៈពេល៥ឆ្នាំ ផលឈើដែលអាចកាប់បានក្នុង១ឆ្នាំ ៥០០០ហិចតា។ ស្មើនឹង៧៥ម៉ឺនម៉ែត្រគូប។គឺមានន័យថាវាស្មើនឹងចំនួនពាក់កណ្តាលនៃការប្រើប្រាស់ឈើធម្មជាតិ។ លោកបានបន្តថា ផលចំណេញពីការដំណាំចំការឈើនេះ ទី១កាត់បន្ថយការប្រើប្រាស់ឈើធម្មជាតិ, ទី២ជួយថែរក្សាបរិស្ថាន, ទី៣ជួយទ្រទ្រង់សេដ្ឋកិច្ចជាតិ និង សង្គម និង ទី៤ ជួយអភិវឌ្ឍន៍សហគមន៍មូលដ្ឋានបង្កើតការងារជូនប្រជាពលរដ្ឋមានចំណូលជួយជីវភាពគ្រួសារបានថែមទៀតផងដែរ។ លោកបណ្ឌិតវៃបានបន្ថែមថា នៅថ្ងៃខាងមុខក្រុមហ៊ុនរៀបចំចរន្តការងារ ដើម្បីឱ្យកម្មករទទួលបានកំរ៉ៃចាប់ពីពេលដំណើរការរហូតលទ្ធផលសម្រេច។
ជាមួយការវិនិយោគនេះ ឯកឧត្តមនេត្រ ភក្រ្តា រដ្ឋលេខាធិការ និង ជាអ្នកនាំពាក្យក្រសួងបរិស្ថាន ក្នុងដំណើរទស្សនៈកិច្ច នៅចំការឈើដាំរបស់ក្រុមហ៊ុនស៊ីងបាយអូថេកនាខេត្តក្រចេះកន្លងទៅបានមានប្រសាសន៍ថា តាងនាមឱ្យរាជរដ្ឋាភិបាលកម្ពុជា ក៏ដូចជា ក្រសួងបរិស្ថានបានគាំទ្រ លើដំណើរការដាំដុះឈើរបស់ក្រុមហ៊ុន ដោយសារតែចំការឈើដាំនេះបំរើទៅលើឧស្សាហកម្មកែច្នៃឈើនៅក្នុងប្រទេសកម្ពុជាដែលកំពុងតែមានតម្រូវការយ៉ាងច្រើន។
តំណាងក្រុមហ៊ុន ចំការឈើដាំ ស៊ីងបាយអួថេក លោកសាន់ សុខ ហៀង បានឱ្យដឹងថា មកទល់ពេលនេះការដាំដំណាំឈើសម្រេច បានប្រមាណជាង៧លានដើមហើយ លើទំហំផ្ទៃដីជាង៥០០០ហិចតា។ លោកបន្តថា ក្រុមហ៊ុនបានចុះកិច្ចសន្យា ទិញកូនឈើពីក្រុមហ៊ុន Angkor Plywood ចំនួន ១០លានដើមក្នុងមួយឆ្នាំៗ ដើម្បីធ្វើការដាំដុះតាមផែនការអាជីវកម្មរបស់ខ្លួន ព្រោះក្រុមហ៊ុន Angkor Plywood មានវិទ្យាស្ថានបង្កាត់ពូជកូនឈើតាមបច្ចេកទេស។
ក្រុមហ៊ុនស៊ីង បាយអូថេក បានខិតខំប្រឹងប្រែង ក្នុងការអភិវឌ្ឍចម្ការឈើដាំ សម្រាប់ បម្រើវិស័យឧស្សាហកម្មឈើកែច្នៃនៅកម្ពុជា និងការពិភាក្សាជាមួយប្រជាពលរដ្ឋ និង សហគមន៍ ដែលរស់នៅក្នុងតំបន់ដែលមានដីទំនេរ ដើម្បីសហការដាំកូនឈើជាលក្ខណៈដៃគូរ បង្កើតការងារជូនប្រជាពលរដ្ឋ និង បង្កើនជីវភាពរបស់ពួកគាត់។ ក្រុមហ៊ុនបានប្រកាសស្វែង រកដៃគូរសហការ ផ្សេងទៀត ក្នុងការវិនិយោគដាំចំការឈើ។
ការបំពេញការងាររបស់បុគ្គលិក និង កម្មករ អនុលោមតាមច្បាប់ការងាររបស់ក្រសួងការងារ និង បណ្តុះបណ្តាលវិជ្ជាជីវៈ ។
ក្រុមហ៊ុនាស៊ីងបាយអូថេក បានជួយស្ថាបនាផ្លូវ២០០គីទ្បូម៉ែត្រ។ ដាក់ប្រព័ន្ធលូ៣០ និង សាងសង់ស្ពាន៣៧កន្លែង និង គ្រោងសាងសង់ផ្លូវថ្នល់ជាច្រើនរយគីឡូម៉ែត្រទៀត។ មានផ្លូវ គមនាគមន៍ខ្វាត់ខ្វែងក្នុងគម្រោងវិនិយោគដែលជួយកាត់បន្ថយពេលវេលា និង ការចំណាយលើការធ្វើដំណើររបស់ប្រជាពលរដ្ឋផងដែរ៕
ប្រភព៖ 柬埔寨国家广播电台（វិទ្យុជាតិកម្ពុជា）