បទវិភាគ៖ការរួមគ្នាកសាង“ខ្សែក្រវាត់និងផ្លូវ”រវាងចិននិងកម្ពុជាប្រកបទៅដោយប្រសិទ្ធភាពខ្ពស់
លោកប្រធានរដ្ឋចិនស៊ីជីនភីងបានលើកឡើងគំនិតផ្តួចផ្តើមសហប្រតិបត្តិការស្តីពីការកសាង “ខ្សែក្រវាត់សេដ្ឋកិច្ចតាមផ្លូវសូត្រ”និង “ផ្លូវសូត្រលើសមុទ្រសតវត្សរ៍ទី២១”កាលពីខែកញ្ញានិងខែតុលាឆ្នាំ២០១៣ដោយឡែកពីគ្នា ។ គំនិតផ្តួចផ្តើមស្តីពី “ខ្សែក្រវាត់និងផ្លូវ”មានគោលបំណងអភិវឌ្ឍយ៉ាងសកម្មនូវទំនាក់ទំនងភាពជាដៃគូសហប្រតិបត្តិការសេដ្ឋកិច្ចជាមួយប្រទេសតាមបណ្តោយខ្សែក្រវាត់និងផ្លូវ ដើម្បីរួមគ្នាបង្កើតសហគម៍រួមផលប្រយោជន៍ សហគមន៍រួមវាសនានិងសហគមន៍ទំនួលខុសត្រូវរួមដែលប្រកបដោយទំនុកចិត្តលើគ្នាផ្នែកនយោបាយ បរិយាប័ន្នខាងសេដ្ឋកិច្ចនិងវប្បធម៌ ។ កម្ពុជាបានប្រកាសចូលរួមគម្រោងនេះនៅចុងឆ្នាំ២០១៦ ។
សម្តេច ហ៊ុនសែន នាយករដ្ឋមន្ត្រីកម្ពុជាបានថា កម្ពុជាគាំទ្រគំនិតផ្តួចផ្តើមស្តីពី“ខ្សែក្រវាត់និងផ្លូវ”ហើយបានចាត់ទុកគំនិតផ្តួចផ្តើមខ្សែក្រវាត់និងផ្លូវជាក្របខ័ណ្ឌកិច្ចសហប្រតិបត្តិការដែលមានលក្ខណៈពិសេស ពីព្រោះបានផ្តោតជាសំខាន់លើការសម្របសម្រួលគោលនយោបាយអភិវឌ្ឍន៍ជាមួយប្រទេសដៃគូដោយឈរលើស្មារតីគោរពគ្នាទៅវិញទៅមក ។
មុនពេលចាប់ដំណើរការគម្រោង “ខ្សែក្រវាត់និងផ្លូវ”របស់ចិននៅឆ្នាំ២០១៣ ការវិនិយោគរបស់ចិននៅប្រទេសកម្ពុជា សំខាន់គឺប្រមូលផ្តុំក្នុងគម្រោងសាងសង់ទំនប់ទឹកនិងវារៈអគ្គិសនីជាដើម ។ បន្ទាប់ពីចាប់ដំណើរការគំនិតផ្តួចផ្តើមស្តីពី “ខ្សែក្រវាត់និងផ្លូវ” ការវិនិយោគរបស់ចិនបានបង្វែរទៅលើវិស័យជាច្រើន ជាពិសេសគឺឧស្សាហកម្មសំណង់ ឧស្សាហកម្មអចលនទ្រព្យនិងដឹកជញ្ជូន ដែលត្រូវជា៧៣ភាគរយនៃទំហំវិនិយោគសរុបលើកម្ពុជារបស់ចិន ។ តាមដឹង នៅឆ្នាំ២០១៩ ទំហំពាណិជ្ជកម្មទ្វេភាគីរវាងចិននិងកម្ពុជាបានឡើងដល់៩ពាន់៤រយ៣០លានដុល្លារអាមេរិក ដែលកើនឡើង២៧,៧ភាគរយបើប្រៀបធៀបនឹងរយៈពេលដូចគ្នានាឆ្នាំ២០១៨ ។ ក្រៅពីនេះ ចិនបានក្លាយជាប្រទេសជាប្រភពប្រាក់ទុនបរទេសធំបំផុតរបស់កម្ពុជា ដែលត្រូវជា៤៣ភាគរយនៃទំហំវិនិយោគដោយផ្ទាល់ពីបរទេសសរុបនៅឆ្នាំ២០១៩ ។ សម្តេចហ៊ុនសែន នាយករដ្ឋមន្ត្រីកម្ពុជាបានថ្លែងថា តំបន់សេដ្ឋកិច្ចពិសេសក្រុងព្រះសីហនុកសាងគម្រោងគំរូនៃកិច្ចសហប្រតិបត្តិការឈ្នះ-ឈ្នះក្រោមគំនិតផ្តួចផ្តើម“ខ្សែក្រវាត់និងផ្លូវ” ការសាងសង់ផ្លូវល្បឿនលឿនភ្នំពេញ-ខេត្តព្រះសីហនុនឹងក្លាយជាកម្លាំងចលករមួយកែប្រែវិមាត្រសេដ្ឋកិច្ចកម្ពុជា ការសាងសង់ព្រលានយន្តហោះអន្តរជាតិសៀមរាប-អង្គរថ្មីជាការរួមចំណែកយ៉ាងសំខាន់ក្នុងការកែលម្អប្រព័ន្ធហេដ្ឋារចនាសម្ព័ន្ធនៅក្នុងប្រទេសកម្ពុជា ជាពិសេសអាចជំរុញការអភិវឌ្ឍលើវិស័យទេសចរណ៍ពាណិជ្ជកម្ម វិនិយោគនិងកសិកម្មរបស់ប្រទេសកម្ពុជា ។
កាលពីថ្ងៃទី១២ខែតុលាឆ្នាំ២០២០ ចិននិងកម្ពុជាបានចុះហត្ថលេខាលើកិច្ចព្រមព្រៀងពាណិជ្ជកម្មសេរីជាផ្លូវការ ។ កិច្ចព្រមព្រៀងពាណិជ្ជកម្មសេរីរវាងចិននិងកម្ពុជាជាកិច្ចព្រមព្រៀងពាណិជ្ជកម្មសេរីទីមួយដែលតាក់តែងកិច្ចសហប្រតិបត្តិការនៃគំនិតផ្តួចផ្តើមស្តីពី “ខ្សែក្រវាត់និងផ្លូវ” ជាជំពូកមួយដាច់ដោយឡែក ។ ការចុះហត្ថលេខាលើកិច្ចព្រមព្រៀងនេះជានីមិត្តសញ្ញាថ្មីក្នុងការអភិវឌ្ឍទំនាក់ទំនងផ្នែកសេដ្ឋកិច្ចនិងពាណិជ្ជកម្មទ្វេភាគីរវាងចិននិងកម្ពុជា ដែលនឹងជំរុញទំនាក់ទំនងផ្នែកសេដ្ឋកិច្ចនិងពាណិជ្ជកម្មទ្វេភាគីឡើងដល់កម្រិតថ្មីថែមទៀត ៕
អ្នកបកប្រែ：Sun Lingling