សម្តេចតេជោប្រកាសនឹងចាក់វ៉ាក់សាំងកូវីដ១៩ជាជំនួយរបស់ចិនមុនគេ ខណៈវ៉ាក់សាំងនេះ នឹងមកដល់កម្ពុជានៅខែកុម្ភៈ ខាងមុខ

ភ្នំពេញ៖ សម្តេចតេជោហ៊ុន សែនបានប្រកាសថា នឹងចាក់វ៉ាក់សាំងកូវីដ១៩ មុនគេ ខណៈវ៉ាក់សាំងនេះ នឹងមកដល់កម្ពុជានៅខែកុម្ភៈ ខាងមុខ ដែលនឹលធ្វើសន្និសីទកាសែតចេញ ពីមន្ទីរពេទ្យកាល់ម៉ែត ផ្ទាល់តែម្ដង ដើម្បីបង្ហាញពីជំនឿចិត្តដល់ប្រជាពលរដ្ឋ ។ ក្នុងឱកាសអញ្ជើញជាអធិបតីដ៏ខ្ពង់ខ្ពស់ក្នុងពធីសម្ពោធអគារទីស្តីការថ្មីក្រសួងសាធារណការ និងដឹកជញ្ជូន និង វិទ្យាស្ថាន តេជោសែន សាធារណការនិងដឹកជញ្ជូន នៅព្រឹកថ្ងៃទី ២២ ខែ មករា ឆ្នាំ២០២១ ស្ថិតនៅផ្លូវ៥៩៨ (ផ្លូវ ជា សុផារ៉ា) សង្កាត់ច្រាំងចំរេះ២ ខណ្ឌឫស្សីកែវ រាជធានីភ្នំពេញ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តីនៃព្រះរាជាណាចក្រកម្ពុជា បានមានប្រសាសន៍ថា វ៉ាក់សាំងកូវីដ១៩នឹងមកដល់នៅខែកុម្ភៈនេះ ហើយ នៅពេលដែលវ៉ាក់កូវីដ១៩សាំងមកដល់អាកាសយាន្តអន្តរជាតិភ្នំពេញសម្តេចនឹងចេញទៅទទួលដោយផ្ទាល់ ព្រោះចាត់ទុកជាទំនិញយុទ្ធសាស្រ្ត និងជាសុវត្ថិភាពសម្រាប់ប្រជាជនកម្ពុជា ។  សម្តេចតេជោ បន្តថា ទម្លាប់របស់សម្តេចលុះត្រាតែភាគគីនាយករដ្ឋមន្រ្តីប្រទេសនានាមកដល់ទើបសម្តេចទៅទទួល ក្រោយមកគឺកាត់ចោលត្រឹមទទួលនូវវិមានសន្តិភាពវិញ ។ សម្តេចតេជោបន្តទៀតថា មានតែព្រះមហាក្សត្រនិងហ្លួងម៉ែ តែប៉ុណ្ណោះដែលសម្តេចនៅតែដង្ហែព្រះអង្គ ពេលយាងចាកចេញនិងទទួលព្រះអង្គពេលត្រឡប់មកវិញ តែឥឡូវសម្តេចនឹងទៅទទួលវ៉ាក់សំាងដោយផ្ទាល់តែម្ដង។ សម្តេចតេជោ បញ្ជាក់ថា សម្តេចនឹងចាក់វ៉ាក់សាំងនេះមុនគេ នៅឯមន្ទីរពេទ្យកាល់ម៉ែត ដើម្បីបញ្ជាក់ឱ្យប្រជាជនកម្ពុជា ទុកចិត្តពីការប្រើប្រាស់វ៉ាក់សាំងនេះ ហើយសម្តេចចង់ចាក់ឱ្យប្រជាពលរដ្ឋ ធ្វើយ៉ាងណាឱ្យបានមុនចូលឆ្នាំថ្មីប្រពៃណីជាតិខ្មែរ ខាងមុខ។ សំឡេង «ឥឡូវខ្ញុំនឹងទទួលវ៉ាក់សាំងនៅឯព្រលានយន្តហោះពោធិ៍ចិនតុង បន្ទប់ទៅម្ជុលទី១ ដបដូសទី១គឺចាក់លើខ្លួនខ្ញុំតែម្ដង ហើយថ្ងៃនោះសង្ឃឹមថាសម្តេចពិជ័យសេនាទៀ បាញ់ ឯកឧត្តមជាសុផារ៉ា លោកជំទាវទាំងអស់ទៅចាក់ជាមួយខ្ញុំនៅមន្ទីរពេទ្យកាល់ម៉ែត ហើយខ្ញុំធ្វើសន្និសីទការសែតតែម្ដង ។ តម្លៃខ្លួនខ្ញុំគឺខ្ញុំត្រូវតែធ្វើដើម្បីឱ្យប្រជាជនកម្ពុជាច្បាស់ ទីកន្លែងបានរៀបចំហើយអ្នកដែលចាក់ឱ្យខ្ញុំគឺពេទ្យដែលការពារខ្ញុំថែរក្សាសុខភាពរបស់ខ្ញុំឥឡូវជារដ្ឋលេខាធិការក្រសួងសុខាភិបាល ហើយបន្តទៅចាក់ឱ្យអ្នកដ៏ទៃទៀត អ្នកណាចាក់ក៏បានក៏ប៉ុន្តែ ចាក់រួចហើយខ្ញុំនឹងធ្វើសន្និសីទនៅមន្ទីរពេទ្យកាល់ម៉ែតតែម្ដង ដើម្បីបញ្ជូនសារថាកម្ពុជាបានចាប់ផ្តើម ។ ហើយបើតាមអ្វីដែលខ្ញុំចង់បានគឺមុនចូលឆ្នាំខ្មែរ កម្ពុជាត្រូវទទួលបាននូវការចាក់វ៉ាក់សាំងចំនួន៥០ម៉ឺននាក់ ព្រោះនៅពេលខាងមុខ៣០ម៉ឺនដូសនឹងមកដល់សម្រាប់មនុស្ស១៥ម៉ឺននាក់ទៀត ប៉ុន្តែមិត្តចិនកំពុងតែជំរុញថាឱ្យបាន៦០ម៉ឺនដូស បើបាន៦០ម៉ឺនដូសក្នុងខែកុម្ភៈ យើងនឹងចាក់បាន៣០ម៉ឺននាក់ សល់៤០ម៉ឺនដូសទៀតនឹងចាក់២០ម៉ឺននាក់ ដូច្នេះមុនចូលឆ្នាំខ្មែរបើបាន៥០ម៉ឺននាក់ អ្នកធ្វើសេវារបស់យើងជួរមុខ នឹងទទួលបានការការពារ » ៕